2 Kor.6:17-7:1-
17Huaijiakin, A lak ua kipanin hong pawt unla, a tuamin om un, thil sianglou himhim khoih kei un, Toupan a chi, huchiin, kon kipahpih dia, 18Nou din na Pa uh ka hi dia, nou leng kei din tanu tapa na hi ding uh, Toupa bang kim hihtheiin a chi.
1Huchiin, deihtakte aw, huai thuchiam i neih jiak un, sa leh kha buahna tengteng ah i kisiangsak ding uh, Pathian laudan siam kawma siangthouna hih kimin.
Toupa'n hunpha hon piak leh zingchiangin L/Upa Capt. (IN) Lalsuonglien Tonsing leh a sungkuante'n Delhi nusia in Mumbai ah hon paisan phot ding uhi. Bangtan huai mun a va om ding uhiam chih thei kei mahle hang KIKHENNA chi khat ahi peuhmah phot hi. Saptuam ah mi' honglut chiang un i kipak mahmah huchi bangin a hon paisan ding chiang un leng i kipak mahmah hi. Amaute ei'laka a om nawn louh ding uh kipak hilou in Toupa khualzin lel ihihlai a amaute hun bangtan hiam Delhi saptuam a hon omkhawmsak ahihman in i kipak ahi zaw hi.
Tuni'n Kikhen a poimohna gen leng chin kong kisa hi. Huai bel Khawvel toh gingtute kikhenna ahi.
Bible text a kigen kikhenna tuh chituamna leh kibatlouhna genna ahi. Separation = a place, line, point of parting. Khenkhiak a omna, tuam omna ahi. Himahleh, Bible in hiai text a agen nop bel chituamna leh kibatlouhna ahi.
Khawvel ichih bel leitung i tenna leh a sunga omte genna ahi pah a, huai banah, universe- huihkhua genna leng ahi. Huai bel Pathian thilsiamte ahi. Bible in khawvel a gen chiangin a hoihlou lam kawk in, khelhna leh gitlouhna toh mekmat in a gen sek hi. Huchih laiin, Pathian in khawvel it mahmah hi. Huai bel a thilsiam te it mahmah chihna ahi, a khelhna a huat mahmah laiin.
1 Jn. 2:15-17 ah- 15Khovel it kei unla, khovela thil omte leng it sam kei un. Mi kuapeuhin khovel a it leh, Pa a itna amah ah a om kei hi. 16Khovela thil om tengteng, sa utnate, mit utnate, dam sung thupina limte khawng Pa akipan ahi keia, khovel akipan ahi zo ngala, 17Khovel, a utnate toh, a mangthang lellel ahi. Pathian deihlam hihmi bel khantawnin a om gige ding hi, chi hi.
Thupiak- Hiai khawvel apan pawtkhe dia thupiak in i om uhi. Khelhna thilhihtheihna apan, gitlouhna apan, leh hoihlouhna chiteng apan pawtkhiak ding genna ahi. Huchi a, a tuam a om ding, thil sianglou himhim khoih louh ding. Pathian' deihdan toh kikalh himhim hinpih louh ding. Hiai tuh thupiak khauh tak ahi.
Thuchiam- Pathian in thupiak a hon piak chiangin A'thuchiam in zui jel hi. Huchi a gingtute khawvel toh kikhen a hinkhua i zat chiang in Pathian' kipahpih, welcome in i om ding ua, amah tuh i Pa ahita ding a(caring), eite tuh a tanu tapa te ihita ding uhi- gouluah tu.
Pathian' thuchiam muanhuai te ei' a hih tangtun ahih theihna dingin a thupiak te i limsak mahmah ding uh.
-----------------------
March 30, 2014
