Khophawklou a inn apan puak khiak a om in,theihlouh kal in Safdarjang Hospital Emergency ana lut in, huai apan in ambulance a puak a anaom in G B Pant Hospital puak tung a ana om dan ka hi. Huai ah leng khophawk nailou in, ICU Ward 6 a ka lupna ka tun nung nithum ni khong in ka khawphak dekpan phing hi.
Huchia thil kon naihtuah theih in thil khat ka tuah ka phawk khia hi. Ambulance a hn puak lai vel khong un oxygen mask hon thuah dan uh ahi. Kei bel mun khat van lai zawl hiding dan khat ah kana om a, ka dak touh leh Hinna Kongpi kei a din hong kihong mai jaw a lamdang lua hi. A vak ziiziai a, amun tung leng laam ding a nak dam law ding ka bang hi. Huai kongpi hong kihon in kahlei 12 ding khong kei a din hong kidawh suk hi. Kahlei chih ding a leng hong zaam suk, vak in a tanvak singseng ahi. Avak dan tehpih ding omkei. Ka en a, ka ut mahmah hi Huchih lai in, hon sam chiaichiai om hin ka thei a, ka etsuk leh Chiching dah mel tak a om ka mu hi. Huai kahlei a paitou mai ding a kisa, ka khelangkhat koih man a om himahleng hon sap ka zak in “Toupa, ka zi leh tate kiang ha ka pai lai mai ding” chi in ka kihei a, leilam ka ngasuk hi. Tua mun ka muha nop tuak dan lawmlawm. Ka gimsim chiang in ka ngai vungvung hi. Tua lampi ka tate ka hilh ding ka mohpuak na ahi ka chi hi.
Oxygen ngen a dim ileh kilawm, a kongkhak ka lut chikchik laam a diangmai ding chih kia ka ngaihtuah a ka phur petmah hi. Huai ka gen leh ka khophawklouh lai in Chiching in Ambulance sung ah kon sam sam chih a gen hi. Alehlam ah huai mun lah ka ut a, kon kik khak leng hampha ka kisa jel hi.
Huaimun noptuak dan tehph ding ka thei kei hi. Banghiam toh ka tehkiak dek jela a haksa hi. Amun tuam hiven! Nak uthuai hina mai zen e! Paisate omna ahihleh hon nak eng louh law ding uh hi in ka mu hi. Thathak nei ding, laam a mun vak tak, niim dildial nuai a om mai ding, a nak uthuai ngei! Ka chi vungvung hi. Ka nak ut ngei e!
