Thumapi
‘Toupa toh tonkhawm’ chih thupi zangin Youth Retreat, September 15-18, 2022 sung YMCA Camp, Sattal, Uttarakhand ah manpha taka zat zoh hita. Camper milip 72 (Pasal 40 leh Numei 32) te’n hiai mun nuam leh thoveng ah biakkhawmna, Toupa toh tonkhawm’ tuailai hihtheihna dinga kisinsakna/kikupna leh salam a kihihhalhna tuamtuam kinei hi.
Tuailaite’ khalam hatsakna leh salam kihihhalhna neih lunggulh in BYF Committee in meeting nihveina a neih hun ah Tuailai Outing/Youth Retreat neih ding chih thupuk ahi. Hiai bang sepsuahna dingin Youth Retreat Sub-Committee kiphutkhia a, amau leng kithalawp takin amun ding, neih hun, kuan leh paina ding etc. te feltakin hon sai ngal uhi. Registration leng amau mah in hon sai ua, a tel dingte Group tuamtuam 14 in hon khen uhi. Pasal Group-Carmel, Ephraim, Olive, Sinai, Hermon, Nebo, Tabor leh` Speaker Group ahi. Numei Group Abigail, Esther, Rachel, Rahab, Martha leh Deborah ahi. Pathianni 11/09/2022 in Youth Retreat toh kisai highlight leh briefing kineih in Camper te adingin thumsakna Pastor Lamkhanthang, Adviser, BYF in nei hi.
Kuankhiakni (15.09.2022)
Pastor Lamkhanthang in Youth Retreat a kuan ding mi 72, Bus 3 a kikhente’ thumsakna khat khit khat hon neihsak zoh dak 4.15pm in kingakkhawmna Munirka nusia in ki kuankhia hi. Kuapeuhmah kithalawp chiat ahi dinga lampi ah kithawm nei mahmah hi. Lamtawn phial ah phatna laa tuamtuam sakna eimi laa leh English la te khawl lou phialin kineizom hi. Highway Yak Badi kichihna munah tawldam zekin Moga, Punjabi Dhaba kichihna mun ah nitak annnekna kinei hi. Hun bangtan hiam a kitai nungin Chawani Hapur, Babugarh, UP lak ah lam haihkha/taikhial kha hi. Hiai hun lemtang a la in sawtlou kitawldam hi.
Uttarakhand gam tunchiangin lampi te neu leh kawi mahmah a, gari in hon vei ziakin kitu muang theilou hi. Huchih ziakmah in gari kham bang ki om a himahleh a kham selua ki omlou. YMCA Camp, Sattal zinglam dak 3.30 in kitunga kipah thugenna Rev. Kamzamang Ngaihte’ in hon neihkhit hi. Tua zoh phet in, heutute’n Group tuamtuam te omna ding tent-wise in hon hawm ziahziah ngal ua, mahni tent chiat zuan in, kihahsiang in, tawldam ding in ki lum siausiau hi. Ki gimchiat, vuah bang honzuk zawkmah leh ihmut nopsak tuan mahmah hi.
Day One at Campsite (16.09.2022)
Aseembly/Exercise
Camp mun tunghak, ihmut khamlouh paulam hetlouh in zing thoh di hun a kigel dak 7:00 am in ki thoukim phial. Group Assembly leh Exercise Htp Lalboi Mangte makaihin kinei ziahziah hi.
Devotion:
Laa tungtawna Biakkhawmna hun masa kizang a, tua zohin Chairman, BYF Delhi in devotion hon makaih hi. Aman Youth Retreat thupi ‘Toupa Toh Tonkhawm’ a poimoh dan hon gen hi. Niteng hinkhua a kalsuanna ah Toupa’ toh tonkhawm a poimoh dan gen hi. Toupa’ toh tonkhawm theihna dingin Salvation (Hotdamna) neih masak poimoh hi. Tua zoh chiangin Laisiangthou theihna leh zuihna poimoh. A thu thei na pi a zuihlouh pen Pathian toh tonkhawmlouhna chikhat ahi. A thu sim tamding leh zuih gige ding Pathian deihdan ahihbanah Amah toh tonkhawm gige theihna dinga poimoh ahi. Youth Retreat a topic tuamtuam gen ding leh kikup dingte’ Toupa toh tonkhopna dinga poimoh mahmah ahihmanin kuapeuh in bildoh a, hamphatpih chiat dingin leng ngetna bawl hi. Hiai bang hun bawlsak a I om aziak asan nei a Toupa’n hon koih ahihmanin Sattal a va camping hilel mailou ding, damsung leh khalam hinkhua adinga theih gige ding Camp neihna mun ahihtheih nangin thumkawmka program te telding chialna bawl hi. Hotdamna nei nailou/chianglou, nungtolh leh lamhaih a omte, innkuan kisiat ziaka lungkham mangbanga om, relationship ziaka lungkham, sepna zonna a lungkia leh mimal a thawmhauna nei I om leh Toupa kiang tunni, Aman hotdamna, kichetna, thathak leh haksatna, lungkhamna leh mangbatna hon theihpih, hon dawn zang ding ahi, chi’n hasotna nei hi. Tua zohin thumkhawmna/kilatkhiakna kinei hi.
Breakfast Fellowship:
Devotion zatzoh phetin Breakfast nekna kinei hi. Sawtlou tawldamna hun kizanga tua zohin kikhopna kinei ngal hi.
Salvation:
What does it mean to be saved (Goal- Salvation and Assurance of Salvation)
Biakna leh phatna hun nuamtak kizang masa hi. Tua zohin Speaker in Hotdamna toh kisai thu gen hi. Pianken khelhna ziakin Pathian toh mihingte ki lem lou a, Amah I mu theikei hi. Laisiangthou ah Zakai in Jesu Khris a muh theihlouhna a dinniam ziak leh mipi ziak ahi. Himahleh Jesu Khris a muh theihna dingin Zakai theipi kung ah kal hi. Mi dinniam ahihmanin mipi lak ah omleh Jesu Khris mu theilou ding ahihdan kithei hi. Huaiziakin Jesu Khris amuh theihna dingin theipi kung ah kal hi. Jesu Khris a muhtheihna dingin a dal thei a dinniamna leh mipi ziak himahleh huaite’ pumpelh theihna theipi kunga kal a Jesu muh ahi. Zakai in a dinniam na leh mipi ziaka Jesu a muh ding kidalsak lou in theipi kunga a kalh bangin eite’n leng hon dal thei-dik kisakna, pride omte’ paikhia in Jesu muhsawm ni.
Jesu Khris hong sihna ziakin Pathian thangpaihna (wrath) lakmang in om hi. For the wages of sin is death; but the gift of God is eternal life through Jesus Christ our Lord. Jesu Khris in ‘Keimah tuh lampi leh thutak leh hinna ka hi, Kei mah tawnlou in kuamah Pa kiang a tung ngeikei’ a chih bangin pianken a khelhna nei Ihih manin Jesu lou in kuamah Pathian kiang tunglou ding hi. Sahkhua dangdangte’n leng vangam kaina dingin standard tuamtuam a nei uhi. Pathianin vangam kaina dinga standard hon set pen kuaman subuching zoulou ding ahihziakin Jesu Khris hong si hi. En Pathian I naih kei a I hotdamna dingin I Pathianin ei hong naih ahi. Jesu Khris gingta peuhmah siamtanlouh ki omlou ding ahi.
Mihingte’ Pathian toh I kinaih theihlouhna- relationship (toxic, abusive etc.) ziak bang, social media zatkhelhna bang, career vuak ngaih thupi luat ziak bang leng hikha thei hi. Himahleh a poimoh pen Hotdamna I neih keileh thildangte’ manphatna neilou ding hi. Toupa’n lungtang en ahi. Zakai in Toupa a sapma in Toupa’n sam a, A inn ah va tung zawmah hi. Pathian toh I kithuah/hun I zat chiangin Zakai, mikhialpa kianga Jesu va tung chi a dem a om bangin eileng demin I om ding, himahleh Toupa’ min a I thuak teitei poimoh ding ahi.
Zakai in Pathian a neih chiangin a values/belief system hong kikheng pah hi. Eite’ leng tua banga Jesu Hondampa dinga I neih chiangin I values/belief te hong kikheng dinga, I sep ut, hi ut te leh omdan leng hong kikheng ding hi. If anyone is in Christ he is a new creation. Khovel deih bangin ki omthei nawnlou.
Forgiveness: Ngaihdamna chi nih om hi- Judicial leh Parental ahi. A masapen Judge (Courtroom) in thil hih khial te a ngaihdamna bang hi a, a nihna pen pa’n (Innkuan) a ta a ngaihdamna bang ahi. Courtroom ah Judge in mikhial trial a om khelhna ahih ziakin in si dingin thutan khum hi. Himahleh mikhialpa tangin midang khatin a sih sikin ka si ding, mikhial pen ngaidam un a chih ziakin thilhihkhial pa ngaihdamin om a, atang a kipia pen khailup hi zaw ding hi. Tua bang in Jesu’n eite khelhna bang a gawta I omlouh na dingin Calvary Khros ah si hi. Hiai hong sihna ziakin eite’ siam tansakin I om ta hi. Mikhial ngaihdam a om pen toh Toupa kituak takin om thei ta a, Toupa pen Judge hi nawnlou in siamthak a om Pa hong hita hi. Gendan dang ah Pathian a Pa hong hita in siamthak a om pen a ta chihna ahi. Ta in a pa tungah khial kha thei hi, tua ahihchiangin pa’n a ta si dingin mohpaih nawnlou hi. Aziak tuh Toupa pen Judge hi nawnlou in Pa a hihtak ziak ahi. Judicial forgiveness I pianthak khit chiangin kitang a, ngaihdamna khat vei a neih set det ding ahi. Himahleh parental forgiveness pen hihkhelh hun ah kisik a ngaihdamna nget hun a om toutou ahi.
Lunch Fellowship
Hotdamna toh kisai thugen ngaihkhiak ahihkhitin Lunch ne dingin Hall lam kinaih diamdiam hi. Nekkhawmna hun bangle Hotdamna thu toh kisai a kikupna in kizang hi. A thei zaw deuh te toh bang kikum in manpha takin hun kizang hi.
Outdoor Activities
Lunch nekhin tawldam man le omlou in outdoor activities sai dingin YMCA Campsite apan 500 metre a gamla YMCA Cricket ground ah kipolhlimna tuamtuam nei dingin kikuan hi. Huaimun naihna lampi ngil lolou, loupe bangle pou tamsim ahihziak mahin vot bangle ana om zezeuh hi. Vot kichi mu ngei nailou te ading bangin maingal huai hetlou dan ahi. Kimawlna tuamtuam Group member alphabetical arrangement competition, Dizzy Blind Football Kick, 100 metres race chihte’ kinei hi. Hiai banga activity tuamtuam neihna in kitheihtuahna hon tuna, manpha mahmah hi.
Lazilna & Tea Fellowship
Activity tuamtuam neihkhit in Phatna laa zilna sawtlou kinei hi. Tua zoh in singpi dawnkhopna kinei hi.
Can we trust the Bible? Emphasis on the Reliability of the Scripture
Biakna leh phatna hun nuamtak kinei hi. Tua zohin Speaker in Laisiangthou a gintak ding leh a gintak huaidan genna hon nei hi. Laisiangthou Bu 66 omte’ mi tuamtuam 40 in 1500 sung a gelh uh himahleh khat leng a kikalhna muh ding omlou. Mun min, mihing tanchin leh thiltung tuamtuam kigelh te archaeological evidence/proof muhte’n Laisiangthou a gintak huaina chiansak semsem. Doudalna, suksiat sawmna, demna naktak in om mahleh Laisiangthou hoihtaka kepbit in om. Laisiangthou’ in mihing toh kisai, thilsiam, society agente’ dikin pomtak vek. Laibu dangte’ banglou in mihing’ hihna iim neilou in gen hi. Genkholhna thu kigente- Jesu Kris hong pai ding thu, nungak siangthou tungtawn apan a hong pian dingdan, Bethlehem khua a hong pian dingdan thu, Khasiangthou a adim dingdan, zekhem leh a mihinpihte’ deihlouh a om ding ahihdan, a sihna leh thohnawn ding thu kigenkholte te tangtung vek hi. Jerusalem pukna, huntawp lam a thiltung dinga genkholhna omte’ tangtung toutou. Laisiangthou in Jesu Kris toh kisai thu taklang tou ngitnget hi. Laisiangthou kum sangnih leh sangli paisa kikalsung a gelh himahleh mipil misiam apan demna/douna om mahleh kipden in linglou hi. Laisiangthou Pathian thu ahihziak mahin mihingte’ khek lumlet zou hi. Laibu tengteng lakah kizuakkhe tampen leh minthang pen hilai hi. Pathian hatkhum thute’ omna ahihziakin gintak huai hi. Laisiangthou thilhih theihna/thuneihna Jesu Kris in chiansak sem hi. Huaiziakin Laisiangthou gintak leh kingak tham mah ahi. Matthai Bung 13 a kigen banga buchi leihoih laka kia bang a A thu za a, theisiam a gah tampi suang dinga kisak chiat ding ahi.
Dinner Fellowship:
Laisiangthou thu pomtak leh kingakna tak ahihdan thu ngaihkhiak ahihnungin dinner fellowship kinei hi. Nekkhawmna hun bangle lawm bawlna, kitheihtuahna hong hi sawnsawn a, manpha mahmah hi.
Tent Fellowship:
Ann nekhin sawtlou tawldam hiuhiau khitin Conference Hall ah kipaikhawm. Phatna late kisa in Toupa phatna biakna nuamtak kizang. Tent wise in kitukhawma, Hotdamna, Bible pomtak taktak ahihdan thute’ kikupna kinei. Tua zohin thutuam tuam kikupna Speaker in hon makaih a, manpha kisa mahmah chiat hi. Zan bangle sawtsim ta, lampaina leh ihmut khamlouh chihte’ bangin hon gim sak mahmah hinapi kuamah nguai leh bah a ki omlou, kikhopna zohin mahni Tent chiatah fellowship nei in ki omlai hi. Tuailai khenkhatin Hotdamna toh kisai chiang zoulou kisak ziakin Speaker pa’ toh Conference Hall ah dak 12 tan bang houlim lai uhi. Camp sung dak 12.30 velin kidai/ki ihmu chiat pan hi.
Day Two at Campsite (17.09.2022)
Devotion & Prayer Walk
Zingkal thoh ding kuanin vuah hong zu ziahziah a, giahna mun bang vuah in hon deng tiptip, kantha kawma kitun a ihmut hiuhiau uthuai lolai hinapi maban a program omte’ leng zat uthuai lua ahihmanin dak 6.45 an in kithou khe siang hi. Tupdan ah bel Quite Time in the lap of nature- mu thoveng leh dai, sing leh lou hing dipdip na mun a va kidai thah a Toupa’ hoihna, thupina thilsiamte’ tungtawna va experience ding chih ngiimdan ahi. Vuahzuk ziakin tupdan in ki pai theilou kei mahleh Prayer Walk kinei hi. Hiai hun ah camper te numei leh pasal khat tuak group tuamtuam 35 in kikhen a, Laisiangthou chang kipe chiat hi. Hiai changtel te pansan a Toupa thilsiam thupidan kiim leh kianga tui/lake leh sing leh loute’ apan muhtheih a omte’ kikupna leh houlimna lampai kawmin kinei. Camp apan 1.5 KM vel a gamla mun ah kikhawl a thumkhawmna kinei hi. Camp neihna mun Uttarakhand, Hindu sahkhua kulmut taktak te omna a hiai bang Youth Retreat neih theihzel ziaka kipah thugenna leh Uttarakhand gam a dinga thumna kinei hi. Zingkal kho vot hiauhiau, vuah zu titip nuai a niliap khu kawma kalsuanna manpha kisa chiat hi.
Breakfast Fellowship
Prayer Walk a kalsuan’ kiiklam in Breakfast limtak nekna kinei. Breakfast nekna mun ah Prayer Walk a manphat dan, amun nopdan, huihsiang dan leh Toupa’ thilsiam thupi dan te genkhawm in breakfast fellowship manpha takin kineinawn hi.
Relationship:
Biakna leh phatna nuamtak mai hun kizang ni. Tua zoh in Speaker in Relationship toh kisai sinsakna nei. Kiittuahna I chih Pathian bawl ahihdan gen. Pathianin a thilsiamte’ a en a hoih asa mahmah himahleh Adam amah vuak a om hoih sa lou ahihmanin Evi a kithuahpih dingin a pia hi. Pasal leh numei tungtawna Pathian lau Innkuan tungkhe dinga siam ihihdan gen. Godly relationship neihna dingin thil 4 poimoh mahmah hi, huaite anuai a bang ahi : -
- Born again believer: II Korinth 6: 14-18 gen bangin ginglou mite’ toh hakkolh puakkhawm louh ding. Zi leh pasal ding, ngaihzawng dinga piangthak gingtu ahih teitei ding. Ginglou mite’ toh zi leh pasal a kineihna ana tuak te leh tuak lel te’n a hoihlouh dan a gente’ ua pan sinlai lak ding ahi.
- Biblically grounded relationship: Relationship pen Laisiangthou pansan ahih teitei ding ahi. Midang toh kisaina ah tawndan, paidan leh ei ngaihdan ahihlouh a Laisiangthou chihdan toh kituahsak ding. Nek le dawn leh bangteng hihna ah, relationship tel in, Pathian min thupina ahih ding ahi (I Kor. 10:31). Laisiangthou pen I limlang uh ahih gige ding ahi.
- Binding in love: Relationship pen itna in a kankhawm ahih ding. Ki etlahna ziak lel a relationship bawl ding hilou. Itna ah dohzohna, migitna om a, hazatna, ki-otsakna, huhamna, thulou thu sakna, hehbaihna, angma sialna chihte omlou hi. Hiai bang thilte’ relationship a neih leh tup ding ahi.
- Building the weakness and developing the Strength: Numei leh pasal mihinzia kibatlouhna tampi om. Kibatlouhna te kitheihsiam tuah ding, itna toh kilamtouh ahih chiangin relationship hoih in chidam. Diklou te bawldik ding leh relationship khan/hoihna dia ki panpihtuah ding numei leh pasal mohpuak ahi. Behind every successful man there is a woman…and vice versa hithei ahi.
Lunch Fellowship:
Relationship toh kisai thugenna/lamhilhna neih ahihkhit in Lunch kine hi. Lunch nekkhit tawldamna hun kinei a, khente’ Camp kiim leh kianga pawtkhia, houlim leh kimawl pawl toh hunnuam kizang chiat hi.
Activities: Indoor & Lazilna
Biakna leh Phatna nuamtak kinei nawn hi. Khua niim leh vuah zu guih thei ding a bat ziakin outdoor activities neih dingpen kineilou thakin Indoor activities bangzah hiam kinei hi. Hiai hun pen khat leh khat kitheihtuahna suak ahihmanin manpha mahmah hi. Last day/Second day ni ahihmanin hun ki hawmthoh mahmah a, singpi dawnna leng Conference Hall mah ah kinei ngal. Tua zohin lazilna sawtlou kinei.
Following God in a Post-Modern World (Emphasis on Discipleship):
Biakna leh phatna mantak tak kinei nawn hi. Tua zohin Speaker in nungzuihna thu Matthai 4: 19 pansan in genna nei. Huan, ama’n tuh a kiang uah, Hon zui un, huchi’n mihing man ding in kon bawl ding, a chi a. Hotdamna leh Nungzuihna kikhen theilou, a ton khawm gige, two sides of the same coin ahi. Hotdamna deih hinapi Jesu I Kumpipa dinga deihlou bang ki om kha thei. Jesu Kris tungtawna Hotdama I tan nung I Kumpipa leng hita ahihmanin A nung I zuih, A deihdan vuaka kal I suan ding ahi. A hoihlou thilte tunga NO chih ngam ngai ta dinga, I hih lelte’ tawpsan ding leh sacrifice ding tampi om ta ding. Jesu min a thuak ngai tampi om ding ahi.
Jesu Kris a Hotdamna I tan nung midangte’ leng Jesu Kris khebul a pi ding ei mohpuak ahi. Baptispa Johan in mipi tampi Jesu Kris khebul ah pilut hi. Nungzui Andrew in a sanggampa Peter Jesu Kris kiangah pilut. Hotdamna ki deihsak mahleng I kipe theikei himahleh Jesu Kris a Hotdamna a neihtheih na dingun pan I lak sak thei. Barnabas in Paul nungzuite’ kiang ah a pilut (introduce) hi.
Nungzuihna a poimoh mahmah Laisiangthou sim leh thumna ahi. Gari leng a pei omziakin taithei hi. A pei (wheel) leng Spoke, Tyre, Rim chihte’ ziaka taithei ahi. Khat om keileh tai theilou dinga, a taitheih leh leng sawt daihlou ding hi. Tua bangin Nungzuihna hinkhua leng Laisiangthou sim leh thumna hinkhua tellou a zat theih himahleh sawt daihlou ding hi. Huaiziakin Nungzuihna ah Laisiangthou leng sim gige ngai a, thumna leng pibawl ngai hi.
Nungzuihna hinkhua zat dingdan Speaker in hon gen khit nungin Laisiangthou sim dingdan leng sinsakna hon nei hi. Laisiangthou I sim chiangin anuai a paizia a sim in hon panpih mahmah hi : -
- Read in the presence of Jesus
- Meditate with Jesus
- Listen to Jesus
- Obey Jesus
Hiai banga study bawl tamtakin phattuampih ahihmanin eite’n leng hamphat pih thei/ding ihi.
Dinner Fellowship:
Fellowship nuam leh manpha tak zatkhit in Dinner Fellowship kinei. Dinner nekhin paidinga kisa leh vante’ pack a tawldam hiuhiau di chih sawmdan himahleh Biakna leh Phatna neih ki ut chiat ahihmanin nitak dak 10:30 in kikhopna kinei nawn. Hiai hun ah lasakkhawmna kinei in kilim mahmah.
Ngaihdamna:
Biakna leh phatna kineih zoh in Speaker in ngaihdamna a poimohdan hon gen in thumkhawmna kinei. Jesu Kris ziakin khelhna apan ngaihdamna I tang himahleh en’ I tunga khialte’ I ngaihdam kei leh ngaihdamna bukim neikha lou hithei I hi. “Ka tunga khialte’ ka ngaihdam bangun Nang leng ka khelhna uh hon ngaidam in” chi’n Toupa’ hon sinsak thumna I gen zel uh. Hiai banga thumna I neih lai in I tunga khialte’-hon simmoh leh hon bawlse te, vui leh mangbang a hon koih mite’ (innkuante, tanau, ngaihzawng, seppih etc) I ngaihdam kei leh ei leh kikhem suak kha thei ihihdan hon gen. Tua zohin midangte’ ngaihdamna ding, midangte’n le hon ngaihdamna dingin thumna kinei hi.Khat leh khat kithumsak kawmin hun manpha tak kizang hi.
Sharing/Hunkhakna:
Biakna leh phatna, thugenna tungtawna a hamphatna tante’ sharing/testimony genna kinei a, hiai bang camp a telkhak hampha kisa chiat hi. Tua zohin Biakna leh phatna kisunzom tou nawn a, hunkhakna Speaker in hon nei hi.
Bonfire/Outdoor Fellowship:
Kikhop tawpin zinglam dak 1 vel gingta, mahni tent chiat zuan in mangpha kikhakna kinei hi. Sawtlou nungin pawlkhat in tent apan hong pawtkiik in bonfire nei ding chi in meiphual hon bawl uhi. Tent fellowship nei toh, polam a lasa pawl toh zannung in kilum vingveng hi. Phatna laa tuamtuam Krismas late’ sa in kithuahkhawmna manpha tak kizang a, theihlouh kalin zingkhua hong vak man hi.
Sattal Mangpha (18.09.2022)
Zingkhua hongvakta. Dinner Hall mun a vante’ koihkhawm in mun thoveng ah slogam genna – Tuailaite’ Toupa toh tonkhawm leh Group photo lakna kinei. Tua zoh in Htp Lam Hanghal in thumna hon nei a, Delhi manohin dak 7.30 am velin kipankhia hi. Delhi, kingakkhawmna munpi, tungin dak 4.45 pm gingta hi.
Kipahthugenna:
Pathianin hiai bang hun zang thei dia damna hon piak leh a hehpihna leh vualzawlna hon tansak manin kipahthu genin thupina ka pia hi. Hiai banga kalsuan ding TBYF in a sawm TBUC in lemsakpihna hon piak banah sum leh pai a kithuahpihna hon piak ziakun leng kipak lua ung. Youth Retreat vai toh kisai a ma latu dinga septe’n fel tak leh kizentak, thathou leh kilawp taka hon sai ziakin amau tungah kipahthu ka gen hi. Tuailaite’ poimoh thei a thugentu ding Toupa’n Rev. Kamzamang Ngaihte’ hon pia a, right person at the right time, heutupa’ ziakin Pathian kiang kipahthu ka gen hi. Tuailaite’ poimoh thei leh awlmohna/veina nei hon piak sawnsawn ziakin Pathian min ka phat uhi. Group chih a leader te felna, camper te kithutuahna leh thumanna chiamteh tham ahi. Hiai bang hun poimoh tak zatna dinga thumna a na pang Saptuamte’ ziakin leng Toupa’ min ka phat hi. Noute’ hon thumsakna ziaka Youth Retreat manpha leh lohchingtaka zangthei ka hihmanun kipahthu hon genin Toupa’ min ka phat uhi. Toupa’n thupina tengteng tangta hen aw.
Youth Retreat 2022 tuailaite’ adinga chiamteh tham ching leh damsunga dinga mangmoh life event a suak hi. Toupa’ toh kituahna neithak, Toupa’ toh a tonkhawm gige dinga thupukna la, Jesu Kris’ ziaka lawm neibeh tampi ki om hi. Tuailaite’n khalam a pichinna ka hon neih semsem na dingun Saptuamte’n hon thumpih zom zelun. Youth Retreat 2022 kizatna tungtawnin Toupa’n thupina tengteng tangta hen!
