Notes
PATHIAN DEIHLAM BANG AHIA?
Mat. 6:10; Eph. 5:17; 1Jn. 2:17
Kum 2014 a hon pikaitu, hun thak leh lametna thak leh hinna thak hon pia, Pathian tungah kipak mahmah in thupina leh minletna tengteng Amah i khusak hi, Amen.
Tu kum thak, 2014 sung Pathian deihlam zong a hiai Leitung a AMah deihdan semkhe dia i kisak laiin, tuni'n, huai Pathian deihlam bang hi hiam chih gen le'ng chi'n tua dingin kong kisa hi. Pathian deihlam a i hin theihna dingin Pathian deihlam bang hi hiam chih i chet mahmah kul hi.
A tangpi a etin, Bible ah, Pathian deihlam theihtheihna chi thum om hi-
1) Pathian dante (God's Laws)-hiai tuh Pathian mihingte om dingdan a a deihte, khawvel paitou jel ding leh tangtawn thute a taklatna masa ahi. A mite ahon thuhilhna dante leng achih theih ding. Huai tuh, hih ding leh hihlouh ding dan a hon khunsak te ahi uhi. Pathian deihlam leh Pathian dante tuh akibang ahihdan Sam 40:8 ah kigen hi. Huaiziakin, nang mimal hinkhua a Pathian deihlam na theih nop leh, na inkuan adinga Pathian deihlam na theih nop leh, khawvel paijel ding ah Pathian deihlam na theih nop leh, Amah dante na sim a na sut ding ahi. Amah dante theilou in Pathian lungsim ding kuamah in theithei lou ding hi.
2. Pathian deih masak (God's Perfect will)- hiai tuh Pathian in a deihlam a genkhiakna ahi. Huai tuh mi tengteng hotdam a om dign leh thutak thei ding in a deih hi (1 Tim. 2:4). Pathian deih masak tuh bangmah dang hilou mi tengteng hotdam a om ding ahi. Hotdamna tanglou in kuamah in Pathian itna theisiam thei ngeilou ding a Pathian lungsim leng kuamah in theithie lou ding uhi. Hiai tuh a deih masak- perfect will- ahi. Nang hotdamna na tangta hiam? Huai Pathian deih masak nang hinkhua ah a masa in na koih theita hiam?
3. Pathian in a phal (God's Permissive will)- Pathian in a deih masak hilou, himahleh, khawvel a thiltung dinga a phal, nang leh kei hinkhua a tung ding a hon phalsakte genna ahi. Aziak bel, Pathian in hon itna ziakin leh Amah batpih a siam ihihziak in eimah deihtelna zang a khelhna a i lut ding na tawm leng hon phalsak hilhial hi. Huchi a khelhna a i lut nungin i suaktak theihna dign lampi hon bawlsak lailai hi. Khawvel haksatna tuamtuam, hinkhua hon subuai thei thil tamtakte- damlouhna, lungkiat, lohsapna, leh ning kitelnate bang leh zingling, kidouna, kial leh a tuamtuam te. Hiai teng banah, Pathian gimthuakna i thuak ding hon phalsak lai hi (1Jn.5:19). Haksatna i tuah chiangin Pathian in hon nusia hipah lou in, Amah i naihsemna ding bang, sinlai midangten a sin theihna ding bang uh hi nuam mahmah hi.
Hiai point thumte zangin Pathian lungsim ding theihtheih dan i neita hi. Huchihlaiin, nang mah mimal hinkhua ah Pathian pina bang chin na theithei dia? Hiai toh kisai in Pathian in michih adin set-rule (zuihding lepsa) bangmah neilou hi. A tangpi'n hiai a nuai ate'n Toupa hon pian chiansak uhi.
1) Bible tang apan chetna- Pathian hon pian leh lamkaihna tuh Bible tungtawn in chaing penpen hi. Bible pawlam ah Pathian kilak ngeilou, Bible kalha gamtang din Pathian in kuamah phutluih ngeilou hi. Na deihtelna Bible pansan ahih gige ding ahi.
2) Kha Siangthou pina- hiai tuh inner voice ichihsek toh kibang sim ahi. Tua Bible a Pathian deihdan omte nangmah mimal kainga ahong kigen banga na zak theihna tun Kha Siangthou pina ahi. Muhkholhna (vision) tungtawn bangin leng Kha Siangthou pina kitang thei hi. Himahleh, lungsim a hongsuak teng Kha Siangthou hon theihsak hipahpah khollou hi.
3) A hun in pawkhia (circumstance)- a hun in hon theihsak tungawn in na paina ding lampi kichiang mahmah thei hi. Huai bel, lampi nih a hoih mahmah leh Bible toh kituak a om laiin khat pen hong kikhak a, khat pen hong ki hong chih om thei hi. Toupa' hon pina hi nuam mahmah hi. Huchihlaiin, a haksa leh nuamlou omte Toupa' hon phallouh hi vekpah lou ding a, na kuhkalna a hon etkhiakna leng hi thei lai hi.
4) Nu-el-Pate leh lawm hoihte hon thuhilhna bang leng Pahtian hon pina lampi hi nuam mahmah hi. A tangpi'n, nu-le-pate sanga ei adia a hoihpen, a taktak hon deihsak tam hetlou ding hi.
Toupa'n 2014 sung na hinkhua manphataka Amah deihdan zui a kizang thei ding in A vualzawlna toh hon makaih ta hen, Amen.
