[ II Kor 10:5 ]
Thumapi:
Kum zabi 21 na ah I om dungzui in khovel changkang hiaihiai a, pilna leh siamna leng sang semsem hi. Mihingte’n bawltheih ,septheih, a etnop ding mit hipthei, alim a-al, taksa suhatthei vanzat tuamtuam mukhia in bawlkhia uhi. Mihing ngaihtuahna thuzoh thei ding tampi omta hi:Tutna-omna apan a kihoutheihna vanzat bang, melmuh tongsan leh adangdang. Hiaite’n I nisim hinkhua hon thuzoh thei in, a poiumoh zaw I ngaihtuahna hon thuzoh theilai hi. Huai ziak in hinkhua lohching leh ginom I neihtheihna ding in bang in I ngaihtuahna zou hiam chih theih kul hi - Khrist in hon thuzoh hia, khovel in hon thuzoh?
Bang in I Ngaihtuahna Thuzoh Thei Hiam?
Tulai in tumlam gam I et chiang in ah numei leh numei, pasal leh pasal ki-itna hoih sa-in ngaina mahmah uhi. Huai banah ngaituahna chi tuamtuam – Pathian omlou ahi ahihkeh Pathian ginlouhna, Pathian a omkei-a, a om leh leng I theithei kei hi achite pawl tam mahmah hi.Hiaite’n tumlam gamte ngaihtuahna thuzoh mahmah hi. Ei singtangmite hinkhua et in ‘sum’ in I ngaihtuahna zou mahmah a, I gamsung, inkuan sung in siatpih hi. Tuailaite adiak in khut a tawitheih kihoutheihna vanzat tuamtuam te’n a ngaihtuahna uh zou hi. A pichingte leng hiai vanzatte thuzoh in om toutou uhi. Hiaite banah hauh utna, lal utna leh adangdang tampi leng omlai hi. Hiai hon thuzoh theite apan suahtakna leh khovel thuzoh a omlouhna di’n Khrist in I ngaihtuahna hon thuzoh ngai hi.
‘Khrist In A Thuzoh Ngaihtuahna’ Bang Hi Hiam?
Mi kuahiam khat in, Ka Pa’n hon thuzoh ahihkeh, A zi thuzoh mihing a chih leh a Pa thuthu mang ahihkeh, a zi gengen zui/mang chihna ahi. A tomlam a gen in Khrist’ thupiakte zuihna, manna ahi [ Khrist in a thuzoh ngaihtuahna I chih]. Khemna I tuah chianga, Jesu in phallou ahi kahih kei ding chihtheihna ahi. 2 Kor. 10; 5 ah I muh bang in ngaihtuahna hoihlou I lungsim a hong om peuhmah Jesu I thuzohna nuai a koihlut chihna leng ahi. Jesu in deihlou achihte ‘deihlou’ chihtheihna ahi. Gendan dang ah Jesu ginom tak a nungzuihna ahi. Huai banah, khovel itlouhna, khovel toh kikhenna leng ahi [1 Jn 2:15]
Bang Chi’n Khrist Thuzoh In I Omthei Dia?
Phatna Late [Sam] gelhtu in agen bang in: Na thu tuh ka lungtang ah ka kem gige hi; na thupiak ka ngaihdan, sun teng in ka ngaihtuah ahi [Sam 119] achih bang in Pathian thu lunggulh leh deihna a poimoh ahi Khrist thuzoh a omtheihna ding in. Aziak Jesu thuzoh a omte’n A thu za-ut, ngaikhia uh ahihziak in [ Jn 10:27]. Huan, Jesu thu zak leh theih kia ahun kei-a, mipil suangpi tunga in lampa bang in thuhoih I zakte zuih angai ahi. Jesu thuzoh a omna di’n a thupiakte zuih angai hi [Matt 7:24]. Hiaite banah a saptuamte toh omkhawm gige, gingtute omna apan tuam omlou. Houchik a gen in kikhop zelzel ding chihna ahi. Aziak eikia a hatna kineilou ahihmanin [ Jn 15]. Abanah thum mi hih ding ahi.
Thukhitna:
Khovel ah gingtute ngaihtuahna thuzohthei tampi om a, hiaite’n siatna tuamtuam hon tun uhi amau thuzoh a I om chiang in. Himahleh, Khrist in a thuzoh ngaihtuahna nei mi tuh khempuk/khemzoh in omlou dinga, Pathian deihdan hinkhua zang thei ding hi. Mihing in teltheih kinei chiat hi I hinkhua zat ding ah. Khovel thuzoh a I omleh siatna, Khrist thuzoh a I omleh hoihna, Huai ahihman in Khrist thuzoh I hihtheihna ding in Pathian thu [ Laisiangthou] I pomkip tinten ngai hi.
( Tuailai Day 2015 zat hun a thugelh kidemna a Nihna (2nd ) la Mr B Paukhanthang’ Thugelh )
