ZANKHOVAK THUUMNA: EBCC DELHI saptuam in tukum sung in zankhovak thuumna nihvei neih sawm – March 10-11 kawmtuah, leh Oct. 1-2 kawmtuah in. Nisim 10.3.2023 (Sintawpni) nitak dak 9:00 apan Kiginni zinglam dak 7:00 tan Biakinn ah TOUPA sapkhawmna, a khatveina om diing. Huai hun in Tual Upa mi 10 in makaih deuh diing uhi.
Hiai hun in thuumna diingte alompi a khen in: Mimal (i hinkhua leh innkuan dinmun), i minam sung, gamsung (India) leh leitung maikaih khodaak kawm a TOUPA sapkhawmna hi diing hi (Jer 33: 3).
ORDAINED PRAYER FELLOWSHIP-01: Tukum saptuam year Calendar a, ‘ordained prayer fellowship’ kha khat a khatvei neih zel diing chih guan a om, sepkhiakna in Feb. 25 2023 (Kiginni) zing dak 8.30 in Upa H Kam Suanthang’ quarter, Hudco Place Extension ah Pastor leh Upate’n na nei uhi. Hiai hun in mi 15 lamet lak ah mi 11 paikhawm thei ua, paikhawmte’n nuamsa in, zang manphalai uhi. Tua hun in Upa KST’ quarter pansan a AIIMS doctor hong naih Rev Dr. Gin Neithang Ngaihte vehna leh thuumsakna leng nei ngal uhi.
MISSIONS SUNDAY: Pathian’ ompihna kilam-en in, 12 March 2023 chiang in “Giving is Blessing” chih thupi zang in Mission Sunday zat kisawm hi. Zinglam biakna kikhop ah Rev S Nengzakhup, Director, NECTAR in thugenna hunpi zang dia, nitaklam in Pastor Dr Suankhanhau Gualnam, Adviser in thugenna hun zang diing hi. Hiai kikhopna tegel ah Missionary Vakna lai hawmna leng a om diing.
Missions nasepna ah kalsangzaw suan dia kisingsa i hihlai un, tulel a i tunna leh dinmunte kilamlahna ban ah mission nasepna lam a kihihhat sem dia kihanthawnna dia Mission Sunday zang gige i hihdan uh thei kawm a, Toupa’ ompihna tangkhawm diing a thuumna toh kisakhol a, a tamtheilam kihel chiat di’n I kichial thakthak uhi.
BYF CORNER: I saptuam a hon chial dungzui un Zomi Christian Fellowship (ZCF), Delhi-te’ 41st Annual Thanksgiving Day kaal paita 26h February ni a a zatna uah BYF in lapawl sa in va ki-uap hi. Senior Pastor in leng hon nungthuap hi. Hiai hun a thupi ‘Experiencing the presence of God’ (Exodus 33:14) ahi.
2. BYF Committee-te’n area vehna nei zom zel. February tan in Diktatna, Itna leh Ginna group-te committee in veh zouta.
3. Heutupa Lalboi Mangte, BYF Chairman, in sepna ziak in Manipur lam hon zotsan. Maban ah hong lamzan zelna di’n thuumna ah phawk ni.
