Youth Summer Retreat 2014:
Tuailaite a ding biik a Khalam kithuahkhawmna leh Pathian late a kisukhattuahna hi ding lametna toh Saptuam in Youth Summer Retreat 2014 Delhi pualam a neih ding BYF EBCC Delhi mohpuakna in koih hi. Hiai nna poimohtak sepsuahna in, BYF vaisaina in, July 16-19 sung YMCA Camp Site, Sattal, Uttarakhand ah 2nd Youth Summer Retreat nuam leh lohching tak a zatzoh in om hi. Hiai retreat program zang ding in EBCC Delhi apan Tuailai mi 70 Gari 2 in kikuan khia hi. A tangpi’n Laa lam leh khalam a kisukhatna (Choral Motivation and Spiritual Upliftment) hun in kizang a, sun hun awngkalte ah camp site kim a gammang leh dil kiang khawng a vak in hun kizang a, abik in khopi ngen a na khanglian tuailaite ading in muhnop leh kipahpih ding tam mahmah a, Pathian’ thilsiamte thupi dan kichiansak semsem hi.
Biakna leh Phatna hunte nuamtak in kizang a, Pastor V Nenglian leh Evan Khaikhuphang apan thutak ngaihkhiakna leng om hi. Evan Khaikhuphang in Jesu Khrist tellou hinkhua bangmah lou, mihingte sepgimna leh pilnate leng athawn mai ahihdan gen hi. Pastor V Nenglian in Pathian Theihna & Theih a Omna (Knowing God and Being Known by God) chih leh Niteng Hinkhua a Nopsakna (Enjoying Everyday Life) chihte thupi a nei in hunzang hi. Tuaban ah, thumna hun, salam - khalam hinkhua a puakgik leh hon dou theite, leh hinkhua a lohsam kisa a lam-et ding leng neinawn lou a lungke tak a omte adia suahtakna lampi om ahihdan kawkmuh in, amaute ading a thumsakna nei hi. Khasiangthou in hon veh a Jesu Khrist toh kituahna nei bang, Pathian’ min a hindan thak a hingta ding a kihanchiam leh kingaihsiatna sal apan suahtakna ngah ka hi chithei tuailai bangzah hiam om hi. Amaute ziak in Pathian’ min phat in om hen! Thumnate dawngtu Toupa Pathian in thupina tengteng tang henla, thumtute leh camperte adin vualzawlna hong hita hen aw.
