SAPTUAM A COMMITTEE MEETING PAIZIA
(Meeting procedures in Church Committee)
By- Upa G Khamgoupau
Thupatna:- A theipen zaw kahi hetkei, himahleh Saptuam a vaihawmna kahiang tuamtuam leh makai kisinsakna tuamtuam a telkhakna banah EBC Saptuam a Vihawmna sangpen Kumsim Khawmpi a kum bangzah hiamtak kana kihelkhakna tungtawn in Saptuam a Vaihawmna paizia chih thupi zangin tamlou kahon gelh hi. Committee khatpeuh a member hihna teelthoh hiam sehthoh hitaleh Pathian seh dana ngaia kithalawp taka sepkhiak tuh gingtu khat hihna a i mohpuak ahi.
Saptuam Vaihawmna bang ahia:- Saptuam vaihawmna tuh khovel vaihawmna ahikei chih theih masak poimoh hi. Tua ahih manin, Committee member chihin i tuppen tuh eimah hoihsak/deihdan himasa louin thumna leh kikupna hoihtak neihna tungtawn a thupukna lakding tuh Pathian deih hingei dingin ium hi. Tuni chiangin Committee tuamtuam a thupukna ilakte tuadan ahi ichi hia? ahihke’h kikupna hoihtak leng omkhollou, apauthei deuh member 1/2 hoihsakna khonga kikai hihkhak ding pilvanhuai mahmah ahi. Adiakin Chairman hihna dinmun lenkhate a dingin pilvanhuai diak hi. Mahni hoihsakdan kia khong gengen in tuadan a thupukna lakpih sawm teitei chih omthei mahmah ahi. Agenda khenkhat bangah memberte ngaihdan hoihtak theimasa loupi a koisan hiam a commitment vabawl theih mawkdan ahi. Huaidan ahihleh chidam huai hetlou ding hi. Khovel vaihawmna Parliament khonga debate akineih chiangin ruling leh opposition kalah kiselna nasatak omin a deihlou lamte bangin sukbuai bang sawm uhi. Saptuam vaihawmna bel democratic taka pai ahih laiin tuadan a kisel kinak chihte omdia lamet ahikei hi.
A deihhuai thupukna lakdidan:- Saptuam Committee meeting pen atangpi in thupukna ladia sap himahleh thupukna lalou thei ahih leng theih poimoh mahmah hi. Adiakin policy matter toh kisai issue crucial deuhte ah atleast one month advance banga agenda circulate masak hoih hi. Member ten a ngaihdan uh hoihtak agen theihna dia hunpiak ngeingei ding ahi. Chairman hih mana mawk paupau ngaihdan mi khatin agenkhit tenga comment pahpah chihte chiin louhdi ahi. Huchibang a memberte ngaihdan lakkhit chianga thupukna bawldi tuh Chairman basic responsibility ahi. Ngaihdan gum tamzaw chihman a thupukna lakpah le zaw ahithei na a diahzek banglepoilou ahi. I thum lai dia thupukna meeting nawn chiah ila mai diam chihbang ineihleh akikhelthei thil ahihke’h poikhollou ahi. Banghiam routine matter leh administrative approval piakdi chihte pawl ahihleh lak pahpah poilou a ngaihdan bangle vagen duanduan le ngai khollou ahi. Amah tuh Chairman hiin memberte hileh pre-concept mind neia thupukna influence sawm hetlouhdi ahi. Saptuam mipite leh Pathian tunga accountable ihi chih i phawk gige poimoh hi.
Meeting hun:- Adiakin khopi khongah meeting sap kichi thil haksapi ahi. Huchi ahih kawmin Saptuam lian deuhte ah tuh khakhat a khatveibek meeting neih hoih hi. Huchibang meeting pen Saptuamin Office/meeting room ineih nakleh mimal inn sangin deihhuai zaw hi (mimal inn a lemtanzawk laiin), aziak tuh thukikupna pen insungvai ahi a, sang simsim a kiseelna bangle omthei, gensawn dia hoih khollou bangle omthei ahihna ah numei naupang zakbatna munte deihhuai khollou ahi. Huan memberte adia hunlemchang pen sawmdi ahi. Delhi khongah atamzaw sepna nei ihih manin holiday khong deuh suamin hitheileh a deihhuai hi.
Kisakkholhna:- Kisakhawl loua meeting sap/tel chiin hetlouhdi ahi. Agenda te Chairman & Secretary in hoihtak a ana kikup ua ana digest masak uh deihhuai hi. Tuamah bangin memberten le ngaihdan mumal leh kichiantak saulou a genthei dia kisakkholh poimoh mahmah hi. Kikupna/ngaihdan genkhawmna omloupi a hichi’n thupuk ni uh aw chihsuk mawk khong chiin hetlouhdi ahi. Thilhoih mahmah a itheih ahihleh leng member 2/3 beek ngaihdan gensak loua thupukna lak hetlouhdi ahi. A poimohpen tuh thumna ahi. Thumloupi a meeting neih/tel hoihlou ahi chih BOT Chairman a sawt pangpen Upa G.Thangchinlian in khatvei houlimna khatah gen hi. “Sepna ziak khonga buailua, kisakhawl manlou, thummanlou a meeting katel/preside chiangin meeting paihoihlou leh aw sangtak a kiselna tanpha atung ut mahmah” achih kathei gige hi.
Memberte ngaihdan gen hun:- Ngaihdan neihetlou kahi chih ahihleh thutuam, ngaihdan genhun a vagen tei tuh as member a i mohpuak ahi.
Himahleh agenda khat a mi khat 2/3vei ding tuantuan chihleng hoih hetlou hi. Huaiziakin member ihihna a mohpuakna masa tuh ngaihdan ineihte agenhun a vagendi ahi. Mun tuamtuam ah kuate kiang hiamah inagenta/ina gelhta leng ahi maithei, himahleh meetingna mun a vagen tuh apaididan ahi. Huan ahihtheih liaileh eimah mimal naate nusia a hiai meeting ngaipoimoh tak leh Pathian nasepna a mohpuakna dana ngaia telzel ding ahi. Khenkhat mimal naa ziaka telngeilou, telthei dia manthei hinapi a thildang paulam zongzaw chih leng omthei ahi. Hiai dia mipi tungtawn a Pathian honseh ahi chih i manghilh hetlouhdi deihhuai hi.
Thukhitna:- Saptuam chidam i neih theihna na dingin meeting chidam ineih leng poimoh a, hiai meeting hunpen Saptuam vaihawmna toh kisaia poimoh lianpen khat ahihna ah member hilel leh honghizel dingten athak a i ngaih poimoh semsem uh deihhuai sain huaidi’n ikingeen hi.
….
