HONG PIANDAN
Saptuam in Pathian pomtak biakna hing leh gahsuahsem neih theihna ding in kumteng in Worship Orientation leh Motivation chihte kizang zel hi. Tua mah bang in saptuam in missions nnasepna a gahsuahsem ding ngimna in kumteng in Mission Sunday kizang a, hiai pen in India mallam gam a nnasepna a ngiimbiik hi.
Tukum 2016 a Saptuam Year Calendar a kibawlna ah hiai ni poimoh nihte neih hun ding hong kizom kha geih hi. Pathian in mihing' geelna tunglam pek ah deihna nei hi ngei ding a gintakna lianpi leh kiminna thuuktak toh, a kigawm a Worship-cum-Missions Motivation-2016 (WCMM-16) chih minvuah a zat ding in Worship Team leh Tualsung Missions Committee pangkhawm a gelkhiak ahi.
TUP-LE-NGIM LAIGIL
Hiai ni poimoh nihte hong kizom khak ziak a kithalawp guihna himailou in, a tup le ngim piching khat om hi. Saptuam in Khrist batna leh A Thupiak Thupi zuihna a kilangkhia, Pathian bekhawm pawlpi hih ding a mengmuhna ahi, chi hi (EBC Kiphuhkhiakna Dan Vision Statement, page A-3). Hiai mengmuhna tangtunna ding in Saptuam pawlpi'n tup-le-ngim chi nga (5) na nei hi - Pathian Biak Ding, Tanchinhoih Puanzak Ding, Kithuahkhawm Ding, Khrist Nungzui Bawl Ding, Nna hoihte Sep Ding, chihte ahi (EBC Kiphuhkhiakna Dan 2015, Article No. 3).
Hiai mengmuhna leh tup-le-ngimte tualsung saptuam a tangtun ahih a, saptuam in gah manphatak a suan theihna ding a mimal chihte Laisiangthou toh kituak sinsakna tungtawn a bulphuhthakna leh thapiakna hun ahih ding WORSHIP-cum-MISSIONS MOTIVATION - 2016 tup-le-ngim laigil ahi.
Hiai saptuam tup-le-ngimte tuh Saptuam khanna leh gahsuahna ding a khuampi poimoh ngen ahi ua, a poimoh dan uh kibang, a poukhawm gige dingte ahi uh chih a conviction ahi lai hi.
Tua bang ahihlai in, nouneltak-a, a vekpi ua sukha zoulou ding a kihih man in, tutung program ah, Biakna, Nungzuihna leh Missions sukkhak kisawm hi. Hiai teng thum hoihtak a i sukkhak leh adangte leng bangchi hiam a sukha khin kihi ding, chih ngimna leng ahi ngal hi. Hiai tup-le-ngim tomlak in, "Pomtak Biakna Hing leh Nungzuihna a Gahsuahna" (Johan 15) chih thupi in kiguang hi. Johan bung 15 in nungzuihna a gah i suan theihna ding a poimoh bangkim, Amah a om gige-na, hahsiangthou-na, a thupiak zuihna, khovel leh nungzuite kisai-na, theihpihna nna sepna chite a tuunkha vek hi. Huaiziak in biakna dik a kibulphuhna, nungzuihna leh tangthupha puanzakna a gahsuahna thu kisinsakna ding a Lasiangthou kingakna hiding in aki telkhia hi.
