- 2 Kor 10:05 –
Khovel a laisiam leh telsui mite gen dan in khovel ah kin pen “vak”(light) ahi chi in pom uhi. Vak kindan ahih leh second 1 sung lel in mel 186,282 tan tungzou a hat leh kin ahi. Huai ziak in nisa in khovel a kap khak na ding in minute 8 leh second 13 hun la hi. Huai man bang in mihing te ngaihtuah na leh I suangtuahna le hat mah mah khat ahi. Khovel a a tak a I muh ngeilouh na mun bang le I suangtuahna second 1 lel in leng amun a om bang in I ngaihtuahna toh vaki om thei hi. Den a I gen nisa in khovel a kap khak na ding a minute 8 lam a lut pen ei ngaihtuah na in nisa second 1 in tungtheih mawk ahih man in vak sang a kin zo ahi chih I thei hi.
Hiai ngaihtuah na kin mah mah leh hat mah mah pen in hoihna tampi hon pe thei ahih kawm kawm in siatna lianpi a hon pilut thei ahi chih I theih a ngai hi. Laisiangthou a I muh mah bang in “ Kua hiam khat khelhpih ut na lungsim toh na et lel leh le a khial khin nahi” chih chiang tak in imu thei hi.
Hichi bang ngaihtuah na hat tak pen bang chi dan a “ Khrist in a thuzoh ngaihtuah na” hon hi thei mah mah ding ahia? Bang chi pan lak ding? I chih lai in “ mihing a ding in haksa mah leh Pathian a ding in thil hi thieh louh a om kei “ chih I laisiangthou a I mu nawn hi. Huai ding in saulou en suk ni.
PIANGTHAK: Khrist in a thuzoh ngaihtuah na a hih thieh na ding in khalam hotdam sa hih poimoh hi. Khrist a iki pumpiak theih na ding in Amah hon neitu ahih a ngai hi. Nang thu hi hen Toupa, Nang thu hi hen I chih a anuam a haksa hun a Pathian kiang a I tai theih chiang in Khrist in a thuzoh ngaihtuah na nei kihi thei pan hi. Mihing hat na a zoh theih thil ahi kei chih a chiang hi.
THUM MI: Piangthak tak tak ki theih tel a gah suah muh theih telak a 1 ahih leh Thumna ahi. Thumlou pi in bang chi dan in Pathian kiang ah I tai thei dia? “Toupa aw , ka kha, ka pumpi, ka hun leh ka ngaihtuah na” Nang kiang ah kon pe khia hi. Kei thu hilou in nang thu hi zo ta hen I chih theih gige ngai hi. Jesu Gethsimani huan a lungkham tak a a thum a,kho-ul sisan mal bang a tak khia a, sih theih na ding khop a lungkham a om chih I mu hi. “ Pa aw ahih thieh liai leh hiai nou kei apan hei mang in, himah leh kei thu hilou in Nang thu hi zo hen”. Hiai bang hun a Pathian a kipum piak tak a Amah deih na bang a tangtung sak a I tung a a nuam leh haksa hongtung hun ale Khrist in thuneih na lianpen aneih a amah vaihawm na I muang nak leh I ngaihtuah na Khrist in a thuzoh hon hi ahi.
LAISIANGTHOU SIM: Khrist in I ngaituah na a thu zoh theih na ding in Amah thu te theih tam a sut tam poimoh mah mah hi. Salam ann I poimoh bang in kha lam ann le ki poimoh gige hi. Khrist toh I hon om chiang in “theipi kung te paklou in, gan ta te sat khiak in om in, lou in nek ding piangsak kei mah leh I Hotdamna ah iki pak gige ding hi. Job bang a haksat tawp khok hun in mite’n na Pathian gensia inla sisuk mai in hon chih hun un le Khrist a I ding kip a amah bel tinten leng huai a suahtak na om hi.
KITHUNUN NA: Khrist suangpi kip tung a I ding a , I lungsim ngaituah na te Amah I thunun sak gige poimoh hi. Khrist in I ngaihtuah na a thuzoh louh chiang in haksat na, pukna leh lunggim na hon tun hi. Israel te Aigupta a suak leh sal a a om lai un Mosi amau te hondam ding a akuan lai in, Pharo in a lungtang leh a ngaihtuah na Khrist ana thuzoh sak hileh amah innsung leh gam sung a siatna leh sih na hiai zah a tung I ging ta kei hi. Pharo lungtang Pathian in a KHAUH” sak a chih I mu hi. Aleh lam a Pathian in a ompih valnou Joseph in a lungtang leh a ngaihtuah na Khrist a thuzoh sak chih I mu hi. Heksiat a a om hun inle a lungtang kem pa Pathian in a ompih gige chih I mu hi. Suangkulh sung ah “ suangkulh veng pa DEIHSAKNA A TANGSAK A” a vai hawm na peuh a aki kum kei chih I mu hi.
KHRIST IN A THUZOH HINKHUA: Mihing ten I hinkhua leh I ngaihtuah na Khrist I thuzoh sak chiang in I niteng hinkhua a hong kilang thei hi. I nasepna mun ah “Jesu Khrist min in kon sem awle”, I siamsinna mun ah “Jesu Khrist min in kon sim awle”, I haksat hun in “ Jesu Khrist min in ka thuak di”, iki pah hun in “Jesu Khrist ziak in kipahna kanei” chih kam mal te I hon neih chiang in I ngaihtuahna Khrist in a thuzoh tak tak ahi chih I mu thei hi.
KHRIST IN A THUZOH NGAIHTUAHNA APAT GAH SUAH: Piangthak I hon hih a thil lui te mang a thil siamthak I hoh hih chiang in I ngaihtuahna leh I lungtang teng teng a Pathian muang a I hon om chiang in gahsuah tampi “ KHA GAH TE” ei apat midang te muh theih in hon nei ding uhi. Mihing ngaihtuah na Khrist in a thuzoh chiang in lawm leh vual leh mihin pih te toh kituak in I hong om thei ding hi. Joseph bang a bolsiat in om mah leng Phuba lalou in “ Hiai hun a noute hondam ding a Pathian in hon na ma sawl hai” ichi thei ding hi. Khrist in I ngaihtuahna a thuzoh chiang in midangte vualzawlna ihi ding a, I seppih, I sinpih leh iki het khak pih te ading in panpih tu leh khamuan na tun tu ihi ding hi. Joseph Pharo innsung a a om a Pathian in a ompih a a nasep leh a bawl khempeuh a lamzan na a muh kia hilou in Pharo innsung mah mah a Pathian Vualzawlna a tung chih I muh mah bang in ei Tuailai ten I ngaihtuahna khrist thuzoh sak leng, sep leh bawl a lamzan na ban ah mite vualzawlna tungsak tu ihi thei hi. Huai ding in panla in “I ngaihtuahna Khrist thuzoh sak ni”.
( Tuailai Day 2015 zat hun a thugelh kidemna a Thumna (3rd ) la Mr Kambiakmuan Hauzel’ Thugelh )
