Abundant Life

A Sermon by Upa T Kaithang

(Sorry! No Audio)

HINNA TAMPITAK (Abundant Life)

Johan 10:10: . . .Kei zaw hinna a neihna ding ua, tampitaka a neihna ding ua, hong ka hi.

Paite Laisiangthou sut 1naah Hinna tampitaka, chiin i mu,

Paite Laisiangthou sut 2naah Hinna kiching mahmah, chiin i mu,

Paite Laisiangthou sut 3nain Hinna a buching chiin gelh hi.

Tedim Laisiangthouin  Nuntakna a dimtak, chia gelh.

Mizo Baibulah Nunna tamtak, chia gelha,

Hmar Baibulah leng Hringna tamtak chiin gelh nawn.

Sappau i et chiangin abundant chih zang deuha, tua i sermon dingin Easy to Read Versiona “Life that is full and good” chiin let hi. Hiai lehdan hi ka kipahpih mahmaha, ka na theihdan leh gennop dan khat ahi.

IIKorinth 5:17: Kuapeuh Khrista a om leh thilsiam thak a hong hia, thil luite a mangta, ngai un, ahong thakta uhi ….

Thilsiam thak= created all over again, chia English version khatah kigelh hoih ka saa. A lui repair maimai hiloua, bawlthak liklek, mi thak liklek suak ahihna i deih hi.

Ephesate 2:10: Thilhoih hih dingin Khrist Jesua siama omin, amah khutsuak i hi ngal ua

Hiai leng English Version khatah “God made us new people so that we would do good things”, kichi pen  “A hoih i sepkhiak theihna dia Pathianin mi thak hon suah a hi”, chihna danin ka la.

Thilhoih hih dia thanopna hi Siamthakna gah khat hia i muh – Amah kipahpih lam mi hih  i tum chinten ahi.(II Kor 5:9). Huai ding maha  Khrist itnain hon sawl teitei(II Kor 5:14).

2.Sappaua Good Life chih hong kithang mahmaha. Hiai i genkhak  chianga i ngaihtuahnaa hong kilang bang khawng ahi sek? Officer hiam, mi hausa hiam, a deihte sum taksapna om hetloua lei ziahziah theite hia i ngaihtuah khiak? I sapum nopsak dan kia zuia i om “good life”  a hi diam? Sum hauhin hauin, Car hoih penpen, gadget hoih penpen(computer, laptop, tablet, mobile phone, TV, etc.) neiin,  in hoih penpena omin, zana ut hunhuna lum, suna leng thoh nop kei leh thou lou zel, internet leh virtual world khawnga khosa, kholak buannawi leh leivuikhu leng mu ngeilou phialin omin, duh teng ne-in-dawn ziahziah le . .good life chia  i duhthusam a hi diam? Mihingte’n  good life hi dia i gintak delhin i kipumpeia, huai ngahna dingin short-cut om teng leng  kilawm leh kilawmlou ahihna ngaihtuah louin good life hi dia  i gintak i delh hi.  Ei ngaihdana good life hilou hon genpih a om chiang un ngaihkhe nuamlouin “Kei hinkhua ei ve le,  nou gen di om kei – It’s my life”chih bang i zat nop hita hi.  Good life genna dingin hiai etsaknate genkawm lehang.

2.1 Luka 15:11- 32 sungah tangval khatin  “good life” hi dia a ngaihtuah duhthusam dia ana tel a oma. Min dang nei tuanlou ahiziak ei pauin “tapa taimang”chiin i minloha. Apa’n a neih-le-lamte “enjoy” khalou sa mahmah zaw hi ding hia. Amah sa-leh-lungsim pichin hun leng ngak zou louin “Gou ka tan sik hon pia in” chi giap. Huchi vanglaka ahihleh, chi hi ding, a Pa’n a gouhawm ding atate kiangah hawmta. Laisiangthou gendanin a a ngaklahpain a goute sumsuahin gam gamlapi ah a zinta, huaiah nuamtat luain a sum a mawk zat mangta.

Tu khangthak huna tuailai hileh bang chibangin a om ding? Night club khawng hoh di, mahni chipih-sapihte bang thring sa dia, kipawlpih nuamlou kha dinga,  namdangte adia kiphal viau kha ding. “Eimi zaw mi gensiat hat lua!” chih dan deuhte kha maw? Tenna ding nei nawnloua a om chiangin apa ngaihdamna ngen dingin hong kik. Apa’n ngaidam, ana kipahpih mahleh bawldik theihlouh/bawlhoih vuallouh bangzahhiam om dingin i gingta: Unau kituak di lai kituaklou, hun zat beisa mukik nawnlou, muanhuaiin a hun ngakzou leh nuam a sak dite mansuah den hi ding, deihsakna a tan ding, inkuan kituahna ding. . .mukik nawnlou hi ding.  A  tanvou mansakte piakthak ahi na diam maw?

2.2  II Samuel 13 – 18 sungah mi khat “good life” lunggulh khat i mu nawn. Amah Kumpi David tapa Absalom, Gerur kumpi Talmai tanu tapa ahi. Mi melhoih inkuan akipan ahi ngei  ding. Amah mi mel hoih,  a naunu Tamar lah melhoih. Bung 14:25 a i muhdanin Israel tengteng lakah Absalom melhoihna pha kuamah om lou uh, a khemong akipana a lusip tana gensiatna himhim a om kei.(Gendan tuam deuhin gen le: hichi zaw deuh leh, chihna di kimulou).

A naunu Tamar tungah amau sanggam mahmah Amnonin khelhna hon bawl. Ama pa, Kumpi David, ngeingei kianga vaihawm dia tutlouin kum 2 sung Amnon tunga phuba lak ding leh thah theihna ding gel vengveng. Ephraim kianga Baal-hazar ah beram mulmet suanlamin a nungzuite toh Amnon that uh. Kum 3 taimang. Davidin sampai, kum 2 kikulkhum nawn. Huai nungin Kumpi David kiangah a kilak. Himahleh a pa phuk ding dan lemgelna pan ngal, mipite lungsimte apa akipan ama lama kiheisaka,  amah leh a heute Hebronah lal hihna kipuang uh, David leh a inkuanpihte lauin galtai uh, a mei 10 nutsiatte mipite theih ngeingei dia luppih lai(a pa akihuat sak theihna dingin). Aman leng “good life”delha, apa thring sa mahmahin, musit hi mai. Good life a muhna ding leh ama nopsakna ding a hih leh midangte thuak leng khawksakna neilou!

Inkuan sung leh gam pumpia civil war suaksak. Inkuan kisia, gamsungin siat loh lai. Nu/pate upat/tek nunga lau leh linga koih. Good life i zonna ah mi bangzahin a thuakloh ua le? Gam pumpiin.

2.3 Full and Good Life ana nei kha Genesis 37 – 50 (bung 14 sung mahmah) Joseph tanchin omna a hi. Abraham akipana Pathian thuchiam “chi thupi mahmahin ka hon bawl ding”, chih leh “Van lam en inla, aksi na sim theih leh sim himin .. . Na suante huchibang a hi ding uh” …. “chi tuamtuam suangpa na hi ding”,  “vana aksi zah leh tuipia piaunel zahin na suante ka pungsak ngeingei ding”, chihte khawng leh Isaak tungtawna paisuak, Jakob Israel chia hong kikhenga, thuchiam lohchinna dia naupang thumang, mahni kikem siangthou kiphamoh dinmuna hong ding Joseph tangthu i mu thei hi.

Absalom i gensa bangin Joseph leng omdan  kilawm leh melhoih ahi.

A ute’n Ishmael mite khuta a zuak uh, Potiphar ina a om, amah omna insungin vualzawlna leh hamphatna a muh dan, “bawi’ dinmuna om himahleh insunga thuneipen hi dia muan ngama om, khemna lianpi akipan Pathian laumi ahihna a taklang.

Suangkulha leng Pathian thupina piain (mu)mang hilhchet theihna nei. Uaiin pia heutupa leh sanghawmte heutupa mang hilhchian.

Pharo mang hilhchian nawn. Aigupta gam pumpia Pharo zomtu dia sehin om. Aiupta hun haksa hong tung ding kisakkhawlna amah Joseph khuta koiha omin, tulaia Disaster Management i chih Joseph huna ana kipan hita mawle!

Aigupta gamsung administration reform-tu Joseph a hi. Aigupta Sorkar gam neihdan, Taxation system khawng bawlhoih zouin, Pharo leh mi tengtengin a muan uh hong hi.

A inkuanpihte a vek sipsip ua Aigupta gama pilut, ganvulte tenna dia mun hoih penpen, mihingte pung hulhul theihna dia gam hoih Gosen gam luahsak zomah. A pa tek si dia kisain a kichiamsak – Aigupta gamah hon vui ken, chih tangtungsak dia munahuaina nei.

A unaute a ngaidam vek.

Aigupta a om sung un nampi a hong suak uhi. Kum 400 a om nungun Israel inkuan mi 70 akipan pasal piching kia nuai 6 hong phazou uhi.

Dinmun nuam a tun main a haksa bangzah a thuaka? Kum 17 ahih laia kizuak mang, kum 30 a phakin Pharo maah va ding. Kum 13 sung vingveng haksat chiteng thuak. Amah muanhuaina ziakin Israel  nampi hong piangsak hi. Joseph damsung kum 110 pen a pa leh pute damsung sangin tom bangmah leh Israel nampi a suahna dingin a sepkhiak thupi lua – hinna tampitak nei hilou hia? A hinkhua kiching/buching mahmah, amah leh a inkuanpihte kia hiloua, midangte adia leng hing lai a hi.

2.4 Norman Vincent Peale laibu gelh minthang “The Positive Principle Today” chih a gelhnaah mi khat tangthu a gelh genlat tuak ka sak om.

Africa mualpi sunga gam khat nidanglaia Nyasaland(tulaiin Malawi) kichi gamaah pasal(valnou) khat Legson Kayira-in Missionaryte tungtawnin Pathian thu kia hiloua, America gam thupi dan za hi. Mivom gama gentheihnate toh kikhai lo mahmah ahih dan a zak sekte akipanin America gama laisim ding, a gam mipi adia thilhoih semkhe ding, chih lunggulh lua ahihmanin amau gam akipanin khe-a mel(mile) 2500 paiin, haksatna chiteng thuakin, passport, visa chihte leh Skagit College, Mount Vernon, Washington, admission hon muin, college kaia, Professor dinmun hial va tung thei hi. A tupte lakah Nyasaland President hih ding, chih a hi. Pathian thu leh hinna hotdamnain ama hinkhua bawlhoihna ding leh midangte adia thil manpha bawlkhiak theihna dinmun tungzou dia pang teitei dia thanopna bawlsak hi.

2.5 Brother Christudas,- Little Flower Leprosy Hospital tanchin. Hiai hi sharing ka neih chianga ka na gen khak zelzel ahia. Brotehr Christudas kichi hi Titagar khuaa Mother Theresa toh Leprosy Hospitala ana semkhawm sek hiin kigen hi. Phakte hospital haksa pipia zuana, damna a zonna dia gamlapi a pai uh kul hi. Phakte omkhawmna leh a tamna mun mah uah hospital va bawl a lugngulh ziakin Bihar state sunga Champaran District, Nepal gamgi geia  Raxaulkhopiah mi sum Rs. 2000.00 leitawiin  kum 1981-in kisuan hi. Phak natna vei a tam ua, khopi sung leh railway station laka khutdoha vaka, nekzong zelin, nitak ahihchianga amau ahonpia mun khata giak dia paikhawm  zel a hi uhi.  Brother Christudas leng amaute laka teng dingin va paia. Huchiin leprosy hospital masa dingin leibang zut in hon bawl ua. Holland akipana deihsaktu khatin Rs. 1.80 lakh thawnpiak a hon piak nungin damlou mi 47 omtheihna ding hospital pankhia hi. Tuin hospital hoihzaw leh lianzaw, damlou 130 omtheihna ding bawlkheta hi. Hiai toh kitonin Phakte tenna ding colony bawlkhiaa, huai vengsung tengte kuamah khutdoh phal nawnlouin, amau kitoudelhna dingin bawng 60 khoina patpihin, bawngnawi zuak hon pan ua. Numeite sep dingin silk puan gat hon pan nawn ua. Naupangte skul kaina ding tuin high school neita uhi.

Hiaibangin  lametna beia om phakte kiangah  hinna thak leh lametna  hon pia hi. Brother Christodas-in ama hinna kia buaipih louin, midangte hin theihna dingin a hinna zang hi. A nasep tungtawna mi hinna a hutkhiakte hinnah amah ava tenga, va hing dana tehpih theih a hi.

2.6 Eilam naih deuh  gen lai lehang: Rev. E.H.East (Doctor of Medicine), North American Baptist Mission Boardin missionary dingin Burma gam  Chin Hills ah hong kuankhiaa, Haka khuaa  tengin, khua tuamtuam ana veh hi. Kum 10 sung phial singtangmi mawl mahmahte damna dingin ama siamna leh tha-le-zung phaltakin ana piaa, genthei taka natna leh damlouhna vei nilouh mi tampiin damna ngah ngei dingun i gingta. A tanchin kitheih dan hi ama laikhakte tua laibua kibawl – “Burma Manuscripts”- chih akipan ahi. I singtangmi hihpihte, kisil dan theilou, meima leh natna kihuai pipi veite itna ziaka kem theih dia hinna kiching/tamtak Dr. E.H.East ziakin mite’n damna mu uhi.

3. Tua i gente akipan hinna hoih, hinna buching/tampitak omzia i thei ding uh. I hinkhua chiat kienin, thilhoih hih dia thathou zoulou ihihleh siamthak i hihna kivelchian dia poimoh hi kha ding ihi. I Toupa Jesu Khristin hotdamna ana sangsate hinnah thilhoih hih nopna lian mahmahin, a hinkhua uh lamdangsak zou hi. Toupa Jesuin hinna a piakte leh huai hinna ana sangkhate zaw hing hamham, hing ningneng chih hilouin, hing vingveng ua, amau nopsakna leh kipahna pen uh  midangte  adia a hinna uh, hin manpha hiin ngai uhi.

Hiai a hih theihna dingin Joseph banga ngakzou leh thuakzou hih masak phot kiphamoh mahleh ei laka mi fel leh kizen dia i gin mi khenkhatin tapa taimang leh Absalom i gente banga ngakzou louin,  amau tung leh midangte tungah haksatna  tungsak uhi.

Khatvei mihing khata piangkhe chiatchiat, midangte hinna adinga phattuampha hinna neih hinna tamtak nei chihna a hi.  Hiai lungsim nei nailou ihih khak leh i Toupa hon siamthakna poimoh hi kha ding hihang.

Siamthaka omte adingin Pathian deihlam hih/sep lunglutna om hi. A sang sem, a thupi sem, a hau sem hih theihna diakuhkalna leh thanopna piangsaktu hong hiin, hinna manpha neitu leh pesawntu hih theihna lampi a hi.

Hiai lunglutna sepkhiak ahichiangin khovel piak theih vuallouh kipahna piang hi. Hiai kipahna ziak mahin sawltak masate leh missionary masate’n haksatna leh gentheihna thuak leng ana ngam uhi.

Toupa Jesu Khrist hinna akipan tampitak hinna na sangta hia?

Toupa’n i thugente laka a hoihte tungtawnin hon vualzawl hen.

(March 13, Delhi EBCC Biakina  Upa T.Kaithang thugen a hi)