HAKSATNA KHEN AH
-By Nu Mankhodim
“Huan, Pathian itte, aman a seh banga a sapte adin, a hoihna dingun bangkim in a sep sak chiat chih i thei hi.” Rome 8:28
Hiai Bible tang hi tang lar mahmah, haksatna leh buaina tuah hun chiang a, zak mun mahmah te laka khat ahi. I tunga tungte ziaka haksatna thupitak thuaka, beidong leh lungkia a, damsung zat ngaplou khopa hinkhua chimtaak tak mai a hun i zat lai a, hiai Bible tang zaka om chiangin, lamdang sakna leh, i hoihna ding ahi va chih pen thil haksa leh pom hak mahmah ahi. Lungsim khat a tuh dik sakna om mahleh, lungsim tawngah question lianpi om veve hi. ‘Pathian itte, aman a seh banga asapte a din, ahoih na dingun bangkim ah a sep sak chiat” chih dik dingin gintakna om thei lou hi. Ngaihdan lakna bang om hita leh, a tamzaw te’ lungsim ah leng ‘dik mah e’ chi chet ngam tam dingin gingtakhuai lou hi.
Ahia, hiai Bible tang limtaka i ngaihtuaha, i sui detdet leh, dik hina e, chih ngaihtuahkhiak theihin om hi. Tu niin mi malmal te’n i hinkhuaa i thiltuahte leh i tunga hong tungte, a nen-a-ham sutin ngaihtuah detdet thak mah lehang…..ihoih na ding mah a hong tung ahi i chi lou thei kei ding. A hunlai takin theihsiam haksa bangmahleh i khonung ngaihtuah thakthak chiangin, Pathian hoih hi na maizen e, Pathian in ka hoih zawkna ding thei ei ve, i chih chiat uh gintakhuai tinten hi.
Mihing i tuam dungzuiin, i thiltuahte leh ituah dante kibang kimlou ding hi. Khenkhatte buaina leh haksatna tuak lellel a, lungngai a kingaihtuahse vungvung bang i om ding ua, a khente lah tuak zou pan phet bang ihi ding ua, huchi loute leng maban ah tuah ding in hon ngak gige hi. A hong tun hak ding, ahong tun baih ding kuamah in i thei kei uh. Pathian hamsiat khovel a teng ihi a, buai na, natna, leh haksatna tuamtuam mihing ten ituah ding mah uh, hiaite a pan a ki awngsut thei ding kuamah ki omlou. Jesu’n bittaka i inkhua uh paisuak ding ahon chiam a, himahleh zeetnate, haksatna, buaina leh natnate tuak lou ding a chi kei hi. Aman John 16:33 ah “Khovel ah gimthuakna na nei ding uh, himahleh khamuang takin om un, ken khovel ka zouta hi” chi hi. Gim tampi thuakin Pathian gam ah ilut ding ahi him ahi, ana chi lai hi(Nsepte 14:22). Hiai te apanin, i tuahding mah, pumpelh omlou ahihdan chiang mahmah.
Ecclesiastes gelhtu Kumpi Solomon, khovel a mipil penin “Nuih sangin lungkham a hoih zaw, mel lungkham na ah, lungtang kipahsak in lah a om ngala” (7:3) ana chi. Hiai ah nuihna leh nopsakna lam sangin lungkhamna leh haksatna lam tel zawk ding ahih dan imu thei hi. Hiai mah leng i makai Pa, Jesu Khrist lampi na hi tawntung hi. Jesu (Perfect Man) khelhna nei lou, mihoihpen na ngawn leng “a man of sarrow” dahnate nei mi, lungkham mi ahi akichi (Isai 53:3).Lungkham na leh haksatna in tuamden hi. Ahih leh bang toh iteh ta dia le….. Pathian Ta hilhial hi mahleh, a thil thuakah te khawng thuman a zilta ahi (Heb 5:8). Amah thuaknate ban ah, ei thuaknate, ei lungkham haksatnate hon theihpih ahih dan i ngaihtuah chiangin, Pathian in a itte, aman a seh banga a sapte adin, a hoihna dingun bangkim in a sepsak chiat chih i theih tel theihna dingin haksatna leh gimthuakna i tuah ding hon phal sakin, tuate tungtawna amah kiang naih dinga hon deih ana hi hi.
A lampi tengtenga dika, a nasep peuhmaha mi hehpihthei (Sam 145:17) ahih man in, Aman sem khial ngei lou ahi chih phokin, i tunga hong tungte nawlkhiin mai lou in kipak takin na vaidawn in, ei ah sunglut sakin, huai in, ki zou sak ngiingei leng, huchia sawizawta i om khit chiangin gah khamuanhuaitak hontun ding hi. (Heb 12:11). A ziak bel, lungkham mahmah na in nguntaka kingaihtuah na, kisutna hon tun a, lungput, tup leh ngimte leh lunglut nate hon khoih kha pha ban hi. Huaiziakin, lungkham/haksatna ituah ma’ sangin i hong kithei chian zaw a, huai in, lungsim tawng ah Pathian toh kinai takin hon om saka, Amah Pathian hon mu chian saktu hong suak zaw hi. Job in leng, ahaksatna a kipan in “Ka bil zakna in nang ka hon za a, himahleh, tu in ka mit in nang a mu hi” ana chi hi (Job 42:5). Hiaitak ahi haksakna leh lungkhamna te ei a dia “HOIH” a hong suah na.
Khenkhat ten ahih leh, huchi louin, la lut nuamlou in a geigei a paiin, kiton pipih. A khen in ahih leh alauha lauhthoh, khiin khiak sawm teitei, a ngakna ding a muh louh tawpa mi khawng ngohmawk, midangte ziaka haksatna leh lungkhamna tuak bang kisa in ana nawl khiin teitei. A dangten lah, kimangngilhsak sawmin thiltuam tuam, lungmuanna ding, kipahna ding (remedies) zonga phia-phia, gen-a-gen veng sawm a, tuahpeuh kiang khawnga gen zelzul bang leng om. Hiai banga haksatna thuak ngap lou a doudal nain, bangmah sem thei/khalou in, awl-awla hon paih pel in, thuuk taka kingaihtuahna hon tunlou in, kikhek na leng tun taktak thei lou hi. Huchibang ten, haksatnate maituah ngamlou ahih man un, athiltuah peuh uah kipahna neilou in, phun leh lungkimlouh thuah den uhi. Amau leh amau akitheih siamlouh ban uah, midang leng a theisiam theikei uh. Ahi takin zaw, Pathianin hon it lawtel a, hiai te tungtawna hon kimu chian sak nuama, Amah a ding leh Ama zat theih dia hon seek nuam ana hi ahi.
Tuabang ahih man in, hiai khovel damsung khualzin na ah, i tunga hong tung khempeuhte, limtaka suut a, ingaihtuah detdet leh, ithiltuah te leh tuah dante ban ah ahun leh amun tanpha in, a khonung in, ei hoihna ding mah ana hi takpi hi. Pathian i naih na ding, Amah i muh na ding lampi ana hi zaw ngitnget hi. Kumpi David nangawn in leng Sam 119:71 ah ‘Na thusehte ka zil theihna dinga hihhaksata ka na om a hoih hi’ ana chi hi. A hon sapna ngeingaih louin, i na nawlkhiin kha maimah hiam?
