Toupa ompihna leh kithuahpih tang in, Nepal Mission Field vehna nuam leh lohchingtak in June 10, 2014 in kizou ta hi. Saptuam mite thumpihna ziak in hiai Nepal Field Visit Project lohchingtak in ki semsuahta ahi, chih iki zasak uhi. Hiai tan honpii Toupa' Min Phat in om hen!
June 4, 2014 Nitak in EBCC Delhi Saptuam mi 24 (numei 9 leh Pasal 15) Delhi nusia in Nepal (Kathmandu) kizuan hi. Long/overnight journey (both bus and train) ahihman in khualzin te'n gimhuai sa sim mahle uh, amun tuntak in tawlnate mangngilh theih di khop hial in nuam va kisa hi.
Nepal Mission Field ah, field office (HQ) simtel in, khua 32 val ah Tangthupha puanzakna nasep i Saptuam in sem hi. Tuate lak ah, khua/Biakna mun (Biakinn) 12 vel, ei EBCC Delhi te'n va kipha/sik hi.
Kathmandu ah Rev. Kamginthang in honna buaipih mahmah hi. Aman Kathmandu ah Grace Children Home / GCH (Orphanage home) hong a, tua mun a kinga in, nek-le-dawn leh giahna mun feltak in honna saisak a, amau inn (Home) pansan in, Kathmandu NEBCC Biakna mun (mi inn a kikhawm uh) vehna kinei in, amaute toh Biakkhawmna hun nuamtak kizang hi. Banah, GCH naupang te toh leng hun nuamtak kizang hi.
FS Office, Birtamod ah, Rev. Thawndoulian, FS in, a staff te toh feltak in honna vaidawn in, a poimoh bangkim honna sai fel sak uhi. Field Office a kinga in, Birtamod kiim a khua/Biakna mun 11 te vehna kinei in, amau te toh Biakkhawmna leh kithuah khawmna nuamtak kinei zel hi. I Local Pastor V Nenglian in amaute adi'n thumsakna nei zel hi.
Hun paisa a i nasepte:
Khrist Sepaih hangsan, I missionary te uh nasepna mit mahmah a va mu te'n Toupa' nasep thupi ahihdan tamtak kimu thei hi. Amaute adia ihih theih sunsun te uh Toupa'n thawnsak hetlou ahihdan ki mu thei hi. Kum 4 hiam paita a, EBCC Delhi in Nepal Mission field adia Langva/rangva (Dharampur NEBCC Biakinn tung khuhna di) i piak uh leng etna va kinei in, huai a Saptuam te kipak lo mahmah ua, gen khop phasak uhi.
Banah, BYF/EBCC Delhi in Missionary Day hun a Missionary te kianga a letter khak uh bang genkhop phasak ua, hanthawntu leh a nasep uh phawkpih ihihdante uh eite'n thuap hi a koih in, kipahna mittui luang hial in, kipak thei mawk uhi. Huaiziak in, thil neuchik leh thupilou dan a ina ngaih khakte uh, i Missionary te leh Mission Field te adia thupi lua ahihdan muh theih in om hi.
Report Piakna Kikhop:
Saptuam min a kalsuanna ahi a, Saptuam mipite kiangah report bukimtak piak ngai diing hi. Hiai dingin tuni Fathers' Day himahleh, kikhopna pen dakkal khat khawnga hihsau a, report piakna (or, response genna) hun bawl le hang, chih lunggulh in hong kisawm hi. Local Pastor tawn in, Ministerial Committee te kiangah hun kingen hi. Amau lem ahon sakpih bang un, tuni’n Report na, hun kibichilh sim mahleh leng, neih in om ding hi. Tunung in bel website ah limlak leh report kimsak muh theih ding. Hiai kalsuanna ah Toupa’n thupina tengteng tangta hen.
-Siampu Thomte
Secretary, TBMC
June 11,2014
