By- Rev Khamkhanchin Ngaihte
Tu a vualzou a vualzou zel ding I Toupa Jesu Khrist min in Itna Chibai !
Jesu Khrist pahtawina tawh Jerusalem a lutna thu Tanchinhoih bu (Gospel books) teng ah a tuang vek hi. A hinkhua tomchik sung a hun tamzaw muhsitna, nialna, bawlsiatna leh simmawhna a tuahlai a pahtawi a om a, a thupina phawkkhak a a omni Tanchinhoih gelhtute’n le ngaipoimawh ahi ngei ding uh. Tu a Palm Sunday I zat lai in anuai a thu tamloute ngaihtuah khawm le chi ihi.
“Pahtawi” ichih in bang gen hiam ? Sau leh thuk tak in I suut man kei ding. Himahleh, “pahtawi” ichih chiang in eisang a lianzaw, sang zaw, thupi zaw ahihna phawk a, thupina pia, phat, bia, amai a ki ngainiam chihna genna in la le a dik ding. Amah siamtu tung a ki liansak, ki deihkhop, ki diksak thilsiam ichih tuh ahihna ki theilou ahi lel. Thilsiam(creatures) te’n a siamtu(Creator) a zahtak ua, a biak ua, a mai a kingainiam gige a a om ding uh ahi. Nang leh kei le thilsiamte lak a khat ihi uh chih Iki theih gige ding uh ahi.
Jesu Khrist Jerusalem a a lutlai in mipi tampi petmah in a nung leh amai lam ah a zui uhi(Matt 21:6-9). Amah pahtawina in kikou in gamlum mahmah uhi. Himahleh, kalkhat nung zek in tua aki kou te (leh a nungzuite tel in)mah amah zuau san a zuak a a kilhlumtute ahong hi maimah uhi. Hiai mipi honte lak ah Jesu Khrist hihna diktak thei a om tham ding uh. Himahleh, tampite a thawmging in a hip, Jesu Khrist hihna diktak theilou, mimal a Amah(Jesu Khrist)tawh kizopna le neilou ahi ngei ding uh. Huaiziak in, a pahtawina un sawt a daih kei. Ei lak ah hiai mipi nihna te tawh dinmun ki bang I omkha ding uh chih a lauhuai kasa. Ahihna diktak thei a, mimal kizopna hoihtak nei a pahtawi ihih uh kisam hi.
Jesu Khrist Jerusalem a pahtawina tawh vualzou tak a lut bang in, tunung chiang in thupitak in leh vualzou tak in ahong painawn ngei ding chih thei ni. Van angelte pahtawina kikou husa thupitak tawh, meipi lak ah Kumpi Thukhentu in ahong pai kiik ngei ding. Huai hun chiang in lei(tongue) tengteng Amai ah kiphuang ding ua, khuk tengteng Amai ah khuk din ding ua, Amah kilhlum tute mahmah in leng mit mahmah in mu ding uhi. Jesu Khrist kumpi hihna phawk a, mimal hondampa dia ana pomta gingtute ading in bel tuani abukim a tatkhiakni thupi ahi ding a, himahleh, kiliansak a, Jesu Khrist mai a kingainiam utlou, Amah ana nial(reject)te ading in gimthuak dia mawhpaihna ni ahi ding. Khat zaw zaw ah I tel ngei ding a, tuhun deihteelna bawl hun ahi.
“En in ahong suk meipi tawh, Giloute adia thahpa…” Tua hun chiang in mi khenkhat te’n “mualte aw hon delh lum un..” chiin a mau tuaituai ding ua, mi khenkhat te ahihleh Toupa tuak ding in meipi lak ah thupitak in laktouh in I om ta ding uhi. Koi pen ah na tel kha dia ? Toupa’n hon vualzawl hen.
