- Upa Tualzapau, Minto Road
Amasa pen in, hun manpha hon zangsak i biak Pathian kiang ah kipahthu om hen. A tuung in, mite’n buaipih sim chiilcheel bang mahleh, TBDF saina a tutung Evangelistic program kizang lel ah, Heutute tungtawn in Toupa’n thugen a, a vatel kha-kha, numei, pasal leh naupang tanpha in leng, nuamsa leh phattuampih chiat ahihdan uh thei tou zel ua, hotdam hih kitheichian leng hunkhop omta hi.
Heutute’n, kikhawmte kiang ah, ki-etphatna di’a Bible taang sim dingte pekawm in, khelhna thute, huai apan kisik apoimoh dan, khelh ngaihdamna, Jesu Khris mahmah in a sisan a hon tatna leh ginna thute leh adangdang chiangtakin sinsak uhi. Huchia, abul apan pulpit sermon leng hi tuanlou a, dinmun leh hihnate kikupkhawm thoh a, a-step-a-step a hon genchet ngiatngiat uh, hoihtaka paikhawmte’n a zak chiang un, “Eh! Ka thei chianta ve”, chi geih thei in, Toupa kiang ah kipahthu gen thei zel uhi. Toupa min phat in om hen!
Mayur Vihar area ah abul kipan a, Minto Road area hong tung in, DU North Campus lam tawn in, R.K. Puram lam manoh in, tangthupha pai lel hi. Hiai hun kizang tou lel ah, a totkhakna area-te kipak in phur thei petmah ua, program a telte adia nek ding, bread, biscuit, dahi, nahtang, sekkhum, dawnkhoh, mazel leh adangdang hon thoh om zel hi. Hiaite banah, dawn ding cold drink tuamtuamte hon thoh bang, singpi hon awm a, sun-ann ding hon huan zel bang om, gari hon thoh thei bang om in, a totkhakna munte ah kipiakzohna leh kipahna omsak zel in, a nutsiatsa lamte’n khelah giugiau zel uhi.
Hichi bang hun manpha kimu mengmeng lou ahihman in, ‘Hun om zek lai e’, chia lungmuang mai lou in, Mosi in gamdai a dalgul a khaikang lai a, a ente’n damna a ngah zel bang ua, a tel khate’n lungmuanna nei zel ahihman un, kuapeuh tel thei chiat dia kihih awngthawl ding in, i kideihsak petmah hi.
Mabanah, program omlaite hiai bang ahi-
- 30/05 11am apan 01/06 nitaktan Nu Chingbawi & family Inn, Munirka ah program zatna om ding.
- 02/06 11am apan 03/06 nitaktan Pastor Quarters, EBCC Delhi ah program zatna om ding.
Hiai hunte ah kuapeuhmah in mahni hun lemtang ana kibawl a ana phattuampih chiat dingin iki ngen thakthak hi.
