Notes
A sermon delivered by Rev S Nengzakhup on January 27, 2013 at EBCC Delhi.
MIDANGTE A DINGA THUPHA VUALJAWLNA HI DING A SAP I HI.
Delhi EBCC Biak Inn January 27, 2013 at 11AM
Text: Gen.12:1-4
Thupatna: Tuzing in lasak a nuam a, sak taktak a sa i hih man in Delhi EBC a kong kikhop teng lakah tuni bang a lasak a nop lam ka thei kei.
Delhi khopi a om te’n India gam leh Zomite a ding kia hilou in leitung pumpiah a diak in tangthupha za nailoute a ding in mohpuakna lianpi nein a hi uh cih ka gen nuam hi. Delhi a omte Zomite, India mite leh awilou gam tanpha a ding a Toupa vanzat thupha vualjawlna hi ding in Toupa’n hong deih hi in ka thei a, tua ahihman in na mohpuakna uh lian mahmah ahi cih ka gen nuam hi. Tua i gen tawh kiton in “Midangte a ding a thupha vualjawlna hi ding a sap i hi,” cih thu Gen.12:1-4 pansan in Abraham nuntakna a kipan houlim leng ka ci hi.
Pasian in Abraham a sap laiin midangte a ding a thupha vualjawlna hi dinga a sap bang in ei zong midangte a ding a thupha vualjawlna hi ding in hong sam hi. Tuni in i Laisiangthou simna a Abraham kici pen munah ei min ciat koih leng ut huai ka sa hi. Pasian in Abraham a sap bang in kei zong hongsam hi ci thei leng ut huai kasa hi.
NANG VUALJAWLNA HI IN: Pasian in Abraham a sap lain a tup leh ngim goal a pek lut sawmna pen “nang vualjawlna hiin” cih a hi. Tua bang a midangte a dinga vualjawlna ahih theihna ding in nutsiat ding thum a gen a, piak ding zong a ciam hi.
Nutsiat dingte: Pasian in Abraham kiangah – “Na kholam, na tanaute leh na pa innkuante nusia in la gam kong etsak ding lamah paiin,” a ci hi (Gen. 12:1). Tuni a nang leh ken i nutsiat ding Abraham a toh a kibang kei ding. Ahihhang , midangte a ding a vualjawlna i hih ding le hi dinmun leh ihihna toh kituak bang zel in i nutsiat ding a om ngei ding.
Piak a ciamte: Atunga nutsiat ding a cihte i nutsiat leh Abraham piak ding a ciam mah bang in ei zong hong ciam hi. Abraham in Pasian cih bangbang a om leh (1) Chi mahmah a bawl ding, (2) Vualjawl ding (3) Amin hih thupi taka bawl ding. (4) A vualjawlte vualjawl ding (5) A hamsiatte hamsiat ding. (6) Leitunga namcihte a dinga vualjawlna hisak ding (Gen.12:2-3).
Abrahamte nupa in tua Pasian in piak ding a ciamte a tun theihna ding un suangthu golpi thum a om hi. (1) Thumanna (Unconditional Obedience) (2) Kipiakkhiatna/Tan ngamna (Sacrifice) leh (3) Upna (Faith) a hi. Hih suangthu thumte pansan in haksatna tampi toh tamveipi a lungkiat nung un Pasian thuciam a tangtung pan hi. Ei zong Pasian in midangte a ding thupha vualjaawlna hi ding a hong sapna ah haksatna leh lungkiatna tampi thuak kawm in i tung thei ding hi. Gentehna khat genzual leng: Voksa lim is a ciat uh hi. Ahihang in, Vok pen a hing lai leh a tailai kiangah, “Vok aw lim hong sa lua ing,” va kici thei lo hi. Voksa lim isak theihna ding in Vok in a thuak phot kul hi. Vok i goh / ithah phot kul hi. Tua zoh ciang sem zan in, huan in a min ciang in “Voksa lim” i ci thei pan hi. Tua mahbang in midangte a ding a thupha vualzawlna i hih theihna ding in en zong i nutsiat ding, i sih san ding leh haksatna tampi i thuak ding om ding hi.
Abraham in Pasian thuciam a ngahna ding in a lampi tot skul kai bang in ka ngaihsun hi.
Admission test-ah sangtak in a passed hi. Bang ci bang in eita? Pasian in a sap bangbang in deek (bargain) het louin, a cih bang in thumang takin a zui pah hi. Thumanna vanzat a zang hi. Gen.12:4a, Tua ahihman in entrance test ah 100% mu in a passed a, a khalam khualzinna hong pan ta hi. Ei zong i pianthak ding lain “Ka Honpa leh Topa in kong sang hi. Tu-a kipan nang ma thu thu hita hen” ciin i ki aap/ ki-lan uh hi. Tua banah ei zong i pianthak tung in nuam isa uh a, Laisiangthou bang i sim khempeuh ei a ding mahmah a kigelh bang in nuam isa uh hi. Ahihhang. I theih loh kal in, a sawtlou in hat leh hoih ikisak lai in khemna hong lut in i puk pah de-dap thei uhi hi. Tua bangmah in Abraham zong entrance test-ah hih hoih lua na pi, a theih loh kal in First terminal exam hong tung guih hi.
- First Terminal Examination- Kialna: A theih loh leh kigin loh kal a first terminal exam hun tung guih ahihman in a hih sia mahmah a, nakpi takin a fail hi. A first terminal exam uh bang hiam i cih leh apaina lam gam uah kial nakpitak in na tung hi (Gen.12:10). Tua kial nakpitaka tung kalah haksatna tampi tuak in, a ma hinna na ngawn lau huai in hong om ahih man in, a ji Sarah kiangah mi’n hong dot leh a ji kahi ci ken la, a sanggamnu ka hi ci in zuau hong phuak hi. Tua a zuau phuakna hang in a gam kumpipa un haksatna tuak in, Abrahamte nangawn in zong haksatna hong tuak uh hi. Tua ahihman in a frist terminal examah nak pitakin hong failed pah hi ka ci hi.
- Second Terminal Exam – Ngaklahna: Pasian pen a thuciamah zuau ngeilo in, ahihhang ei ngaihsut bang in kintak in hih ngei lo a bang hi. Bang ahia a second terminal exam? Pasian in ci thupi a bawl ding, nam thupi bawl ding a cih pen a nupa ua tek tuak a diak in a ji Sarah singkeu bang hita a hihman in mihing ngaihsutna pan in ci thupi leh nam thupi a suahna ding suan leh khak Sarah sungpan a pian ding lamet huai nawn lo hi. Lametna nein awn lou, ngak lah gawpta a hih man un Sarah in awlmoh pha diak hi ding hiven, nikaht a pasal Abraham kiangah Pasian thuciam a tangtun theihna ding in kei lah teklua mahmah ka hih man in idea khat ka nei ciin Pasian program thei lo in ama lemgel siamna a pasal kiang hong gen hi. Tua ahihman in a ji Sarah in Pasian in a kamciam hong tangtun sak theihna ding i sila nu Hagar toh valum khawm un la, tua hileh a lampi khat om ding hi,” ci in a pasal a a sawl hi. Abraham in zong nial lo in, a ji idea pen hoihsa ahihman in a thu na mang pah hi. Hagar toh tapa khat hong nei pah uh a, amin ding in Ishmail a phuak uh hi. Khatvei vei jite thu man pen hoih hi. Jite thumang kuamah hih kua ma hut lo. Ahihhang a lah pasalte a tamzaw jite thumang ngen kihi. Jite’n na pasalte un na thu uh a man ua, ahihkhelh ciang un na pasalte uh na ngawh kiik ciang un nuam khollou hi. Abraham in aji thu a man man in kua ma theihpih louh piin a innsung uah haksatna tampi hong om in civil war hong piang hi. Sarah in Abraham kiangah “Hagar leh a tapa Ishmail a innsung ua pan hawl khia ding in ci hi. Abraaham a ding in Ishmail pen a ta taktak a himan in a hawlkhiat ding pen thubaih hilo ding hi. Ahihhang a ji thu a man kik kul a, haksa sa pipi in Ishmail leh a nu Hagar a hawl khiak hong kul hi. Abraham in second terminal examnaah zong first terminal sang in hihsia zaw in nakpitak in hong failed kiik hi.
- Final Examnination – Isak a bia ding a ngetna: Hihbang teng a tuah nung un zong Abraham lungkia tuan lo in Pasian sapna lam mahah upna tawh hong pai to zel hi. Final exam hong tung dek ta hi. A final exam pen bang hiam cih leh Pasian in nikhat Abraham kiangah Abrham aw, na tapa Isak in hong bia in ci hi. Tua thu a zak ciang in Abraham pen a cimul khawng thou suau-suau ding in ka um hi. Ka mang lah hi kei ven. Pasian nang ma aw mah hia leh ka jak ci ding in ka um hi. Tutung in Abraham zong pil deuh ta hi ding hi ven hih thu Pasian in a tek-nung ta a tapa it luat leh deihthawh luata biak ding a ngetna thu a ji a hilh het kei hi. Banghang hiam cih leh aji hilh leh aji a tapa uh Isak pen phallou lua ding a hihman in sel ngeingei ding a, Pasian deihna tangtung sak zou lou ding cih Abraham in thei cian mahmah hi ding hi. Angeina bang in a tapa toh Moreh mualah haltum/halmang kithoihna dia a tapa Isak go ding in a kuan ta uh hi. Lampiah a tapa Isak in innocent tak in, “Pa i vanteng khempeuh kim a, i kithoihna ding a gan (belem/tuuno) om kei si e” a cih ciang in a pa’n bawi aw, Pasian in hong pia in teh “Jehovah Jireh” ciin dawng hi. Moreh mual a tun uh ciang in Abraham in zong a ngeina bang in ahih ding teng hih in, a tapa a khut-akhe hen cip in a kithoihna dawhkan tungah koih in dawt ding / that ding in a tem hiam mahmah tawh kipan hiding in ka um hi. Tua laitak in Pasian in “Eh, Abraham, na tapa Isak that / go dek taktak na hi maw? Mawk mawk? Go zen zen kei ou. Pasian in,“Na nung en sin aw” ci a, Abraham in a nung a et leh Belam/Tuu tal khat mu a, “Pasian in tua na nung a Belam/Tuu pen la in la tua in hong bia in. Na tapa Isak pen phel in la, khah in,” ci hi. Pasian a lungdam lua mahmah hi. Tu tung final exam pen Abraham in zong mark 100 ah 100 val phial mu in passed hi. Tua a kipan in Pasian in Abraham a sap tunga a thuciam khempeuh khat khat in hong tangtung ta hi.
Sanggamte aw, midangte a ding a thupha vualjawlna hih pen thubaih hilou hi. Abraham in Pasian kamciamte a tak a muh theihna ding a lampi totte a haksat lam den a exam toh gen teh a i genna a kipan i thei hi. Pasian in midangte a ding a thupha vualjaawlna hi ding a hong sapna hih bucing ding in Abraham mah bang a haksatna tampi i tot khak kul ding hi. Jesu nungzuihna i cih thu nuam hilou hi. Gentheihna, simmohna, mibatlouhna leh mi nuihsan na ngawn i tuah hun om kha ding hi. I hih khelh hun zong om tham ding hi. I lungkiat hun zong om in teh. Nung tolh a lametna bei a kua ma theih louh leh mitheih a i buaisiat hun zong om kha tham in teh. Ahihhang, ei zong Abraham mah bang a lungkia lou a, upna kip tak nei a, thumanna toh kipumpiak ngam i zuhi zel leh a tawp in lohcinna leh gualzohna thupi tak i tang ding hi. Tua bang i hih ciang in midangte a dinga thupha vualjawlna i thei ta ding hi. Toupa’n a thu i gen i tan ciatah hong vualjawl sak ta hen.
