EBCC, SHILLONG BIAKINN HONNA LEH LATNA NEIH HITA
-Upa G.Khamgoupau
EBCC, Delhi
February 26, 1999 a phuhkhiak a om EBCC Shillong saptuam in kum 16 sung vengveng midangte Biakinn khel a Biakna lohching taka aneih nungun August 1,2015 in eia mahmah Biakinn honna leh Pathian kianga latna Rev. S.Vungminthang, General Secretary, EBC, Dorcas’ Hall in mipi 1000 phialte maiah neita hi. Saptuam kipat chila panin mahni Biakinn neihdi lunggulh in Hqr toh pangkhawm a pan alak nungun December 13, 2008 in 9072 sqft. a lian gam Dongparmaw, Lapalang ah Toupan honpia a, Rs.27, lakhs beiin kileikhia hi. July 26,2009 in Rev Paukhanmang, Director(I), EBC in Ground breaking neiin August 21,2010 in Rev.Khamkholun, General Secretary, EBC in Foundation stone laying nei hi. Architect leh Engineer guaiin drawing bawlsak ahi a, huai September 2010 apat March 2011 kikal in bangzahvei hiam Building Committee leh TBSUC in etkhawmna aneih nungun pomna (approval) piain May 25,2011 in Foundation khuamkua khuakna kipan hi. Hiai Biakinn lamna a tuni tana kiseeng report dungzuiin Rs.1,38,31,538/- phazou hi. Hiai tuh agam leina banah tua asunga vanzat Bench pulpit leh adangdangte telin ahi. Huai lakah Hqr in grant dana apiak 59 lakhs ahi a, mundang a saptuam leh mimal a kimu Rs.7.96 lakhs phazou a, adang teng Rs.71,35,538/- Shillong saptuamte thohkhiak ahi. A Biakinn Ground floor ah Sunday School leh Caretaker Qtr. ahi a, 1st floor pen main Chapel (Biakinn) ahi. Balcony le gallery type ah mi 100 tan tuttheihna dia kibawl ahi. A Biakinn sung capacity 400 ahi a Balacony a 100 toh 500 khatvei a kikhawmthei chihna ahi. Tulel in EBCC, Shillong milip 800 vel ahi. Hiai Biakinn a structure tana contractor E.W Warjri, 1st Class contractor ahi.
EBC Hqrs Dorcas Hall apan General Secretary banah kei telin Delhi apat Pastor G.Kamzamuan, Local Pastor, EBCC, Central Delhi te nupa leh Guwahati apan mi 30 vel, huan Lamka apan Upa T.Khupkholal (Upa nasem masate laka khat), Tv.H.Thangkhokam, founder TBSUC member ten hiai Biakinn honna hunseh kava uap thei ua banah Shillong khopi sunga Church leh Fellowship tuamtuam apan leng Pastor leh Upa hunkhop in honguap ua, taksa kia a hongtel louin saptuam vanzatdi poimoh hong present uhi. Huan, Lamkajang a saptuam khenkhat apan sum leh pai deihsakna leh laithon hunkhoptak om hi. Muntuam apan vahohte adiakin thaunilhna tangte (Pastor/Upa) te deihsakna puanza liangbat ngahchiat ua, huan Shillong saptuam tuni tana anakem kha Local Pastor leh founder TBSUC teng kiangah pahtawina (momento) piak ahi uhi.
Hiai huna Rev Vungminthang, in a thugenna ah tanchinhoih ziak liauliau a hichitan tung ihihdan leh huai tanchinhoih i liangkou a kinga i piaksawnna munpi hidia adeihthu leh i saptuamin tulel a i poimoh (priority) tuh Biakna detdoutak neihdi huai sunga halhna (revival) mu a tangthupha genna nasep i sutzopdi ahihdan gen a, iki sinsakna chialpi leh pianthakna tanlel a i khosak hunnawnlou ahihdan gen hi. Huan, nidangin matric/BA zouloute leh job muloute adia ikoih hunbit a Pathian nasepna tuni chiangin khangthak tampiten teelzaw uh ahi chi hi. Huan, i minam sunga tanchinhoih (gospel) ana chatvaihpih Evan. Thangvang te Rev.Nengzachin leh Rev T.Jamkhothang te ngaihsang huai uh ahihdan uleh amaute toh kisai tangthupha ingahna tanchinte a genkhak a aomlouh uh poi asakthu hiai hunsung a thugennate ah tanglang hi. Aman August 02,2015 in hunpi nih BYF kikhopna (hiai Biakinn mahah) leh mipi Biakna hunte ah thugenna nei hi.
Toupa hehpihna ziak leh hondeihsak mimal saptuamte thumpihna ziakin keile hiai programme ah kava kihelthei a, hampha kakisa hi. Delhi apan train a paiin August 30,2015 in keikia in kaki pankhia a, khatveivei “keilou ale zaw hithei lawdi hi a” chihbang ka ngaihtuah zel, himahleh hiai Shillong saptuam kepna leh Biakinn lamna dia tha leh zung ngaihtuahna sengkha samte laka khat hihna ziakin tel himhim hoihsa in kava kalsuan hi. Huan hiai kalsuanna a ka theihthak khat tuh Toupa gama dia kalsuan ichihte khovel mite ngaihin haihuai abat ton om mahleh Toupa honpina lam tuamtuam a ngahna ahih manin manpha kasa a, Abraham bangle Toupa sapna dawnga a kuankhiak laiin hai akisak or miten haisa uh himaithei maw? himahleh Toupa hoihna/muanhuaina leh vualjawlna angahna bulpi anahizaw hi. Huaiziakin Toupa gam nasepna ah kidangkoih hetkei ni. Gennadi munte a genin sepnadi munte ah semin kalsuankhiak angaihleh kalsuan in kizangni, eimahin pan ilak (initiative) keileh kuama’n honsawl lou dia, i hinkhua hongbei maimahdi ahi a, semkhalou suakdi ihi. Mite honsawl/honseh ziak kia hilouin “kei kakiman hi (I’m available)” chithei chiat dingin simtu tengteng Toupan hon makaih chiat hen!
***
