BAPTIST WORLD ALLIANCE DAY Presentation
Pathianni, 1.5.2011, EBCC Biakin, Delhi
By- Upa T Kaithang
Tua i theih Saptuam bang huna kipan ahia?
I Toupa Jesu Khrist thupiak dungzuia tup kichian neia kipawlkhawmna hong kipat hun hi pawl khenkhatin Penticost ni ahi, chi mahle uh, Laisiangthou hon hilh danin i Toupa Jesu Khrist-in Amah nungzui leh sep ding a chihte sem dia mi a telkhiak akipana hong kipan a hi. Amaute leh midang bangzahhiamte Khasiangthou ngaka Jerusalema thumkhawma, kipawlkhawmna nei khin hi uhi.
Baptistu Johan akipan saptuam kipan ahi hiam? Baptistu Johan nasep poimoh mahmah ahihleh Hondampa hong pai chianga mite kigingsaa a om theihna ding ua Kisikna thu leh Tuia baptisma hon pua ahi.
Toupa’n nungzui dia a sapte leng baptisma tangte hi ngei dia theih a hi uhi.
Sawlte nasepna tungtawna Judate gingtute laka a telna ding ua kiphamoh masa ahihleh baptisma ahi hi.
Tua Saptuam masa Baptist saptuam a hi hia le?
Baptist min nei zaw hi kei. Himahleh thugin leh kizatdanah Baptist saptuam i chih himahmah ding hi.
Baptist Saptuam chia i theihte bang huna kipan ahi ua?
Kum 1641 laiin London khopi sunga Southwark venga Jacob Church akipana pemkhia pawlkhatin laisiangthoua kigelh dungzuia tuiphum baptism amah dikpen hi, chite akipana Baptist saptuam i chih hong kipan hi dia ngaih ahi. Hiai hi Rochester Baptist Seminarya Augustus H.Strongin kum 1904 a a gendan a hi, kichi hi.
Baptist World Alliance
Leitung pumpia Baptist saptuam omte leitung buppi huapa kimukhawm poimoh ngaihna America gam leh England gama omte ngaih poimohna kum1904 in Saptuam thukijakna tungtawnin genkha ua. Great Britain Baptist Union hiai thu poimoh sain July 1905 a Baptist Congress/Khawmpi kaihkhawm ding kithukima nei uhi. 1905 Khawmpi hunin Baptist Worl Alliance hong pian theihna dingin Constitution gelh ua. Hiaiin a tuppen ahihleh Pathian hehpihna tangte Toupa leh Hondampa Jesu Khrista pumkhat hihna kilawmzawa taklang ding leh amaute hihna kembit kawma biakkhawmna, sepna leh semkhawm dia kizopna pichingsak sem dingin Baptist World Alliance leitung pumpi huap kha phuhkhiak ding kithutuak uhi.
BWA Khawmpilian Congress chih ahi dinga, kum 5 hala Congressa kimuhkhawm dingin kithukim a hi. Himahleh khovel pumpi huapa buaina thupi khawngte ziakin Congress 20 vei kizang hitaa.
EBCC leh Baptist World Alliance.
Tunia EBCC i chih kha nidangin Manipur Convention Church chia kipan a hia. Hiaileng Evangelical Convention Church chia min thak piakna hong om nawna.
Hiai minte i puak laiin mimal leh saptuam lama heutute’n mite dotna “Nou bang saptuam na hi ua? Baptist hia, Presbyterian hia, Methodist hia, Pentiecostal hia?” chihte tuakkha zihzeh ngei dingun ka gingta hi. Mahni kiaa ding thei, mite khuta kinga lou, chih bang thupina khat himahleh Saptuam lianzawte toh kizopna omloua va tuam om leulauh leng lam tuamtuamah fellouhna om tham hi.
Hiaite i genkawma genlat dia hoih: Saptuam thuginpite hiaite a hi:
a) Laisiangthou/Biblea sunga laibu 39 leh 27te Pathian hatkhiakte ahi ua, a veka dik(dikou omlou);
b) Pathian hing leh dik khat oma, hihna thum Pa, Tapa leh Khasiangthou a hi.
c) Siamchilna(Creation) om leh dik mah hi.
d) Vansawltak, Pathianin a siamsa tampi om.
e) Setan, Lucifer, mihinna tuam nei, kehlhna omsakpa, Pathian melmapa om hi.
f) Pathianin amah kibatpihaa bawl, deihtelna zanga Pathian niala ana gamta, mikhial a hi.
g) Hotdamna, Pathian hehpihna hanga thawnpiak ahi, huai leng i Toupa Jesu Khrist sisana hotdamna a hi.
h) Pathian siangthouna tanpih dia sianthousakna tangte i hi.
i) Pianken nih nei ihi- Salam leh Khalama pianken nei ihi.
j) Saptuam – Thukhun thak sunga saptuam nih oma, tualsung saptuam leh leitung buppi huapa saptuam om. Saptuam lu-pen Toupa Jesu Khrist ahi.
k) Thusehte – Baptisna leh Toupa Nitakan
l) Toupa Ni/Pathianni- Nipi kala ni masapen, i Toupa thohnawnna ni.
m) Khrist hongpai nih veina – Rapture leh Toupa Jesu Khristin David Kumpigam kitungkeh nawn ding, Setan tangtawn meidila paiha om ding.
n) Thohkikna leh Tangtawn Vaihawmna om ding.
Tua i thuginpite koppih thei Saptuam kungpi kizoppih dingin ECC ihih laiin Baptist World Allianceah member hihna kingen ngeia.
1998a nam kikala buai laiin BWA General Secretary hisek Denton Lotz Imphala Manipur Baptist Convention officeah honga, huailaiin i saptuam heutute leng amah kimuhpihin kuan ua, BWA GS in “hiai saptuamin BWA a lut ding hoihsalou na om uhia”chih pen kuamahin dawnglou ahihman un, a kumnawn 1999 kumin Dresden Congressah BWA leh Asian Baptist Federation membership hihna piakin i om uhi.
Tulaiin BWA membership hi pawlpi 214 hia, huaite sunga mimal 370,00,000 khawng pha dia gintak ahi.
Baptist World Alliance Day
Kum 1924 kipan BWA Day chiin ni 1 bikhiah tuamin leitung pumpia Baptist saptuam sunga kithumpih ni ding bawl ahi. Hiai hunin sum-le-pai, neih-le-lamte piakkhawmna omin, panpihna nasepna leh huhna lama kalsuanna leng om hi dingin i gingtaa. Tukum BWA Day adinga thupi telkhiak a om ahihleh “Pathian Kha toh kitona pai” chiin Luka 24: 13 akipna Emmau Lampia Paina akipan lak ahi. Hehpihna leh Toupa adinga hangsanna toh thilhoih hihna tungtawnin haksatna leh mangbatna dinmuna omte lametna pia hi.
