Notes
KHROS A THILTUNG LAMDANGTE
(The sayings of Jesus on the Cross)
Good Friday ni a thiltung lamdang mahmah nihte nikum 2012 in i genta uh a: khiim zing leh Biakin puanzak kikek. Kum 2011 in Jesu thuakna tungtwn a hamphana i tante leh tua hamphatna midangte'n a tansawn theihna ding ua eite'n leng thuak ngaite i thuak ding uh ahihdan i genta uhi.
Tuni'n Khrost tunga thiltung lamdangte tamlou i taklang ding. Dereek Prince in "The Seven Wonders of the Cross" achi hi.
1) Ngaihdamna- Lk. 23:34
"Huan, Jesu’n, Pa amau ngaidam in; a thilhih uh a thei kei ua hi, achi a. Huan, a puansilhte kihawm in ai a san uh." Ngaihdam theihna thuguuk tuh Jesu Khros kia ah om hi. Hiai Khros tawn loute' adin ngaihdamna tuh haksa mahmah sek hi.
2) Pathian tawh Kikhenna- Mat. 27:46
"Huan, dak kua ding khawngin, Jesu tuh ngaihtakin a kikou a, Eloi, Eloi, lama sabakthani? chiin, a kikou khia a, huai tuh, Ka Pathian, Ka Pathian bangdia hon paisan? chihna ahi." Jesu'n khovawl khelhna a puak laiin a Pa'n paisan hi. Hiai hun maituah ding tuh Jesu'n haksa asak mahmah ahi a, Olive/Gethsemani huan a khawul sisan banga pawt hial a a thumna ahi. Himahleh, a Pa' deihna bangin a tawt ding lampi mah tawn in hong thuak hi.
3) Kha kemsak- Lk. 23:46
"Huan, Jesu aw ngaihtakin a kikou a, Pa, na khut ah ka kha ka hon kemsak hi, achi a. Huan, huai a chih khit in a kha a khahta hi." Pathian khut ah kikepsak theihna thugukk tuh Khros ah om hi. I tuah bangbang, i tunga hongtung bangbang leh i maban dingte Toupa khut ah kikepsak theih hi.
4) Hotdamna- Lk. 23:43
"Huan, aman, a kiangah, Chihtaktakin ka hon hilh ahi, Tuni’n ka kiangah Paradis ah na om sam ding, achi a." Hotdamna bukim tuh Khros ah om hi. Khros tawn in thawhnawnna om thei lou hi. Thawhnawnnna thilhihtheihna tang ding/koppih dingin Khros tawt ngai hi. Huai mun ah tuh Hotdamna bukim om hi.
Khros a hiai bang thil lamdangtakte ahong om theih na ding in Jesu'n a tawt ding lampi sehsa mah hon tawt kipahmawh hi. Huai sehsa lampi mah tawn in tatna nna hong sem bukim thei hi.
Tuni'n nang na tawt dign lampi na theita hia? Tua lampi tawn in na pai hiam?
Toupa'n Good Friday tungtawn a vualzawlna hon behlap hen aw, Amen.
