Sorry no Audio, only script.
Penticost Day 2011 Message
By- Upa Dr. Langkham
Pentecost Ni
Bible pansan: Nasepte 2
Pentecost ni – hongtun ni
Tu Pathianni (June 12, 2011) Saptuam ten Pentecost Ni chi’n i zang uhi. Jesu Khris hankhuksung pana athohnawnna ni a kipan ni 50 chinna ni, Pathiana kiapna thawnpiak chiam, KHASIANGTHOU hongtunna ni ahi. I saptuamte’n KHASIANGTHOU in hong vehna ni a thaka lung gulhna tawh in hiaini izang zel uhi.
Thumna la
I la lui mahmah uh khat, Khasi Hymn Book a kipana ki teisawn “Khasiang in hong halhsak ve aw, Toupa Jesu min in” Biakna Late 291 na sain KHASIANGTHOU in a thak a hongvehna ngen in hai thuman la sa khawm leng ich hi. I saptuam ah tunai zek a Toupa hongvehna natang numei pasal bangzah hiam i om chih itheia, tuate hon mkaihnatawh hiai thumna la sa isa khawm ding uh.
KHASIANGTHOU vehma in nungzuite lungsim munkhatpu in om uh
Nasepte Bung 2 chang khat Paite LAISIANGTHOU sut nanung penah hichin a kigelhi hi: “... nungzuite lungsim munkhat pu in munkhatah a omkhawm uhi”. Lungsim munkhat putna nei a thumkhom leh kipolkhawmtelak ah KHASIANGTHOU a hongtung chih imu. Ei saptuam miten lungsim munkhat pu in ihong paikhawm uhia? I Local Committee ten lungsimkhat pu in i vaite KHASIANGTHOU deihdan zong khom i hawm uhia? Tuabangmah in Dorcas Pawlte, Tuailai pawlte, Naupang pawlte, Missions Committee te, i committee sungah lungsim khat pu in i om uhia? Ki en thak ni. Lungsim khat pulou, kingailou, kigense tuah, ki thulaaktuahlou, kikalh, kihehsan , kiiplah tuah, chih khawng in i om uhia? Pa Pathian, Tapa Jesu Pathian leh Pathian kichimat leh kituaktak in a om uhi. Hiai ahi ‘fellowship’ kichi. Kichimatna chidam, kiituahna leh kithuahkhomna nuam ah KHASIANGTHOU Pathian a hongtel ut in a hongtel zel hi. Nupakal ah, inkuansung ah tuabang kichimatna chidam in ei uhia? Huaibanga khat leh khat kichimatna damlouin KHASIANGTHOU tawh ikichimatna a dal thei hi. Huaiziak in i lungsim sung chiat uah tua izak uh thute in kivel ni, KHASIANGTHOU in i saptuam, i committee le hi inkuan sung honvehna dal tu ihi kha ding e! Tuabang a omleh kisikni, ngaihdam ngen ni. Jesu sisan in tumah mah in kisilsiangni.
KHASIANGTHOU lamdangtak a hongtung
hongtun dan en tuni a tung bang in le. Tuni in eilak bang ah tua bang thil hongtung/ hong om hileh khovel in lamdang a sa mah mah ding. Huih hattak ging bang in van apan in thom ging a hongtunga. Tua lai thiltung tunia Dwarka EBCC Biakin a hongtung hileh khovel patau mahmah ding un kagingta. Scientist ten ‘Tsunami’ bang khat van apan hong om danin a mu maithei uhi. Vana pan huihpi hattak bang aging lawilawi hong om India tung ah a mu di ua, Delhi tung ah, Dwarka ah’ chiin ana enzui ding un a gintak huai. Thil mulkimhuaitak hongtung dek bang ana mu ding un gintak huai kasa hi. Bangthil mulkimhuai hongtung dek a hi maizena, chiin ana patau ding un ka gingta hi. I Biakin kong khong ah Disaster Management te khong First AID pedin hongtung mai dia uam? Meikang phelh ding chi in Fire Brigadre gari peuh hong om mai diam? I kim ikiang aom kol leh vaiten lamdangsa in hong tai lut di uam? En bel i Pathian biakin bangkim tunga thuneipa ahihziakin ama adin ahaksa khat leng a om kei chih ithei uhi. Meikuang lei bang a kihomziap ziap in nungzuite kihopna ah omte tung ah a hong tu hi. Amaute mei in kang lum lou. Sadrach, Mesak leh Abednago te banga mei kuang in kang lum lou, a samzang khat uleng kang lou in mei kuang leh thomgingte sukbuai vet lou in a om uhi. Jesu nungzuite a dia tua bang thillamdangte buaina hinonlou hi. Azuihpa uh Jesu tuitunga paipa hia, damlou chiteng damsakpa, hana pana ‘Lazar, hongthou in’ chia haankhuk sung a pan asisa Lazar kaithoupa ahi. Phet lu in asihnia vante hong mial mu ua, haante hong kihonga misisate hongthou khia uh ahi chih thei ua, nithum leh zan thum haana a omnunga sihna zoua hong thounonpa a makai pa uh hiven. A thoh non nunga muntampia kimuh ua, ni 10 vl paita a amitmuh ngei ua vana laktouha ompa a heutupa hiven. Huaiziakin hiabang hil lamdangten amaute asubuai nawn kei uhi. Amaupau zat ngeil hilou ahong pau ua, akima kiang hongtaikhomtenleng amau pau chiat in ana za zawmah uhi. Babel insawng lamlaia pautuam tuam bawlpan Pentecost ni a pau kitheihtuah theihna honbawlzual mah abang hial hi! Pathian paute bawlpan azatute hiam apaukhetu hiam zanga thugente theihsiamdia bawl theilaw mah mah ahihi. Tuabang Pentecost tuni hong hileh ikim ikianga om, Haryana khong, Rajasthan khong, Bihar leh UP khong a hong kipanten leng amau pan chiata za thei mai a hi uhi.
Bang gen in nungzuite hongpau khia ua
Bang a gen ua – angaikheten bang za ua - chih a thupipen ahi zaw hi. Pathian thupina te a genkhia uh. Pathian thil hih lamdangte a gen khia uh. Pathian hoihna te a gen khia uh, Pathian itna, Pathian chitna leh migitnate khong gen uh a hi ngei ding. Vanglian Pathian thupina amuh un amaute lamdangtakin Pathian phat utna pia hi. A zatuten lamdang asa uh. Mikhenkhat in zukham uhia a chi hial uhi.
KHASIANGTHOU a dim Peter, KHASIANGTHOU hat khum LAISIANGTHOU thute zang in KHASIANGTHOU in nasem
Huan Peter leh sawmleh khatte hong ding khia uhi. KHASIANGTHOU adim Peter en ni. Lauhna om nawnse lou ( khanih le pailoua lah numei Jesu na kitheihmohbawlpa ahi). Hangsantaka leadership honla. Pathian kha in agelhsak LAISIANGTHOU thute amun leh ahun a kituak geihgeihding hon genkhia. KHASIANGTHOU in agelh LAISIANGTHOU zanga KHASIANGTHOU a dim Peter muk leh kam zanga KHASIANGTHOU in thu ahon gen chiang in, mite KHASIANGTHOU in theihsiamna pia hi. KHASIANGTHOU in akhelhnate uh kiphoksak. KHASIANGTHOU in kisikna pia. KHASIANGTHOU in bang a kahih ding uh chia hotdamna tang nailou mite patausak. KHASIANGTHOU mah in hinna pia. KHASIANGTHOU in amaut hongsungten khum a aluahdim chiang in KHASIANGTHOU baptisna thupitak hon tang (hon experience) uhi.
Eilak ah Pentecost hong tung hen
Tuabang KHASIANGTHOU nasepna eilak ah, imimal lak ah hong tung i deih in ilung gulh mah mah hi. Hiaithu nazak laitaka KHASIANGTHOU in nalaka thu hongena, KHASIANGTHOU na khelhna te a hon kiphoksak keh, kisikinla, Jesu Sisan a siansakna ngen inla, kisilsiang in. KHASIANGTHOU nang a hong tengin hong luahdim nuam gige hi. Isai in agen bang in, Pathian hotdamna i bat phaklouhdinga gamla hilou in ikhelhnaten hondal uh hi zaw hi. Jesu Khris sisan man pha in tu mahmah inleng na kisil in. KHASIANGTHOU in nanga ding Pentecost a hontun ding hi. Unaupa Khamthawng in ‘ nang mah a namite a kipah theihna ding un, vanlaukha siangthou hong veh in “ chiin la ana phuak hi. Toupa na kipahna, na lung damna, na lungtaina, na nopsakna, tunin a daai in nathei hia? Ki enni. Toupa KHASIANGTHOU in Jesu sisan tungtawn in in in ihinna hong silsiang henla, eaten ina mansak taakun , i biak Pathian tawh kithuah nop isakna, i kipahnate tuni Pentecost ni zat tawh kitonin l lak hong tungta hen!
