Sunday School Annual Revision

Tuni November 7, 2010 BCD ‘Sunday School Annual Revision Day’ chia heututen hunseh honbawl uh kipahhuai ka sa hi. Huan, Sunday School devotion hun a short message pedinga chialna Upa Chinsum, Superintendent hon gen banga noute toh hun zang thei a ka om manin kipak ing.

2. Revision (etkikna) I chih chiangin bang hon ngaihtuahsak ale? Etkikna, ahihkeileh kitheihthaksakna chihte mihing hinkhua a dinga lohchinna dia step poimoh ahi gige hi. Thupil in “unexamined life is not worth living” ana chi hi. Ahitakin tuh, ei mimal hinkhua ah leng phawkthak leh etkik/ etchet thak kilawp khollouh hunte zaw, kiakniam hunte bang ana hi nuam mahmah hi.

3. Tuni a annual revision I neih toh ton in anuaia thute phawkthak ni hang:

i. Tup-le-ngim (set goal) neia pai I hi: Sunday school pen nu leh pate Biakinn akai ziak ua, time pass maimai dinga, vatel hilou in tup-le-ngim kichiantak nei a pai I hi chih phawkthak ni hang. Sunday school class tuamtuamte’n laisiangthou thutak pansan a bawlkhiak zillai I neichiat uhi. Hiai I sinlaite tup-le-ngim tuh “Naupangte Jesu kianga pi” ahi. Huaiziakin, heutute hi’n naupangte hilehang I tup tung I kisana uhiam? Hiai goal I tuntheihna dingin Sunday school ah hunseh poimohtak nih Devotion hun (Pathian maia kilat khiakna leh phatna), huan classroom teaching te I nei uhi. Hiaite banah, I kihih halh leh kipolhlimna (entertainment) danin activity tuamtuam, Outing, Picnic leh Games etc. I nei jel uhi. Sunday school in atup pen limsak loua, hiai entertainments programme te kia focused a I neih leh lohsam kha ding I hi.

ii. Tup-le-ngim te tunna dinga I phakna chiang tehtheih (measurable) ahi: I tup pen tun theih ahi, huan I tunna chiang leng I teh theih ahih kiphamoh hi. Sinsaktu I hihna ah naupangte bangtan I tunpih ale, eilam pang ah thumna, kisakkhawlna etc. poimoh bangzah tehtheih I nei a? Huan, naupangte’n leng Jesu Khris theihna lamah khanna leh masawnna bangtan I ngah ua?

iii. Tup-le-ngimte ngahna dinga pan lakbehna ding omte velthak ni. Tua I paidan leh hihdan, huan hihnate I tuppen ngahna dingin ahun tawk hia, huntawklou I sak leh banglam apan lakbeh ding ihia, chihte ki-etthakna hun hileh chih deihhuai hi. Abiiktakin, senior pawla om tuailaite bang, kum hongthak leh bangzah hiamte Sunday School graduate a pawtkhia ding I hihna uah, noumau mimal in bangtan nopsakna/ lohchinna na ngah ua, chih kia hilou in, nou bana hongpai ding naupangte ettawn ding bang nutsiat theih (legacy) I nei ua le? Sunday Schoola kum 14/15 I zat nungin midang te’n bangchi’n honthei ua?

4. Sunday School in a tup-le-ngim (goal) pen ei mimal hoihna leh lohchinna ding kia hilou a, Pathian deihdan hih buchinna leh Amah min thupi nadinga nasep ahihdan phawka, kuhkal leh muanhuaitaka I pan chiat ding uh ahi. Mihing I hihna ah, huan, tuailai/ naupanglai I hihmanin, khatveivei thadah/ peihlouh leh lunglut louh hun bang hongom tham ding. Himahleh, hiai hunte ah leng kuhkaltaka I pan teitei ding uh ahi. Thupil in ‘No pain, No gain’ ana chi hi. Tup-le-ngimte tangtuna, lohchinna ngah theihna dingin, lunggulhna (passion/burning desire) tuptintenna (determination) huan, kithalopna(strong enthusiasm) neih ngeingei ding ahi.

a) Lunggulhna: Tup-le-ngimte tangtun utna leh huaite mahmah tangtun ding lunggulhna vungvungna (passion) I neih ding uh ahi. Half-hearted effort in bangmah lohching lou ding hi. Anuam leh utdan chiang lel sepin lohchinna taktak om theilou hi. Kumpi David in “Toupa kiang ah thil khat ka ngen a, huai mah ka zong ding hi.....”(Sam 27:4) ana chi hi.

b) Determination: Goal setting I bawlte tangtunna dingin kuhkalna leh chihtakna poimoh hi. Daniel in Kaldai kumpi innsung nuamtaka om a, deihsakna leh facility bukimtak ngah thei dia a om laiin, amah hihna (Pathian chitel/ siamsin) kiphawk gige a, huaiziakin, kumpipa nek-le-dawn lim taktakte a kihih thanghuai lou dingin alungtang in atum chiilteel hi (Daniel 1:8). Eite leng Pathian tate I hihmanin, hiai bang thil chiin hoihloute apan I kikepsiangthou ngeingei ding uh ahi. Ahaksat hun aleng I tupte lohchinna ding ahihnak leh I pan teitei ngam a, kidek angaihna muna leng kisumzoh ngai hi. ‘Anuam kia sem nuam mi adingin abaihlam a om thei kei’ chih thupil phawkthak nihang. Pathian hoihna I tanga, tu chiangchiangin, thil bangkim anuam leh abaihlam thei dia bawldan I siamta uhi. Huan, I tenna inn sungte ngei ah leng I deihbang muhtheih/ngah theih tampi omta hi. Himahleh hiai nopsakna/ comforts zatkhelh theih ahi, pilvang ni hang.

c) Kithalopna: Thil peuhmah I hihchiangin, kithalopna (enthusiasm) toh hih ding ahi. Heutute hon sawlziak, ahihkeileh, I nu-le-pate hon sawlsawl ziak lel khawnga hih maimai I hihleh, kipahna I nei kei dinga, huan tup-le-ngim ah leng I lawhching thei kei ding uhi. Huaiziakin, ‘kipak kawmin Toupa na sem unla… .. chih Sam laibu a ah I muh bangin I hih peuhmah thanuam leh kilawptakin hih chiat ni. Hiai kithalopna koi apan a hongpiang ding hiam I chihleh, mihing deihna banga sem mai hilou a, I thilhih pen Pathian deihdan, Pathian min thupina dinga leh Amaha muanna nei a sem I hihdan phawk gige ding ahi. Huaiziakin, Paulin ‘Hiai thuchiam ngah dinga Pathian hing tunga muanna I neih man in, I semgima, I thuak teitei ahi’ ana chi hi (I Tim 4:10).

Hinkhua lohching leh lunggulhte ngahchiat dingin I kideihsak ua, hiai vualjawlna Laisiangthou thu I sim ding; “Toupa’n na lungtang lunggulh bangbang honpia henla, na thil tupte hon lawhchingsak hen”(Sam 20:4). God bless you all. Ka kipak.

[Note: BCD Superintendent hihna kum paita a na len Heutupa Ngulminthang in, ngetna banga BCD Devotion 7.11.2010 a hun hong zang thei a, hong thugen manphatak kepbit theih dia hon gelhkhiak sak zawkmah lai man in BCD te kilungdam mahmah hi. Praise the Lord! –Suptd.].