Paikan ankuang bawl ding in Jesu'n Peter leh Johan sawl a, khopi sung a a lut chiang ua pasal tuibel pua tuak ding uh ahihdan leh tua pa' lutna inn a lut a, paikan ankuang um nang va kan ding in theisak hi. Jesu chih bang geih in nungzui mi nih te'n pasal tuibel pua a muh uh zui ua, Toupa nitak ankuang lui nang vanzat omsa diam va mu in, tua ah ankuang Jesu'n a nungzuite umpih hi.
Jesu leh a nungzuite'n ankuang a umkhawm theih nang ua vanzat poimoh mahmah te lak a khat Pasal tuibel popa ahi. A min leh a hihna bangmah kigen keimah leh Pathian vanzat poimoh tak suak a, amah om kei leh a nungzuite a di'n leng tua mun va zonkhiak baihlam khawllou thei hi. Huchihlai in, hiai pasal tuibel popa'n Pathian adia vanzat poimohtak ahihlam leng ki thei kha hetlou thei hi. Huchimah bang in, Pathian biakna leh kisinsakna hun a vanzat poimoh mahmah Worship team, Naupang heutu, Media team, Prayer Cell, Lapawl, etc. leh i hih theih bangbang a Pathian adia i kizatnate i ngaihsutna khenlam ah Pathian vanzat poimoh tak i na hi kha thei a, Pathian in a hon zatnop pen hamphat huai lo petmah ahihdan phawk thak leng i chi hi. Ban ah, damlou hiam buaina/haksatna neite i hihtheih bangbang a huh leh a na makaih a, thumna a delhzui a, dahte dahpih a, kipakte kipahpih siam bang leng Pathian adia i kizat theihna poimoh tak ahihdan phawk thak thak ding in deih huai hi.
Tua ahihman in, Pathian min a a dangtakte kiang a tui nou khat kia lel i piak leng Pathian in kipahpih mahmah a ana chiamteh hial ahihleh, tua sang a nakzo in Pathian kipahpih lam hih sawm in, a vanzat manpha hithei ding in kisa thak le hang i chi hi. Pathian in i siam ziak a hon teel ahikei a, Pathian adia i kipiak nak leh a siamlou pen te nasan leng a siam mahmah te sang a manphazo in hon zang thei hi.
