“Nungzuite Bawl Un” Matthai 28: 20
Kum teng a kinei gige EBC Kumsim Khawmpi a 63na December 3-6, 2011 sungin Bungmual khua ah nuam leh manphatak a neih in om hi. Hiai hun ah Khawmpi palai India gamsung mun tuamtuam apan paikhawm Pastor leh Upate 746 pha uh a, Kingen (leave) 80 om in, palai khawmpi a tellou 135 om uhi. Ei local saptuam apan Pastor V Nenglian, Upa Damsawmthang , Upa Dr Langkham leh Upa Chinsum te va tel uhi. Khawmpi paidan leh vaihawmna a thupukna theihtuak khankhat i taak lang ding.
Thugenna- Khawmpi sungin mipi kikhopna hun 5 leh zing devotion hun 3 om hi. Hiai hunte ah thugenna om in Pastor 8 ten hun khat chiat zang uhi. Khawmpi thupi “Nungzuite Bawl Un” chih ahih bangin Nungzuite bawl dingin nungzui muanhuai hih ki phamoh hi chihthu uangtakin ki gen hi. Khristian hoih hih ding leh Gingtu hoih hih ding ki ut chiat a, himahleh, nungzui muanhuai hih ding tamtakten ki ngaihsun phalou hi. Hun tamtakah Khrist nungzuite bawl lou in Khristian ding kia bawl in Gingtuten hun tampi, tha tampi leh sum-lepai tampi ki sengta hi. Tuni apan eite Khrist nungzui muanhuai hi ding in leh tuabang a Khrist nungzui ding mite bawl dingin hanchiam tek ni.
Vaihawmna- Seppatni leh Sepnawnni (Dec. 5-6) nite vaihawmna hun (Business session) in kizang hi. Hun masa ah kum khat paita sunga Palai hon sihsan mi 13 leh semtu hon sihsan mi 3te suunna General Secretary makaih a neih ahi. Kiteelna hun ah Khawmpi 64na Ulian ding in Upa Langzathang, Upa Khaithang, Upa Lalthanghlun leh Upa Paukhansiam te teelching in om uh a, BOT (2012-2014) vaipaw ding teelna ah Upa Langzathang, Upa Dr Chinkholian, Upa M Ginzalian, Upa G Thangchinlian, Upa L Tualthang, Upa L Khamzachin, Upa T Khaithang, Upa Dr Tualkhankham, Upa H Chinkhanneng, Upa V Ginchinpau, Upa V Vungzapum, Upa Joel G Hangzo te teelching in om uhi. Khawmpi in Tualsung saptuam ding thak Karbi Anglong Field ah 2, Munhoih New Lamka ah 1 leh Kolkatta ah 1 te pomna nei hi. Post creation leng bawl in om a- Missionary ding -5, Pastor- 2, Evan Teacher- 1, Jr Lecturer GBC- 1, leh GBC Registrar ding- 1. Supplementary Budget 2011 dingin 1 Crore pomna nei uh a, Kum thak 2012 budget dingin 10.5 Crore pomna leng nei uhi.
Khawmpi vaihawmna hun a agenda paisuak lou khenkhat-te- Khawmpi structure bawl thak a Pailai tawmchik ten kum tenga vaihawmna neih jel ding kichi paisuak lou in a ngeidan mah zuih phot dia thupuk ahi. Tua banah, ei local agenda te- Dan siangthou a kiteenna sai dan leh Thununna saidan te et thak ding chih leng puuk lou in a ngei banga pai takdih phot dingin thupuk hi.
Khawmpi bei nung December 7, 2011 nitakin Director Ministries makaih in Pastor tengin consultative meeting Dorcas Jubilee hall thak ah nei uh a, tulai a thuthang setan biakna kichi bangchi lel hi hiam chih gen khawmna leh thumkhawmna hun manphatak nei uhi. Toupa Pathian in Saptuam mite hon hum jel a
i kipak mahmah hi.
