Missions / TBMC

Tualsung Baptist Missions Committee (TBMC)

Kum 1996 apan in tualsung saptuam in Missions nasepna uangbawl sem a, thuk zaw sem a Mission nasepna paipih tupna ziakin Tualsung Baptist Missions Committee (TBMC) kiphuan hi. Committee member 15, mipi teelthoh kinei a, amaute term khat kum 3 zel ahi.

NASEP DING TANGPI/SEP DINGTE:

  • Missions Nasepna a dia thumna etkai ding.
  • EBC Missions nasepna hatsak a phungvuhna ding in Missions fund pe ding mite zong in, fund kaikhawm in HQ ah khak ding.
  • Missionary te hanthawnna ding in lam tuamtuam ah panla in HQ ah missions nasepna enkaite toh kithuzak a sem ding.
  • Michih in missions lungsim leh hinkhua a neihtheihna ding un kisinsakna a enkai ding
  • Headquarters tawh kithuzak gige kawm a nasep ahi.
  • EBC saptuam pumpi mission guideline zui a nasep ahi.
  • Saptuam member chihte khamangthang matna dia nasepna a a teltheihna ding uh ngimna in amaute kiang a Pledge Card hawm in gammial nasepna ah hunlem ki bawlsak hi.
  • Missions Motivation hun poimoh tak "Missions Sunday" chih min vuah in program manphatak zat zel.

TBMC ACTIVITIES KHENKHATTE:

A. MISSION FIELD VEHNA:

  1. Nepal Mission Field Vehna (4–10 June 2014): TBMC in Nepal Mission field vehna, 04 June apat 10 June 2014 sung nei hi. Hiai hun in Saptuam mi mi 24 kihel ua, Nepal Mission Field sung a Saptuam/Biakinn 37 om lak ah, 12 – Kathmandu, Birtamod, Shantipur, Budhabare, Chisang, Kirtipur, Pathari, Damak, Parajungi, Bashbere, Dharampur, Bhuttabari – leh Rev. Kamginthang’ etkol Grace Children Home, Kathmandu te vehna kinei hi. Khua vehnate ah Saptuam te toh Pathian min a kithuahkhawmna manphatak kizang zel in, amaute kiangah kithuahpihna thilpiak kipe zel hi.
  2. Dhemaji Mission Field (12-18 Nov 2019): Cross Cultural Missionary (CCM) 8 leh Native Contract & Casual Evangelist 12 omna, Dhemaji Mission Fied vehna TBMC in, 12-18 Nov 2019 sung in kinei hi. Missionary te luttheihna khua 13 om lak ah Visiting Team-te’n khua 8 – Namgharia, Pitiyang Chapori, Amguri, Kapurdwa, Dimaruguri, Maj Bandena, Lachangaon & Dokhin Chapori – te vehna nei hi. Amaute toh Pathian’ min kithuahkhawmna hun nuam leh manphatak kizang in, Field te zat ding Keyboard Yamaha PSR-S670 banah Missionary te zat diing Sleeping Bag 6 piakna leng ki nei hi.
  3. Karbi Anglong Mission Field: Dhemaji Mission Field veh zou in, 19-22 Nov 2019 sung Karbi Anglong Mission field vehna neih zui ngal ahi. Amau khe a ding dia kisa lel ahihman un, field piching mahmah khat ahi a, kikepna lam ah leng ana piching mahmah uhi. Saptuam/Fellowship 17 a om banah Saptuam (Field) School leng 6 hoihtak in enkol uhi. Visiting Team in School 3 leh Saptuam/Biakinn 4 vehna neih in, school naupangte toh Pathian min a kithuahkhawmna hun leng kizang hi. KAEBC te Secretariat office complex a fencing bawlna di’n Rs. 45,000/- huhna leng ki pia hi.

B. KALSUAN KHIAK KHAKNA KHENKHATTE

Mission Field te vehna banah Tangthupha puanzakna ah TBMC in hihtheih bangbang in pan kila zel hi. Delhi & NCR a Christian NGOs/Agency tuamtuamte vehna leh kithuahkhawmna TBMC in avangkim in nei zel hi:-

  1. Moonlight Ministry: Muslim te laka Tangthupha puanna’ nasepna Evan Paul Pauzakham patkhiak ‘Moonlight Ministry’ vehna in vehna kinei zel hi. Hiai hunte ah Pathian min a kithuahkhawmna neih ahih banah, Pastor/Adviser in Ministry adi’n thumsakna hun zang zel hi. Banah, kithuahpihna sum leng piak zel ahi.
  2. Shakti Foundation: Pi Nemlianching etkol, Shakti Foundation vehna leng kinei zel hi. Hiai Foundation in khosakna niam zaw leh slum area laka naupang omte lai hilh in, amaute kem in enkol hi. Pastor/Adviser in amaute a thumsak banah TBMC in kithuahpihna sum kipe zel hi.
  3. Grace for All Ministry: Pastor James Chinjemvel patkhiak Grace for All Ministry (GFAM) vehna leng kinei zel hi. GFAM in Delhi leh asehvel ah ahihtheih bangbang un Pathian gam na sem in, Sikkim leh mun tuamtuam ah leng khekhap nei in gamtang zel uhi. Pathian min a kithuahkhawmna neih hun in Pastor/Adviser in amaute dia thumsakna aneih banah kithuahpihna sum kipe zel hi.
  4. Deeper Life Ministries: Pastor Hengam etkol ‘Deeper Life Ministry’ vehna leng neih ahi zel. Amau Delhi leh asehvel a Gingloumi (Vaite) lakah Tangthupha puanzakna nna sem hi. Amaute toh kithuahkhawmna hun ah Pastor/Adviser in Ministries adia thumsakna nei in, panpihna sum leng kipe zel hi.
  5. Rebuild & Restore: Mi kingaisia, lungkia leh mahni hinna tanpha kilak leng poi salou ding khop hial a omte counselling bawl ding chih apaipih uh ahi. TBMC in hiai centre vehna avangkim in kinei zel hi. Hiai hunte ah Pastor/Adviser in thumsakna a neihsak zel banah thilpiak piakna leng kinei zel hi.

C. KUM TENG ZAT GIGE HUN POIMOHTE

  1. Missionary Day zatna: Manipur simtum a Tangthupha hong lutni, 7 May chi a chiamteh ahih dungzui in, ei Saptuam in mun tuamtuam ah hiai hun zatna kinei sek hi. Delhi ah hiai ni pen Holiday ahihkhak louh ziak in, May 7 toh kinai penpen Pathianni in Missionary Day kizang zel hi. I gam a tangthupha hong lutdan leh i hamphatdan te uh ki theihthaksakna bang, Missions a poimoh dan kihilhna hun bang ahihkeh, kipahthugenna hun bang in kizang tangpi hi.
  2. Mission Sunday zatna: Local Saptuam Mission nasepna lam a kihanthawnna ding bang, kihihhatsemna ding bang, ahihkeh, panlak theihna di tuamtuam omte kihilhna hun tuambik neih lunggulhna ziak in, Delhi ah Mission Sunday kumteng in khatvei kizang zel hi. Ani/akha ding fix a om kei a, TBUC/Ministerial Committee toh kithuzak in, ani ding ki fix zel a, Saptuam Year Plan/Calendar a tuangsak zel ahi.
  3. Bible Sunday zatna: Saptuam te Laisiangthou sim, zil leh theih poimohdan kihilhna leh Laisiangthou theihna lam a Saptuam mite akhansem theihna ding uh ngimna in Bible Sunday kumteng in khatvei kizang zel hi. Hiai leng a ni ding fix sa a om kei a, Year Plan/Calendar a hun lemtang piak hunhun a zat zel ahi.

D. MISSIONARY TE HANTHAWNNA

  1. Missionary te thumpihna: TBMC in Prayer Card bawl in, tua ah missionary te min gelh in, Pathianni Biakinn kikhop khateng a nipini kal 3-na ah thumpihna kinei. Mahleh, HQ in WhatsApp group a niteng a Missionary thumpih ding hon kizen zaw in, niteng a amaute adia thumpihna kinei thei zel ahihman in, prayer card te kidinkhawl phot hi.
  2. Missionary te hanthawnna thilpiak: Kum 2022 Christmas hun kuan in, TBMC in EBC Missionary teng kiang Christmas Card/laithon leh Gifts (cash) piakna HQ leh FS tawn in kipe chiat hi. Toupa hiai thilpiakte A vualzawl a, amaute adia hanthawntu leh hihhattu ahih ding ngimna liauliau a hiai bang nasepna neih ahi.

Plot No 16, Pocket 6, Dwarka Sector 1A, New Delhi - 110 045
Phone: +91-9862741044 / 87309 91331 | Email: pastor@ebccdelhi.org