Notes
MISSIONARY LUNGPUT
(Missionary Motives)
2 Kor. 5:6-15
# Christian tengteng missionary di’n hon sam...
# Christian tengteng missionary ihi thei mah ding uam? Bangchi’n?
Alban Douglas- Christian tampite’n Pathian in Bible School a kai ding in hiam, full time a mission nna sem ding in hiam, sam hileh missionary nna sem thei pan dingin ki ngaihsun uhi. Tua banga sapna a ngah mateng uh missionary nna sem thei di’n kii ngaihsun lou uhi, chi hi.
Missionary lungsim pulou in kuamah in missionary nna sem thei lou ding uhi. Missionary lungsim pulou gingtu tamtak ten mission nna semsem napi in a sem khalou kisa uh a, tuamah bangin missionary lungsim pulou gintu dangte’n mission nna sem khalou napi nakpitaka sem hi’n ki ngaihsun leuleu uhi.
Bangchi le’ng missionary lungsim pu thei ding? Or missionary lungput kichi bang hi hiam?
1. Missionary nna Phutluih nna ahi chih theihchetna- (v.14)
Khrist itna in hon sawl teitei ahi, chin Sawltak Paul in gen hi. Sawl teitei= compels , urges forward. Utdan leh nopsak dan tan kia hilou in, sawl teitei a omna nna tuh missionary nna ahi a, tua nna lungsim a neihna missionary lungput ahi.
Naupan laiin, nu-le-paten laisim dingin hon sawl teitei sek uhi. I ut nawllouh nungin leng, i peih nawn louh nungin leng, hon simsak teitei uhi. Phutluih ahi.
Sawltak Paul tuh Jentelte lakah Khrist tanchin hoih gen dingin Khrist itna in sawl teitei hi. Missionary nna tuh sawl teitei na, phutluihna nna ahi.
2. Khrist Lungtaisak ding Lunggulhpen a neihna - (v.9)
Gingtute’n i hinkhua a lunggulhpen a i neih ding tuh Khrist lungtaisak ahi. Khrist kipahna nna sep ding, tuabang a hinkhua zat ding ahi.
Tulaiin, Govt. telin, private firm tuamtuam a semte’n i lunggulh masa tuh i boss-te lungkimna nna sep khak ding ahi. Nna kipia peuhmah boss-te deihdan a sep khiak ding ahi. Tunga heutute’lungkimna tuh eimah kipahna ahi. Tuabangin, Khrist Jesu kipahna ding lunggulh pena neihna tuh missionary lungput ahi.
Violin siam mahmah numei naupang in show a neih laiin mipi kipun khawm ten nuamsa in kipahpih mahmah uh a, amah kipahpihna in khut beng in ngaih taktakin kikou zuazua uhi. Tua mipi kipakten naupangnu kipaksak zoulou uh a, himahleh, a nunglama tu mi khat (a heutupa=teacher) kipak a, khut beng kawm a, hong din khiak takin naupangnu tuh kipahna in hong dim thei pan hi. Jesu Khrist kipahsak ding lunggulhpen a neihna tuh missionary lungput ahi.
3. Mahni a dinga hing hilou kitheihchetna- (v.15)
Gingtute eimah adinga kia a hing hi nawn lou ihidan ki theihchetna tuh missionary lungput ahi. Eimah kia kikhual khual mai, i sep, i geel leh ngaihtuahna tengteng eimah le hi inkuante hamphatna ding kia ahih in bel missionary lungput ki pu nailou ahi chihna ahi.
Alban Douglas in- Canada a firm liantak nei a lohchingtaka nna a sepsep lai in, amah a ding kia a hing ahihlam hong ki theikhia a, China ah missionary di’n hongkuan hi.
Eimah adding kia a hing hilou, Khrist itna ziaka midangte’adinga i hong hin theih hun chiangin missionary lungput nei i hong hi pan ding hi.
Tuni’n Toupa Pathian in missionary lungput pu thei chiat dingin leh tuabanga hinkhua manpahtaka zang thei chiat dingin gingtute hon vualzawl chiat hen aw.
