PUNJAB (BATALA) FIELD VEHNA
 |
EBCC Delhi apan a kuankhe masa mi 5 te’n April 19 ni’n Punjab a Batala mun, EBC & FMPB in Partnership a mission nna i sepkhawmna mun uh, manawh in Delhi ka nusia uhi.
Dak kal 10 vel ding Taxi (innova) a pai in Batala town a om FMPB missionary Pastor John Singsit leh a sungkuante’ kiangah nitak 10:30pm in ka tung uh a, nitak ann limtak ne in tawldamna hun kizang hi.
John te inluahna ana kisuan uh a, inn kilam khin nailou, hall lian simtak tawh kithuah ah ana teng uh a mun kichingin nuam kasa mahmah uhi.
April 20 zinglam dak 10 velin, breakfast ne zou, John seppih native evangelist khat, Evan. Sohan Singh kichi, omna manawh in ka pawtkhia uhi. John in amah nuai ah native missionary 4 nei hi. Evan. Sohan omna John te in apan mel 20 val dinga gamla Kanwan kichihna mun ahi a- Kala Bala leng kichi hi, lampi lianlou khat zuiin sawtkuam gari’n ka tai uhi. Amun kava tung uh a amun a om te’n kipaktakin honna vaidawn uhi. Theitui (cold drink) dawn ding hon pia ua, kihoulim in hun nuamtak kazang khawm uhi. Huchih sungin, inkim a gingtu om mi tamlou (8vel) hong pai khawm ua, amaute thumsakna hun kazang uhi. EBCC Delhi apan zinpaak (bedsheet set) Sohan khut a piakna nei in, huai kiim a gingtu mi nihte inn ka pha thei ua, thumsakna hun ka vazang tuaktuak uhi. Amaute teenna inn bel teklei (bricks) ngen a bawl hi a, lou ching lian pipi hal a inn nih/thum bang ana om jel ahi. Thumsakna ngaina thei mahmah uh a, thumsak lou a paisan theih ding vual hilou uhi. Amaute bel Lou neimi hausa taktakte’ lou enkoltu ahideuh tangpi uh.
Nitakin Satsang (open worship) program zangdi’n kakisa uh a, 7:30pm in Dakla mun ka tung uhi. Amau PA system ngaihtaktak zangin laa ngaih taktak a sa in kikou mai uhi. Microphone tawi kikhel in lasa nilouh mai uhi. Kou bel dak 9pm velin hall sungah kalut pan uhi. Huchi’n 10pm vel dingin John in Field veha kuante hon mellah in native missionary mi 3te kiangah kou team leader Pa Kamkhanmang in zinpaak piakkhiakna hon nei hi. Pa Biaklun Shoute apan testimony sharing ngaihkhiak in om a, huai zawh in Pastor Nenglian in thugenna hun zang hi. Program zawh in nitak 11pm bang pelta hi. Huchi’n program zanga hong paikhawm tengin ann ne in kikhen siausiau uhi. Hiai kikhopna ah mi 100 vel ding hong paikhawm uhi.
Pathian thu ngaikhe ut mahmah uh a, naupang kum 5-12 kikal ding mite bang a masa gual a tu in kikhop sungteng daidide in om uhi. Lamdang kasa mahmah uhi.
Pathian ni, April 21, in Biakna kikhop Seihwa mun ah zang dingin kakisa nawn uhi. Delhi EBCC apan TBMC chairman leh midang nih te zing dak 10 pel zekin Batala hongtung uhi. Amau tawh kisa in kikhopna ding mun ka zuan nawn uhi. Dak 11:30am velin biakna kikhop kipan a, lasakna sawtpi neih nungin John in field veh a kuante mellahna hon nei hi. TBMC Chairman Pa Vumsuan in hanthawnna thu saulou gen a, huai khit in Pastor Nenglian in thugenna hun zang hi. Kikhop tawp in gingtu tamloute’ inn vehna leh thumsakna nei in sun ann (lunch) hon nekpih ua, huchi’n, FMPB in mun a lei thak lellel uh gal et in John te inlam ah kakiknawn uhi.
Nitaklam 4pm velin John te’ inn ah hun saulou kithuahkhawmna leh kithumsaktuahna hun zangin Delhi zuanin kakipankhia uhi. Dak 5:30pm velin Batal mun ka nusia uh a, lamzang taka pai in zinglam 5am velin Delhi ka tung kik uhi.
Hiai Batala field a i sepna mun uah kikhopna Pathianni tengin mun thum ah nei jel uhi. Gingtu tamlou omte’ tawh kithuah in missionary te’n kuhkaltakin semjel uhi.
Vanzat poimawh khenkhat inverter, power-point projector, PA system chihte kisam mahmah uhi. John in EBC tawh sepkhawmna mun a incharge a om khak kipah thu hon gen thakthak hi. Aman EBC in Batala mun ah mission school pan thei leh nasepna ah nakpi’n phatuam ding chi hi.
Hiai bang nasepna a panla thei EBC mite hampha lua hang. Toupa’n semtute, thumtute leh sum-le-pai a pangte hon vualzawl semsem hen aw.
