La Phuaktu : Rev. H.P. Runremthang
Key G
Khros thuzaw mangthang lelte di’n haina ahi,
Hotdam tate dingin thil hih theihna ahi;
Aw khros mite’n musit in hon pampaih mahleh,
Kei di’n ka damna khros ka siam tanna na hi.
Sakkik:
Nuamin ka puang zel ding,
Nuam in ka puang zel ding;
Ka damna Jesu Khros tanchin hoih
Suanding dang ka neilou
Gending leng ka neilou;
Ka damna Mang Jesu khros
Tanchin loungal zaw.
Ka pilnate zangin damna kana zonga,
Ka theihnate zangin Ana kana seem a;
Hizong kamu zoulou khamuanna bukim zaw,
Ka damna zaw Toupa khros thu kia ana hi.
A thupina kumpi lukhute suahkhia in,
Thildang tengteng taanin kei ahon telta hi;
Kenleng ka metzawkna ding thilte taisan in
Ka mang leh Tanpa ngei ka teel zawta ding hi.
Huihpite hongnung in suangpite a kham a,
Puanzak kek paisuakin khovel amial zou a;
Hichitela thilhih thei khros sihna thupi’n,
Khelhna sala tangte zalenna a peta.
