By- L/Upa Robert Suanlian
Vasant Vihar
17 April 2011 ni Biak Inn kikhop lai in, pasal lam tutna masa vual (row) thumna tukvelh bul ah ka tu hi. Kikhopna program bel angeina bang in pai a; mipi’n praise & worship team te makaihna in la bangzah hiam a kisak khit in, thohlawm lakkhawmna leh latna om hi.
Huan, Pastor-pa’n first-timers/guest te welcome na hon nei a; huaite lakah, sanggamnu Chiinpi, Union Biblical Seminary, Pune a M. Div exam zou in hun saulou sharing (brief sharing) hon zang hi. A gente lak a kana chiamteh pen tuh: “Tuni in eite Biak Inn a mi hiaizah omte Saptuam register a i min om vek hi kha maithei. Himahleh, tangtawn Hinna Laibui a i min a kigelh louh ding lauhuai kasa hi.” Chiinpi bel FMPB a missionary semlel ahih toh, a thugen in hon ‘chou’ (challenge) chiat hi in kathei.
Palm Sunday ma (kiginni, 16 April 2011) in Pa Shum in “Ruth Ngaihte d/o (L) S. Daipau Ngaihte in Calcutta Bible College ah M. Div lohchingtak in hon zou a, tunitak lam in amau in ah hunzat ding khat kinei; nong tel thei diam, u Lian?” chi a mobile message honkhak kana mu a. Tuma deuh a, Ruth in Bangalore a Bible a vazil lai a, a thesis a poimoh/zat ding background material “EBC-past and present” kichi Pa Shum toh ka ngaihtuahlai uh hon phawksak a, kipahna lian. Huan, Pa Pau leh Nu Dim te nupa damlai a missionary box lakhom a, a inn ua ka hoh hunchiang a, hon ngaihnat dan uleh, Toupa a dia a theih khom ua, aki phal dan uh leh a ki it dan uh, hon phawk sak kik a, ka hi dedu hi. Bangtenghileh, Theology degree neithei ding numei 2 bang tunai a om ihih chian, i Saptuam numei te’n MASUAN HANG. Hiai ka ngaihtuahna ah hong pawt mawkmawk hi.
Naupangte Biak Inn ah tumnah (palm leaf) tawi in hong pai lut siau-siau ua; neulai a Palm Sunday ka khua uh (Gangpimual) kazat chiang ua, zing phalvak matham (3 AM vel) a thou a, Lamlian zuih lai hon phawk sak hi. Naupangte’ kilawptak a kikou siau-siau leh lasate’n hon thanuam sak mahmah uhi. Huan, mipi mai a ding naupang ‘Hosannah’ chi a kikou te ka et chiang in, ka it mahmah ka tanu 2 (nih) te tung ah ka mit a tuse hi. Hiai in ka lungsim ah hiai bang ngaihtuahna hon pia hi. Naupang deihhuai tampi te lak a ka tate ka na chiamteh/muh theih deuh ziak tuh amau ka it tuam deuh jiak ahi: i it ngellouh mite ki en ut khollou mah hiven. Tuamahbang in, i Pa Pathian in ei a ‘Tate’ a mit mahmah in hon en gige ahi, chih ka phawk thakthak hi. Hallelujah! Laisiangthou in, kawlgit (sparrow) khat lel leng Pa Van a om theih louh a lei a kia omlou achi hi (Matt. 10:29). Kumpi David in na thei chian mahmah ahihman in, zingkhang in tuipi tawp pek ah om mahleng na khut in non pi ding a, na khut taklam in non len ding ahi ngal a (Ps. 139:9-10), chi in na gelh hi. Amah phawk kei mah leng, i Pa Pathian in zaw hon na mu gige a; ittak a hon en gige na himah ahi.
Pastorpa’n Matthew 21:1-11 pansan in sermon hon pia a. Sabengtung kuamah tuan ngei nailouh ah Toupa Jesu a tuan thu hon gen hi. Sabengtung tuh ganhing genhak pi ahi. Himahleh, i Toupa Jesu tuanna ding in ‘thumangtak’ in om hi. Hiai toh kisai, Laisiangthou thu hon genna ah, Saul pen Pathian Israel te kumpi ding a athaunilh himahleh, Amalekte a dou lai in, Pathian thupiak zuilou a om jiak in, Amalek kumpipa Agag leh ganta thatlou a hing hawi hi. Pathian’ thangpaihna mu in, Israel kumpi ahihna a’pan Toupa’n paikhia hi. Hiai in Khristian hinkhua ah ‘partial obedience’ hi zaw lou in, ‘total obedience’ ahi a poimoh pen chih hon theisak thak a; manpha kasa hi. I Toupa Jesu Khris in a Pa’ thu manglou himaizen leh zaw, Kalvari omlou ding a; Kalvari (sacrifice of Christ) omlou ding a, huan, Kalvari omkei leh zaw, Thohnawnna (resurrection of Christ) omlou dia—eite ding a bel lametna om hetlou ding hiven. I Toupa Jesu thumanna manpha na maizen e, eite ding in!
Sanggamte, Good Friday leh Easter Sunday manpha hina maizen tel uh e!
