JUBC HUIHKHI: A hong tung diing May 12-14, 2023 chiang in Delhi mun a Joint Ulian Bible Camp (JUBC) neihna diing mun: Don Bosco Retreat Centre, Sukhdev Vihar, Okhla; etkhiakna zan (March 18, 2023) zinglam in Camp Convener, Sr. Pastor Dr Suankhanhau Gualnam’ makaih in heutu pawl khatte’n va nei uhi. Camp neihna mun diing Sukhdev Vihar Metro Station (Magenta line) Gate No. 4 toh kizom ahi. Conference Hall pen sound & PA system hoihtak om ahi a, mi 200 dawl zou (capacity nei) ahi. Tua ban ah, boarding double bed AC rooms 30 (hiai pen a poimohleh 3 bedded adia convert theih). Huan, VIP suits 4 booking bawl theih diing om hi. A mun pen a lamtun ban ah kim-le-kiang leng thoveng a, car parking leng om thei diing hidan in heutute’n gen uhi. Retreat centre booking leng bawl zoh hita hi. Thuumna in lankhetou zel ni.
PRAYER NETWORK VAAI: Saptuam sung a kipahthu genna leh thuumna points khahkhiakna ‘Prayer Network’ a tel lunglut kuapeuh welcome ahi. Tua ding in T/Upa H Kamlianmung, in-charge (mobile number 9774749753) thuzak poimoh diing hi. Midangte adia thuumsaktu muanhuai hih pen gingtu Khristian-te’ hihna mah ahi chih phawk in a telkha nailoute tel sawm chiat ni.
KGBB CORNER: Khristian Thukizakna (KTZ) lathak nuam leh GBC, BSI, BIIS-te phungvuhna pe nuamte’n chiklaipeuh in kipat theih gige hi. Incharge T/Upa Chinliankhup Phaipi (mobile number 9873706127) thuzak in thuchiangzaw ngah theih diing hi.
