MAKAIHNA
by Upa Tualzapau, January 22, 2012
Chibai! Hunhoih honpia Pathian min phat in om henla, “Makaihna”, chih thu gen dia hamphatna honpia, saptuamte tungah kipahthu ka gen ahi. A gen dia ka deihzawk Pastor leh adangdang tamtak om a, himah leh thumangtakin seh a ka om bangin leh a thupi piak a ka om bangbang gen di’n ka hong kisa zaw ahi.
“Kei belam chingpa hoih ka hi, belam chingpa hoih in a hinna a belam ading in a luikhia hi” ~ (John 10:11).
Makai (Leader) hong kigen chiang in, kua na pia a? Midang pia a, nang ana kivalsak pah na hi hia? Kivalsak ken, Pathian in honvalsak lou hi. Saptuam sung ah, inkuan sung ah, society ah, politics ah, lawmte lakah, etc.? Nang le pankhakna na nei ngei ding. Belveltu in bel a zatna ding om chiat in avel a, nang bang dia vel in na om a? A poimohna chiat a zat a om i hi. Singpi awmna ding beel neu khat ka nei ua, kou inkuan kia in singpi ka dawn ding chiang un a awmna in ka zang uhi. Midang toh ka dawn ding chiang un, beel lian dang ka neih pen uh ka zang zel uh. Malta meh bawl nang bel neu etlawm khawl lou khat le ka nei ua, huai leng a poimoh mahmah zel. Hiai belte’n piandan leh zatdan tuam chiat anei ua, hileh leng a kikhom un a poimoh chiat uhi. Nang leng, hiai bang deuh in, a poimohna awnghu ding khat a zat na hi. Huai zatna bang na loh a, huaite ah na muanhuai hia? Etkol neilou hial a om na hih ka gingta kei. Bang lam ah leng heukhak banghiam na nei ngei ding. Ana kivalsak ken.
Amah adia siam, amah adin na kizang hia? Kol. 1:16 “.. Leitung a omte hiin, vantung a omte hileh … bangkim amah siam leh amah adia siam ahi”, achi. Pathian in amah adia a zatna ding nei chiat a palai dia hon siam ahi. Ei kisaklah ziak leh ziak lou leng hilou in, Pathian in thunei dia honbawlte leng ihi, Gen. 1:26 “Eimah bang in mihing i bawl dia, tuipi a ngasate tungah leh huihkhua a vasate tungah leh leitung a ganhingte tengteng leh lei a bokvak ganhingte tungah vai i hawmsak ding”. Amite vaihawmna piak ding a Pathian in hon deihsaksa ihi. Ganhingte bang ihi kei.
I Bible simna in agen bangin, makai dia chin pen zaw, i Toupa Jesu Khris ahi. Bangziak in? Aman a van inn nusia in, nang leh kei hon khualna ziakin, mihoih leng hilou, mikhial bangmahloute adingin a hinna hong pia hi. I etton ding makai hoih inei a ihampha ahi. Aman hichi’n leng ana chi - “Kuapeuh in ka nung hon zuih nop leh amah kizaangsak/kimangngilh in a khros pua in hon zui hen” (Mathew 16:24). Ei Christian makai amah adia azatte i tuam ding ahi. Agen bangin, i theih louh kal a, mahni angma sialtaka sep khak theih ahi. Mahni ading khuala semte’n, khovel et in zaw, a changkang in, lohching lua bangin akilang ua, akhang huaihuai ua, himah leh ataktak in lohsam, ana himawk zaw uhi.
Khenkhatte’n makai ikisak luat zozen chiang banga le, dik thei lou, “Huai khawng ei sep di hikei ve o!”, chi a, amau hih dia neusa lua, midangte hih dia koih uh bang om hi. Ki-makaisak lua a, mawk pau le om thei. Eg, “Huai ah va hoh in aw”, chia, heutu a ikoih khat in hon gen le tuh kingaisiam eive maw. “Huai ah vahoh in ka chi hilou maw, geihgoih te”, min hon chi leh tuh kichiamteh ngal, chi ua. I lesson/Bible tang byheart chia, mangngilh pahpahte’n le, huchi bang kampaute tuh akua-akua in mangngilh lou zozen, chi uai. Awiloute laka, tuh huchia kiphasaktaka, pau el taktak zangte, kiliansakte, mi lauh leh zahtak hi thepthup ua, ngaihsiamna leng nei vanglak uhi. Ei Christiante lak a bel huchi dante pai lou deuh hiv’o, sikha lauh alauh na khat bel kinei in, koihna khat le kinei ngal, hizomah hi. I hih dingdan uh le ana hilou hi e, hon chisak hi. “Na kampau uh, chisoh hehpihna hihen” (Kolosate 4:6), chih gelh ahih bangin. Itna mah poimoh, mi i itte dem a kouna di le om thei lou hi, thuhilhna/taina ahih vanglak kei leh. Pathian in hon it ziak a, bangmah loute hon tan peih ahih bangin.
Makai i hih ngal leh khauh deuh a hih geega deuh a, hih fenfan deuh chiang a zou kihilou a, mite muh a, “Hiai pa’n zaw a saptuamte keem hive aw, ahih phenphan dan khawng”, hon chih theih dia i om ziak uh le hi tuanlou hi. Pathian in hon zohsak chiang a zou kihi. Israelte’n gal azoh chiang ua, a gitlouh leh a kisak theih gaga chiang ua vualzou hilou uh, Pathian in a zohsak chiang ua zou hilel uh aka. Toupa deihdan in om kha mawk le, aman dou kei leng le a ut leh, hon zousak thei ahi chih muang le hon zou sak zawding hi. Bangchituk in, kisa in om lele, Toupa’n hii asak kei leh, kizou tuan lou hi. En, Pathian lamlam le phawk lou a, heutu hihdia hoih ikisak dantaka i hongom chiang a buaihuai deuh hi.
Nidanglai a tuailai igam a, tuailai khenkhatte, lai/sport lam talent neite khawng i et leh, pahtakhuai petmah ua, min leng pakta petmah ua, eilak adin minthang petmah uhi. Bangchituk in kisathei in, gilou in om le uh leng, a siamna pen uh, siam petmah ahih man un, minthang thouthou uhi. Amau leng mite pahtakna bang hon ngah tam chiang ua, omdan ding tumta theilou zozen lou uh ahi ding, lailam hiin, kimawlna lam hileh, siam nei taphot in khamtheih hih khawng thupina a ngai kha uh hia? Pathian lamlam le ana ngaihtuah khaklouh ziak mah uh ahi pen ding, makai suanhuai ding le om theilou. 1 Samuel 17 ah, naupang David i et leh, amah talented na bel a belamte nese theite laka venbit, sakei kam apan suhkhiak khawng ana hi a, Toupa Jesu toh leng tehkhin in ana om hi. Hileh leng, Pathian amuanna in, a talented na lam hichiah lou tan ah leng zanga, Israelte melma lian Goliath nasan zou hi. Pathian a muanna koih, makai taktak ahi ve. Talent kia a leng hithei lou hive aw makaihna, chih hon theisak hi. Huaiziakin, Pathian i poimoh, tuaban hoihtakin awle siam neite’n Pathian i kikepsaktaak uh, ‘Tak-tapa’ chiin!
Mark 6:33 “ ..mi tampite a mu a, ching ding omlou belamte bang ahi uh a, amaute a lainat mahmah hi. Huaiah amaute thil tampi a sinsak hi”. Belam ichih, ganhing laka navak lou, gammang leh leng hamhaih pah, lau pah, alawmte kiang le zuan thei nawnlou mai ahi. A nese theite lak apan le kiveng theilou, a lampial chianga panpihtu bei pen ahi. Tui letna om leh leng baihlamtak a kalkhiak theihna ding hileh kilawm mun a leng a hon a si maite ahi, a kichi. Huai ahi, Toupa’n agen, belam toh hon tehkhin a, i hihna lel ahi, Amah bei in panpihtu bei ihi. Huaite awlmoh in a sem hi. Aleh, nang/ken bang ka awlmoh pen ale? Ei mimal ngen kien a, adik/atang thei napi a, thutak gum loua, a meikhu lian lam kia bawk mai ihi hia le?
Belampu hoih Toupa in, a belamte a it a, ahinna a luikhiak kia hilou in, amakaih, avak a, a khamuan a, a veng hi, a hinkhua ah le a diktat a a ettontak hi. Huaiziakin, a chin, a ettontak pen i Toupa Jesu i et chian zaw adan kiom hive aw, na chi uh hia? Eg. Lanva Bial Naupang Pawl, Committee member in ka pang ngei a, ka theih gige khat – kumkhat khawmpi a kidemna (La, Thu, Action, etc.) ah, Makaite omdan leng naupangte a toh etkhawm ding, amau leng ki-contest a ngaih ahi uh, chih ahita. Khenkhat hihdan - Plat form a kidem dia hong kuan chiang un, Heutu in ma hon kai in, hong kuan diamdiam ua, makai pen ama uah, lavai ding or bible tang patpihtu din a ding hi. Hon zoh chiang ua atutna mun manoh a pai kik chiang un, Heutu in a nunung pen a naupangte hon leh zuih nawn in hih uhi. Khua khenkhat heutu pen a lai ua pai bang om a, khua khenkhate lah, hong kik lam chiang ua le, naupangte ma ah heutu pai uhi. Endiktu Pastor Nengzakhai in, hun piak ahiha, hon gen tak in, “Makai pen makai ding hia, ama tawng a hong pan zoh in, a naupangte bangkim a veng a khual in (azum dinguh, alauh ding uh, etc.khual ahihman in), hongkik lam un a nunung pen in hong pang zel uh, hoih kasa pen chi hi. Makaihna bel bangkim a i makaihte khual ding ahi, chih hon theisak hi. Makai hoih mahmahte laka khat in i Bible ah, “Kei hon enton un, ke’n Christ ka zuih a, ka etton bangin” (1 Cor. 11:1) achi liuliau mawk a, thupi ka sa ahi. Eite’n le Paul makai thupitak khat in ana etton bangin i enton thei ding uam? Paul mah leng etton tham ching hi.
Khenkhatte Public Servant (Politician) kichi zozen uh, servant malakah, khovel ngaihdan, Toupa ngaihdan toh zaw kibang kei ve aw. Khenkhatte lah huaihamna a dim, a inkuante ading nangawn khuallou. Khenkhatte’n aveng-apamte ading khuallou in, amau nuam asak nak uleh, poisa lou in, khovel zap-in-zap uh hi. Khenkhatte amau minhoihna ding zong in, a thil hih peuh uh leng mite muh ding leh mai-tan nang leh mavan nang in hih ua, nuamsa lel uhi. Agam leh adiktatna zong masa phot le, hiai ei mahni adingte Pathian in ei adia hoih asak leh hon piak behlapna ding ahi zaw hi. Aman, hon minthangsak thei a, hon cheimawi thei a, hon hausasak thei ahi. A utleh awl a piak ding, or mite mitmuh a hoih liauluau khollou in leng koih thei hi. Huaihamna ziak leh selfishna ziaka hiai Pathian hih dingte a en i vabulpat khak chian, i sep tup abul apan kisongsolawi in, kimasawn theilou pah sek hi. Diktatna mah heutu khat hihna ah, koi ah le, poimoh hi.
A tangpi a et in, belam banga heutu ngaite i hi, Christian i hih nung diak in, hoih utte i honghi a, koi mun ah leng mi thumangte i hi, makai hoih hi i poimoh. Makai zui diamdiam theite i hihman in. Makai hoih nei le, hoih mai ding i hihman in, i makaihna chiat ah hoih chiat sawm ni. Politics ah, society ah, inkuan ah, lawmte lakah, etc. Ei hoih chiat le makai hoih nei ding ihi mai hi.
Makaite hi in, makai loute’n leng i poimoh mahmah khat tuh ann ahi. Nek ding bei in bangmah i hih theikei. Huai ding a ann zattak pen tuh, Pathian thu ahi. Pilna ding kia hilou in, dam theihna leh hinna hoih i neihna di’n a poimoh ahi. Deut. 8:3 – “Mihing tanghou kia in a hing kei, Pathian kam a thuchih pawt in ahing zaw hi” achi. Aman zaw, thu in/khalam an in a vak masa a, ei zaw mehlim anlim, ahihkei leh, sa bang atel kei leh leng na isem thei taktak kei lai ahi, 5000 vakna khawng i et leh. Huaiziakin, i Bible poimoh hi.
John 13 ah, Jesu’n nungzuite khe a sil, chih i mu nawn hi. Palestine gam, huai hun lai khawng a agen uleh, kipuahpha nailou, suangsi lei, a lei vui ahi. Khedap bunte’n le chappal pian ngen hi zomah. Huai thil nin silsiang tuh, amau dan in, suak anniam pente nasep ahi, akichi. Makaihna tuh kisaktheihna hiam, kihihsakna hilou ahi, chih hon hilh chian mahmah ahi.
Huan, haksatna nei lou iom kei. Huai haksatnate Pathian deihna toh bangchi solve ding hiam, chih muh theihna i neih kei leh, i ma pai lou ding hi. Khial a si ding ka hi chih kitheite’n, i theih khiak chiang in, hinna ah i lut thei hi. Huai theihtheihna ‘vision’, Sapte’n ana chih uh, i poimoh ahi. Hinna i neih nung in leng haksatna tam pi om lailai ahihman in. Proverb 29:18 “Muhkholhna a om louhna ah mite amangthang uh…” ana chi. Haksatna i solve theih louh a om leh leng pankhawm didan om ding hi. Eg. Nupa kal thu, numei khat pasal nei tung lungkia apan dotna ka muh khat – “Mi pasalte lah a fel-fel utoh, kei apa zaw fel sa lou hiveng aw”, chi hi. Ka dawnna ah, “Tua na gen, mipasalte fel lua a na muhte kha, gentehna’n, nang pasal hileh, hoihtaka theichian hile chin, a fel zawk tuanlouhna uh om ding a hi, kuamah bukim kiom lou ahihman in. Tua na pasal pen, midang pasal hihen la, a gaal a na muh thoh hileh, feltuak lua zel leng hithei ahi. Huaiziakin, mi pasalte le felkim tuan lou uh ahih bangin, nang pasal leng fel kim vek tuanlou thei himahleh, a fel zawkna tampi om lah na theihchet luat ziak lel hizaw thei hi”, ka chi hi. Dawng kha ka hiam/ hilou, chih pen zaw ka thei kei. Ka gen hun in zaw ngaisiam mahmah in ka thei a, kipahhuai ka sa hi. Huan hichi bang dotnate thuguk a koih a, vagen zak louh chi (secret) ahi, chih leng theihtuak hi.. Huaiziak a, theihsiam louh/mu kholh theih louh om leh leng, pangkhawm a muh theih pawl om ahi chih theihtuak hi..
Nehemiah 1:1-11 - BC 586 lai in Babylon ten Jerusalem a susia uhi. Nehemia hiai hun a Susa, Judah gam, Jerusalem apn km 1000 tamtak a om himahleh Pathian thupina a awlmoh a care mahmah ahi, a kichi, huai ziak mah ahi ngei ding, Jerusalem segawpsa tunding theih ding ahi, chih Pathian ompihna a, vision amuh. Kumpipa Khawnbawl nna sem… Pathian thupina leh amite khualna hilou a amah ading, minhoih, etc. ngaihtuah lel, hileh ading khe kei ding a, Bible tan ah leng a tuang pha kei ding. Huaiziakin, Pathian thupina dingin, kisa thak ni, a sesate, bawl hoih sawm in, Pathian ate khual ni.
Makai hoih, Pathian a om, diktat, kiniamkhiak, angma siallou, Pathian mite it, Pathian vante/sumte hoihtak a care a, Toupa etton aneite makai thupi mahmahte ahi uh i chi hi.
