Kum Sulhei A Hong Tun Chiang In

Kum sulhei a hong tun chiang in,
Lungzuan thelbang thousak,
Ngailou leh kipak lou kuamah omlou;
I ngaklah Khristmas ni tuang a hong tung nawnta,
A etlawm sem di’n Bethlehem pak toh;
Hong pak lunta e pakbang lawm ni.

Aw etlawm sang e, hiai nunnop ni hun tomkal sung,
Vangnei kisa'ng e, nopna ni tuang hong tungta,
Lung kituak in nunnop zaila'n awi ni,
Na lungkhamna silhpuan bang paai in.

Omlaivei leh lusuun tate’n,
Tantawk gel sam dih ua,
Hun mualliamsa teng ngai in i mau hi;
Pakbang i lopsa hiai ni thupi hong tun chia’n,
Sungkuan kim a i lenlai ngai sem hang;
Naubang kahna luankhi tui a luang.

Tung Thianmang hambang hon huai hen,
Nunnuam in zaisa ni,
I lailungsung natna teng dam ta hen;
I ngaklah ni kipahhuai tuang hong tung nawnta,
Na puakgik tengtengte paaikhia inla;
Nunnuam ni hun hoih i neihsung in.

Vangla a leeng lawmvualte aw,
Tangbang na dam uh hiam,
Khristmas ni lungdamhuai hong tung nawnta;
Tung Thianmang in lumbang in hon sung zel hen aw,
Damtak in aw i kimuh nawn mateng;
Nunnuam in zaisa ni zal mangpha.