TUAILAI 2010 Khawmpi, ‘Xtramile for Christ’ chih thulu toh Ebenezar Academy huang ah Dec 2-5, 2010 hunsung manphatak mai in zat in om hi. Delhi BYF leng hun piak a om chih a kitheihin Delhi BYF Committee lemsakna toh Tuailai 2010 (T2010) a Delhi Tuailaite ai-oh a telding ten sum-le-paai poimohna bangbang a zatding Budget Rs.3,000/- guan leh piakkhiat in om hi.
Kisakkholhna: T2010 uapa paithei dingte min lakkhawmna Oct 17, 2010 a Tuailai Day apan kipan hi. Nov 2nd Week sung vel in, a laa thu, laa kaih leh music toh thuah in recording bawltheih in om hi. Hiai Music pansan in Nov 14, 2010 in EBCC Delhi kikhop tawp in Tuailai mi 10 lak ding ten ‘Etsakchiin’ zilna kipan hi. Hiai ban, New Lamka a Pa Zoulian Guite te’ inn bulbawl in, huai mun ah Nov 30th, Dec 1st & 2nd nite in Delhi BYF min a ‘ETSAKCHIIN’ ding zilna kinei tou den hi. Dec 2nd nitaklam in inteekte siamna toh neekbawl in om a, hiai hun ah Delhi Pastor V Nenglian leh Evan Pauzakham ten leng ankuang hong umpih uhi.
Delhi BYF Hun: T2010 Honna Dec 2, 2010 nitak dak 5 a kipan in, Delhi BYF in huai hun ah, special item masa kitang in, music toh kithuah ‘Etsakchiin’ lahna kineithei in, Pathian min i phat ahi. Huai banah, Dec 4, 2010 nitak programme ah Delhi BYF in comperes hihna toh inteekna leng la hi.
A bultung a mi kingah zoulou ding bang in patauhhuai sim mahleh, Pathian in a hun bang zel leh a poimoh bangzel a honpi in, Etsakchiin hun a kihel teng kia lou, T2010 uap Delhi Tuailai hunkhop leng kiom lai hi.
Etsakchiin: Delhi BYF Etsakchiin in ‘Akidang Ngeilou Pathian Thu leh Setan khemna Tuamtuamte Enchian din Laisiangthou Pansan in Kalkhat Suanbeh Ni’ chih kawk hi. I pupa hun, tuhun leh hun nanung a Pathian leh mihing kala setan panlaknate etchian ding ahihdan, a thu laa a sa in, a lem chiin thoh ahi.
T2010 a Project Nehemia: Delhi BYF in project a i neihleh ‘Project Nehemia –II’ a dia kibawl Ball Pen zuakna ah Rs. 1,917/- muh khiat in om hi. Honna leisak tengteng tung ah kipahthu i gen hi.
Tuailai 2010 hunzeekte: Praise and Worship Team ten Laa lam thaneh tak a pii in, Pathian phatna nuamtak mai toh Rev. Sam Hoffman, YWAM, Rev. L Kham Kho Lun leh Rev. K. Kamchinkhup ten Pathian thutak luina hunpi zang in Kikhopna te manpha thei mahmah hi. “Setan in milim thanghuai etna, nu-pa thangtatna, sumle-paai a ginomlouhna leh khamtheih a kibualna te zang in tulai Khristiante hon bei a, huaite dou zou ding a nasataka panla in, anngawl a thumna toh Laisiangthou thute pansan a Khalam Galdou ngai ahihdan” Sam in nasatak in gen a, tampite leng kilankhe thei uhi. Halleluiah! Huaibanah, Rev. K Kamchinkhup in tulai a internet tungtawna ngaihdan i gelhte uh Laisiangthou en leh kituak a gelh i hina hiam? chi’in, a minthang 9/11 lehbulh in Eklijiasti 11:9 na Tuailaite hon vaikhak hi. Hunpaisa a Tuailai Khawmpi tuamtuamte khawng a Pathian gam nasem dia ana kipekhia, tulela mission field tuamtuam a semte apan Special Talk hun nuamtak zatzel in om a, hunpaisa a i Khawmpite uh a gahsuah tampi muhtheih in om hi. Huaibanah, ‘tulai toh kituak’ ding Seminar tuamtuam hun leng zat in om hi. Dec 5, 2010 sunnung in Gospel Centenary 1910-2010 hun zat in om hi. Veng, Khua leh Division tuamtuam a Tuailai pawl te apan Lapawl leh Special Item tuamtuam tungtawn in, Pathian pahtawina hun kilawm taktak zat in om hi.
Pathian gam kekletna din TUAILAI 2010 gahsuah in om hen!
Click here for photographs.
