Mohammadpur Tuailai Lapawl kilawmtak hong kilem i ngaihkhiak leh a lathu genban nai zejen lou in leng hon khathou sak mahmah hi. Suut a ngaihtuahna i piak zek nak leh zaw Pathian' hon vualzawlna muhtheih leh zak theih leng ana tam veh e! Veng tuamtuam a kibinkhawmte lungsim leh taksa mun khat a i om khawm chiang un i hih peuh i gen le sak peuh kilimsuah in lungsim leh thatawl damna bang hontun thei a, huai a hong luanglet kuahiam khat le nih ading in khalam & salam vualzawlna ana hi sawn lai thei lua hiding hi.
Hun leh kum hong pai liam in athak, alui hong om jel a, i hinkhua leh khosakna leng tuabang a paltouh jel ahi chithei a om bang leng vualzawlna i ngah zel chihna ana hi lim in. Nidang a hihdante hihdan lui a hong hihtheihna bang le hihdan thak a hong om ziak ana hikha thei uhi. Tuailai lapawl zil ding a Ningani biakinn dak gin chiang hiam, koi hiam a kinaihkhawm vek chih bang hihdan lui houh hong hita amai diam chih in a om hi. Tuchiang in tuabang hithei gige nawn lou bang ana hikha tamahleh, mahni omna vengveng a - innkuan, tuailai - prayer cell tekhawng tungtawn a hunbi nei a kithuahkhawmna nei thei jel a i om theih bang kipah nak omlua hiin. Huchi a vekpi a hihtheihlouhna mun a leng a hun leh mun lemtang kizon a, lapawl kilawm tak i lep theih zel intuh, Nipini teng in veng khat khit khat lapawl bang neihtheih mai leh kilawm sak in a om hi.
Tua kia hilou in, biakkhawmna (corporate worship) ngai poimawh a, tuailaipih lawm-le-vual, insak-inkhang toh, lam tonkhat a tonkhawm theihna ding BB (Biakinn Bus) leh BBB (Biakinn Bus Bulletin) khawng hong pian theih zel khawng, omna veng kikhop a labu zattangjang ding ana ngaihtuah leh bawlsuah pawl omte khawng i ngaihtuah leh, saptuam a tuailaite phattuamna thupi dan leh phathuai dan muh semsem in a om hi. Siat leh gentheihna tuamtuam om reng thou mahleh, hiaite khawng a kibuaisak lingling a i om theihna mah, vualzawlna naak ana hi toutou khat le houh hilim lou ding amaw chi ke. (September 25, 2010)
