Tukum 2023 a nihvei vehna diing in EBCC Chandigarh, nisim 7-9 April in ka tanu Chingbiakmuang leh unaupa Khaimuanlian toh ka va veh thei uhi. Train ticket en baih thou ka kisaklai un, waiting list in ka omkha ua, EBCC Chandigarh- te’ thusiamna toh taxi in 7th April, zingkal dak 6:10 vel in Kishangarh apan ka kipankhia ua, dak 11:50 AM vel in ka tunna diing uh T/Upa Thangmuan-te’ inn ka tung uhi. Huchi a kisilkhiak zoh in, an limtak ka ne uhi. Tua zoh sawtlou khawl in, ‘Christ the King’ Biakinn ah Toupa’ Nitak ankuang siangthou sai diing leh uum diing in, hunchiam dak 4:00 ka delh nawn uhi. Toupa pina toh ankuangluina program nuamtak in ka zang ua, kikhop tawp in Biakinn kong a ka kihoulim nilouh ua, nuam ka sa mahmah ua, khua in hon mialkhum petmah diing ahihman in ka kikhen thei khong uhi.
Huchi in kou leng T/Upa Thangmuan-te’ inn ah ka kik ua, zan leng ka giak ngal uhi. 8th April Kiginni zingkal breakfast ne khin in, saptuamte inn veh diing in ka kisa ua, tua hun in T/Upa Paukholian-te nupa in hon tawn ua, huchi in T/Upa Thangmuan-te toh kou, a Delhi a kipan teng toh saptuamte inn veh diing in ka kuankhia uhi. Saptuamte inn guk (6) kia himahle uh, hun ka kidaihsak hetkei uhi. A ziak bel a tennate uh a kigamlat luatman hi (Chandigarh, Punjab leh Haryana huamsung a teengdalh uhi). T/Upa Chinkhanmung- te’ inn ka veh masa ua, nuam ka sa mahmah uh. Tua zoh sun-an T/upa Nangkhankhual-te’ inn ah ka delh ua, vahtak leh taitak in hon vaitun uhi. An nek zoh in, T/Upa Kaikhanpau-te’ inn lam ka zuan ua, tua ah leng nuam ka sa mahmah uhi. Huchi in T/Upa Paukholian-te’ inn lam ka zuan nawn vengveng ua, huai ah nitak-an ka nekhawm nawn uhi. Huai a kipan ka giahna diing uh T/Upa Lamsonlian-te’ inn lam ka zuan ua, dak 11 vel in ka tung uhi.
9th April in, T/Upa Lamsonlian-te’ inn a Easter Sunday kikhop saptuamte'n ka nei ngal ua, program nuam ka sa chiat uhi. Intekte kiphalna ziak in Thohnawnni ankuang saptuam pumpi in ka uumkhawm ua, ka kipak chiat uhi. Huchi in ECF (Eimi Christian Fellowship) nitaklam program dak 3:00 PM hunchiam ka delh nawn ua, tua a kikhopna nuamtak ka zang uhi. Ka paikhawm hoih mahmah ua, mi leng nidang teng sang in tamzaw ahih thu zong hon hilh uhi. Kikhawm tawp phet dak 6:23 PM lap diing in Chandigarh train station ka delh ua, huchi in ka tenna innlum, Kishangarh ( Delhi) nitak dak 11:00 PM vel in Pathian’ pina toh damtak in ka tung uhi. Tutung saptuamte vehna a, kipahna tampi ka muh behlap hi. Hon welcome dan uh leh hon kithuahpihdan uh thupi ka sa a, ban ah Pathian thu ah leng dangtaak uh ahihman un thupi ka sa hi. Thu khat peuhpeuh Pathian’ thu ahih nakleh ngaikhe diing a kimansa a om uh hi in ka thei hi. Toupa min a kalsuan manpha na e! ka chi thakthak hi.
