Ginsuan Haulai | Caretaker -cum- Office Assistant
June 22-23 sung EBCC Delhi biakin ah Naupang chialpi program neih in om hi. Hiai chialpi ding kumbul a year plan a TBCD in a guansa, a hun hong nai huntawkta chih a ani leh hunzangtu dingte sehfel leh kisakkhawlna mansa a koih in om hi.
Saptuam mimal leh a pumpi a hiai chialpi program tungtawn a Toupa’ Khasiangthou nasep hong tung ding muh leh tan lunggulh a thumna, thumkhawmna lemtang bangzel a neihtouh in om ngal hi.
Ani hongtung in, Ni masa (June 22) in naupang 134 vel leh heutu14 toh nektak sai mi 17 leh resource person mi 6 vel in hun nuam leh manphatak zat in om hi. Gelsa leh sehsa bangin zingdak 8:00 in breakfast (juice, bread leh Banana), Tea break hun ah naupangte khualna in TEA hilou in cold drink (Pepsi & Mirinda) in zomtou a, lunch hun ah aktui kan, daltui limtak a kichawm vah in kikhen ding kuan huntawp in ice cream vot dikdek lolou toh nikhatni hunzoh ahi.
Ni masa ni ahihman in office kaite suty ni hikei mahleh nu-le-pate’n a tate uh zingdak 9:00 a devotion lap ding in amau lemtang bang chiat in hongkha siausiau ua, a man lemtang thei bangzah hiam in a tawptan program uap thei uhi.
Delhi summer laitak a hichibang program neih ding naupang genlouh a lian leh pichingte adia gel hileh bang a kichi de aw, ami di I omzou mah de aw- chi in ka na suangtuah kha zenhouh hi. Hinapi’n naupangte kilawp leh nuihmai siausiau chiat a hongtung zungzung ka muh a, a mel ua litna leh huphulhna kilang hetlou a neu leh liansim sim te ka etzui lai in – hiai naupang neute bang na hihkei uleh vangam na lutkei ding uh – Jesu’n a chih ka phawkkhia hi.
Ni nihni (June 23) ni hong suak a, hunchiam lap ding kia hilou, ni masa a thu kigen zaksate ban theih utna leh Khasiangthou nasep tungtawn a kilawpna thak toh ni masa sang a 12 vel a tamzaw in naupang hong kibehlap hi.
Hun kizang, thu kigen leh la kisate a kihel thei pawl, nektak saite panpih pawl, Pastor qrts. a chialpi pailel adia thumkhawmna hun manpha na zang ding pawl chi a kikhen tham ding piching bangleng hunkhop kipha thei hi.
Toupa min kilohna leh A khasiangthou ngaih mahmah hun in Setan leng val lua kisa ahidia, ama hihtheih khom in naktak in chialpi pailel nongkai sak sawm hamtang ahi chih a ninihni in a telmite’n kimu thei hi. Zingdak 9:00 a devotion pat hun in sound system hong paithei kei mawk a, bangziak hiam chi a a ki-etzui leh Ama zan a electric fluntuation ziak a kangsia banghiam na om a theih hong hita. Hichih hun a dia Pathian program kilepfel dan kimukhe nawn khat tuh – devotion pitu Pastor Kamzamuan na hikha geih. Amah aw ngaih, sound system lou a leng zaktham mahmah aw hoih nei ana hikha sawnsawn hi. Worship Band in kidam hetlou leh sit neilou kei in la hon makaih ua, electric mit ahihlam mangngilh in a om man hial hi. A langkhat ah tunglam apan lumsim mahleh hon mut hiauhiau ding huih hawmzaktu ceiling fante kipeilou ahihman in salam ah thawmhauna riau khat a om veve hi. Banah, Ni masa banglou in zingdak 10:00 vel in transformer apan supply pekhetu guipi kat tan ziak in electric hong mit hi. Nipi lam chia nikhat a khatveita a mit zel mah hi chi a kilungmuan in hunzat a ngeina bang a sutzom touh in om hi. Tea break hun tan in leng electric hong vak takei a, naupangte bang aknou tuikia bang thei pawl hong om hial ta hi. Huchi hinapi in ka ning,pai ni chi a kibawl kuamah zak ka neikei a, thupi in etton tham ching uh ka sa mahmah hi. Lunch tan a leng hong vak nailou, nektak sai meisa tawng nute leh tuailaite lah san pimpiam ta mai, kuangsilna leh ninhahna vanzat TUI lah tanky a beita, electric vak chia pump theih pat ding ahihman a kho-ul tui a maiphiat piampiam kawm in pang uhi.
Sunnung dak 3:34 in awl in ceiling fante hong taang ua, nuisim hauhau a ki-en tuah a ompawl, kipak a biakin sung a kikou pawl bang a ki-om man phial hi. Ze-etna leh etkhiakna chikhat zaw hipeuhmah in ka um tinten hi. Hichibang a dakkal 5:30 mawngmawng Delhi nipi laitak a electric omlou a, thu kigen leh la kisate phur leh kilawptak a gen a sa ding in ei mi piching leng I kingaihtuah ngei de aw ka chi hi.
Hiai bang a ze-etna tuah hun in naupangte sang in nu-le-pa a trawiawm te’n I insung a AC hiam, cooler ON a om hithiat ding a kingaihtuah zaw din ka gingta hi. I gal ngaihtuah lel a lungkim zoulou in, pai mai ni chi in I sakhau a I gari (bike, Car) chabi sawkkhia in inkong lam zot a baih mahmah din ka gingta hi. Amau (naupangte) pai sawm hiam, khua lum sakluat ziak a lungke mel muh ding mahmah omlou, tawp a group wise a photo shot bang leng san tinten, nom nipnep leh tuikia bang mahle uh nuihmai siuseu chiat in ki-post thei lai zomah uh ei.. I tate apan zillai manpha Toupa’n honpia ka chilou theikei hi. Etton tham ching naupang manpha ahi uh.
Hiai ni nanana zaw, A raplak dan chu MAIZEN, hitop mai..
