2013 KHRISTMAS THUPUAK
By- Upa T kaithang
Tungnungpen ah Pathian thupi henla,
Leitunga a kipahpih mahmah mihingte lakah
Lemthu leng hen,
chia Khristmas masapen Van lapawl lasakin Belampute Kumpi Thak Bethehem a hong piang en dingin thanopna leh maingalna neisak zou a, Mari toh Joseph toh gan anpiakna kuanga lum naungek va mu uhi.
Khristmas hi lei leh van bawltu Pathian mihinga a hong pianna a hi. Leitunga mipil leh misiamte’n ei mihingte hi gansate laka khat banga hon genin, Siamtu neilou, huih, tui leh thil tuamtuam kigawma gansate leh mihing mah leng hong piangkhia hi mai dia gen om uhi. Hinna Laibu, i Bible gendanin Pathiain mihing a bawlin leivuiin a bawla, mihing sungah hinna hu a ha luta, huchiin mihing a hong suak chi hi. Pathian hihna neia siam i hihjiakin theihna, siamna leh pilna khangtou leh masawn dia bawla om himahleh Eden huanah pukna hong oma, Pathian toh lawmta banga omsa mihing toh Pathian melma hon suaksakin, khelhnaa mangthang lellel i hong hita uhi.
Mangthangte zong dingin Pathian Tapa Jesu Khrist hong kihih awngthawla, thupina nusiain ei banga hatlou leh zawngkhal thei mihing sapum neiin mihingin hong piang hi. Hotdama i om theihna dingin Pathian thupi hi lai hong kihihneu hi. Himahleh Amah ana kipahpih peuhmah mite’n Pathian sungtenna i neia, i neih ngeilouh Pathian Ta dinmun manpha i nei uh. Gansa bang maimaia hingte Kumpipen Ta i hong hi a, Sappauin gen le: Ennobled i hita. Genthei, nuaisiah leh simmoha om, kingaisia leh mite phawkbatlouhte hihna akipan “Ka sunga teng Pathian Tapa ziakin ka hinna manpha/hlu a hi” chi thei dingin dopsangin i omta. Tuin zaw milian leh milalte laka i tel sam theihna dingin Toupan mihing sapum hon luah hi.
Huaijiakin, Khristmas hunnuam huna hong tel tengtengte aw, i Toupa Pathian sungtenna sapum manpha nei na hi uh. Lusun ziaka dah hiam aw, lungkiakna ziak hiam aw, lohsam kisak ziak hiam aw, kingaihsiatna nei i om khak leh i Pathianin na hihna bangbang pom a hi, huai dinmun akipana thupina leh manphatna (nobility) hon neisak nuam a hi. Huai manphatna nei thei dingin Khasiangthouin Van lapawlte lasak tungtawnin hon veh thak henla, belamchingte bangin thathak leh mahni kimuanzohna ana tang chiat dingin naungek hong piang Toupa Jesu Khrist na Immanuel hong hi thak hen. Amen.
Amah Pu P.K. Nengsong laphuaha i muh banging
Zatam laukha zinmang kaihsa,
Toupa Jesu’n salbang honsuah;
Thanmual suahna hanzai sain,
Vanmang Vontawi lambang pakni.
Chiin Saptuam neitu i Toupa Jesu Khrist minin Kristmas Chibai ka honbuk hi.
