Notes
Daniel 11:32b "Himahleh, mi a Pathian uh thei te bel a hat ding ua, thilhih minthangpente a hih ding uhi" Tuailai Day 2010 ni masa hon zangsak, hun zaleentak hon pia i biak Pathian min phat in thupina tengteng amah i pia hi. Tuni Sermon kidemna a thupi dia heututen hon telkhiak uh "Gospel Centanery Ban ah Bang..." chih ahi a, kidemtu mi 11 te apan kigen etdan tuamtuam i ngaikhia khinta uh a bukim kasa mahmah hi. Tuhun, hun poimoh mahmah ahi. Gospel i gam leh i mi-leh-sa laka hong lut kum 100 chinna ahi a, Jesu Khrist mi khialte tan dia Leitung a hong paina kum 2000 vel chinna Millenium, ahih banah, 21st Century a lut-tou i hihtaak man in tu hun tuh poimoh in crucial mahmah hi. Tuhun a hun paisa i etdan a dik-kei ngeingei leh i mailam hun a dinga i panlak dan hong diklou ding hi. Kum 100 paita sunga i laka thil tungte i etdan ah i maban hun ding kinga lian mahmah hi. Huchi bangin kum 2000 paita thiltungte i muhdan a dik-kei leh i mailam hun ding i muhdan a dik ngeikei ding hi. Huai mah bangin, kei ka ki theihdan a dik kei leh tuh midangte laka kaki zatdan dik ngeilou ding a, gahsuang ngeilou ding leh lamzang ngeilou ding ka hi. Ahihleh, huai etdan dik i chihte bang a teh ding, bang measuring tape zang ding! Bang value system zang ding chih ahi. Nang a dia dik mahmah midang adia dikpen kholou dei voi, huai ziaka, i tehna vanzat ding in tuh Pathian deihdan i zat a ngai hi. Tuabang ahihkeileh bangzah ta in ki lamtou mah le'ng i lohching ngeikei ding hi. Ken ka hon gen ut tuh "Gospel Centenary banah a bul kipan thak ni" chih ahi. Lets Start a New Beginning! Jesu'n abul ana pan khinta, Gospel i gamah kum 100 paita a hong tungta, tun a bul ah pan thak ni. A bul kipan thak ut tengteng in khut lik, hoih ei. A bul kipat thak nawn na dia poimoh nih i gen lai ding: 1. Pathian Theihna (Knowing God) i et thak ngai hi. Pathian theihna ichih chiangin, Pathian i theihdan, Pathian i muan dan, Jesu Khrist a Pathian i ginna, aihkeileh, i Pathian thu etdan te genna ahi. Pathian tawh bangchi'n iki zom a, Pathian tawh tonkhawm hinkhua ni zang hiam chih kivel a, koi mun peuh ah om mah le'ng tua Pathian thu in hon thunun hinkhua i zat a, Pathian deihdan kia a hing hinkhua i zat chiangin i Pathian theihna hong dik ding hi. 2. Kipahna dan thei di'n kipanthak ni. Toupa Pathian in hiai tantan hon pi a AMah tungah kipah dan thei ding leh kipah dan siam din ki bul patthak ni. Tua mah bangin, nu-leh-pate tungah leng kipah dan thei din ki bul pat thak ni. Nam maikaite leh sahkhua heutute tung ah leng kipah dan thei din ki bul pat thak ni. Ki iiplah tuahna hiam, ki hawm thawh tuahna leh ki deihlou tuahna hinkhua te'n koimah tan hon tun tuanlou ding hi. Tua sang mah khat leh kaht tunga kipahdan siam din a bul kipan thak ni. Toupa Pathian in hun thak a, kibul pat thak nuam te tengteng a vualzawlna hoih pen in hon vuk chiat hen aw! @August 16, 2010, EBCC Delhi
