Baptist Youth Fellowship, EBCC Delhi, in tukum a Silver Jubilee meel mu in, kipahthu genna programme March 9 & 10, 2019 in kizang hi. SJ thupi ding in “PHAKCHIAM DELH TUAILAI” [Phil. 3:14] teel ahi.Thugenpi ding in Rev V Thangkhanmuan, Youth Coordinator, leh Rev V Nenglian, DS (Imphal Division), chial ahihbang un Manipur apan hong kalsuan uhi.
Ni nih sung Session 4 a khen in, phatkhawmna laa 20 kisakhia hi. Jubilee zat sung in TBYF in lapawl 4 vei sa a, saptuam dang (ZCF, KWS, PCI-R& EBCC Central Delhi) apan lapawl 4, TBDF apan 2 leh TBCD apan khat ngaihkhiak in om. Thutak annkuangluina 4 vei leh thilpiak lakkhawmna 2 vei neih ahi.EBCC Chandigarh in SJ kipahpihna etsakna in TBYF kiangah dangkha Rs 5000 pia hi. RK Puram-Safdarjung-Mohammadpur-Nanakpura Area Fellowship, Munirka Area Fellowship, Ber Sarai-Pushp Vihar Area Fellowship, leh Dwarka Area Fellowship-te apan special item lahna om. Elish Sangpui leh a naute Momawi & Kikim, Christy Vunggohching, Nemsiam Guite, leh Pastor H Biakson & Grace Siamte-te apan leng deihtuam lasakna om hi.
Ni masa Mavalankar Auditorium ah kizang hi. Aw Pathian, taang a hon panpih, chih laa akisa in, kum 25 paisa a tuailaite’ kizatdan tuamtuamte limlahna neih in om a, Pathian thupina pia in "HALLELUIAH AMEN !!" "PHAKCHIAM DELH TUAILAI, TAKHEH !!" chi a mipi 800 veel paikhawmte’hanchiam aw thupi – Jubilee zaampi khetna toh kithuah – in Auditorium sung thawn zuazua hi. TBYF in ‘Halleluiah chorus’ sakthuah lai!
SJ host in S Ginlalsiam leh Nem Juliet-te pang ua, H Tunkhanmuan, TBYF Chairman, in Welcome Address bawl hi. Short message Upa Vungzamuan Valte (BYF/KTP Delhi a Chairman masapen – pre-recorded video), Upa L Ngulminthang (TBSUC Chairman), leh Rev N Tuanglang (Local Pastor lui – pre-recorded video) te apan ngaihkhiak in om. Program kaallak ah TBYF heutu masa 5-te’n ‘minute talk’ zang uhi; amaute T/Upa Khamchin Naulak, Ginthanlian Valte, Muanniang Tunglut, T/Upa Thangzasiam Paite, leh T/Upa S Thuambiaklian.
Rev V Thangkhanmuan’ thugen tomkim: Phakchiam tunna ding a tai dingdan – Nunglam a omte mangngilh ding, hunpaisa thilte et nilouh in maban kalsuanna ding dal thei a, mailam a limchi zaw thil omte en a kalsuan ding; Hon hihnok peuhmah paihkhiak ding, pumpi kicheina leh gamtat-khohei ah kikep siangthou a, ginglou mite’ omdan leh nek-le-dawn-te apan a tuam-om vilvel thei Khristian hih ding; Jesu en a tai ding, khovel thilte leh midangte’ neih-le-lamte et nilouh in tuh Jesu Khris batna phakchiam delh a i taina ah hon nawngkai sak; Kithunun hinkhua toh tai ding, kithunun zouloute kulhbaang chimsa a tai toh kibang a, lohchinna ah leng lohchinna bukim neitheilou in a lohsam suak zel.
Rev V Nenglian’ thugen tomkim: ‘Jubilee’ tuh Hebrew thumal ‘Yobel’ apan hongsuak ahi a, Israel-te’ hunlai a zalenna thupitak puanzakna ding a belam’ kii a kibawl pengkul kimuut, huai thilhih genna ahi. Laisiangthou in Jubilee tuh khelhna ngaihdamna, zalenna, siangthouna leh Toupa muanna toh kiton ahidan gen hi. Gingtute a ding in ‘phakchiam’ i chih Khris bat sawmna ahi a, a tawp chiang a gingtute’ tunna ding Vangam a hi. Huai ah, Pathian min a i sep leh i bawlkhak peuhmah ziak in kipahman kimu ding ahihman in, tuailaite’n maban ah nnahoihte sem leh bawl a lampi dik tawn a phakchiam delh a tai kuul hi.
SJ champha theihgigena in e-magazine “Phakchiam delh tuailai” kisuah a, a honna DS (Imphal Division) in nei in laan hi. Hiai e-magazine ah mi tuamtuam’ thugelh 48 om a, limlak, report leh statistics khenkhat tuang hi.Saptuam website (ebccdelhi.org) ah pdf/apk/epub file download na ding links muhtheih ta. Project Nehemiah bang ahia, chih pulakna in video clip etna kinei; huai ah Zodawn a siamsin naupangte dopsangna leh panpihna a EBCC Delhi in pan a lak sa leh maban a pan lak beh ding omte pulak in om. Ni masa Session 1 leh 2 hunkhakna Upa Chinsum leh Pastor H Thangchinkhup-te’n neituak uhi.
SJ ni nihna EBCC Delhi biakinn, Dwarka, ah kizang hi. Session 3 leh 4 a kikhen nawn in, thilpiak latna Upa T Thiankhanmuan leh Upa T Songzalian-te’n nei ua, hunkhakna Upa Tuanmuanthang leh Pastor H Biakson-te’n neituak uhi.
Rev V Nenglian’ thugen tomkim: Delhi saptuam tuh “phakchiam delh saptuam” ahih poimoh hi. Saptuam in khalam leh salam ah punnathupitak a muhtouh zel lai in, kipatna mun Lamka leh singtanglamte ngaihtuah zeel a Pathian in A hon iitdan leh khotuahdan phawk thakthak ding ahi.Sawltak Paul in thilkhatkia ka hih a chih tuh, tangval hausa kiang a Jesu’n thilkhat chouh hih na tasam a chih pen ahi a, huai tuhJesu Khris theihchetna leh priority piak ding leh nunglam a thil omte mangngilh a malam a thilkhat poimoh pen delh ding ahi. Hiai thil bel Paul in a theichian mahmah a, tangval hausa in theichianlou in Jesu Khris nung a zuikei hi.
Rev V Thangkhanmuan’ thugen tomkim: Phakchiam tunna ding in Ex 3 poimoh. Excel in Life – Pathian in Amah batpih a honsiam ahihman in, tup-le-ngim nei leh omzia nei tak a siam i hi. Tuailaite hi in nu-le-pate hitaleh hinkhua ah bang lunggulh in i nei ua, leh Delhi khopi ah bang hih ding a om i hi ua chihte kidongthak in, hinkhua a excel theihna ding a A gam leh A diktatna zon masak kuul ahihdan phawk poimoh. Tup kichian leh saptuam, khotang leh nam a ding a phatuamngaihna neih ding ahi. Excel in work – Joseph, Daniel leh a lawmte, leh Samson en in Toupa ah ginna leh i hatna nga in, nasep chiteng leh omna peuh ah Toupa’ deihlam nna kia sep teitei zoh a excel sawm ding ahi. Excel in worship – Lungsim tak toh siangthou tak a biakna ahi Pathian in A deihpen. Polam kilawmna kia hilou in, i kiim-le-kiang a mite’n Pathian diktak bia i hihdan a hontheihpih tham ding ua biakna a excel tup ding ahi. Abraham bang a eilam a siit omlou a Toupa biak ding ahi.
[Silver Jubilee hun zatdan chiamtehna bawltu Elizabeth Kim, Lianmawi, Suanching leh Vungkhawlching-te tung ah lungdam thu gen ahi.]
Listen to Jubilee Sermon View Jubilee Photos Download Jubilee eMagazine
