EBCC Delhi Biakin basement ah July 26, 2015 zing 9:30 in Special Lecture on Biblical Concept of Sexuality om a mi tamkhop paikhawm uhi.
Hiai hun ah Local Pastor, V Nenglian, in a honna nei in introductory speech pia a huai zoh in Upa Ngulminthang Langel in Sexuality toh kisai issue taklatna nei hi. Tuni tanin gam tuamtuam 21 te'n Gay Marriage pen legalized uhi. Tunai chin a USA te' Supreme Court thukhenna a nunung pen ahi. Hiai thu in khovel zelsuak mahmah in gingtute leh saptuam te lakah ngaihdan tuamtuam piangsak hi. India gam in a chilin unnatural sex pen khelhna (criminal) in koih uh a (1860) himahleh tuma sawt lou (2009?) a Delhi High Court thutanna dungzuiin sexuality toh kisai koih dan khek in hong om hi. Tulel in India gam in a dinmun chiangtak gen kei mahleh tuma sangin bel hiai lam ah kihawng zaw hi.
Pastor V Nenglian in Sexuality toh kisai Bible in bangchi a hon sinsak hiam chih tomkim taka taklatna nei hi. Bible in kitenna a gen peuhmah chiangin numei khat leh pasal kikal a thiltung hi'n gen hi (Gen 2:23-24; 1kor.7:2-16; Eph. 5:23-33; Mat.19:4-6). Numei-pasal kipawlhna toh kisaiin nu-pa kal pawlam a kipolhna peuhmah khelhna ahi Bible in chi hi (Lev.20:13; Gen. 19:1-13; Rom. 1:24-27; 1Cor.6:9) . Huai bel, numei-numei ki[polhna, pasal-pasal kipolhna, mihing-ganhing kipolhna, nupa hinailou kipolhna, nupa hisa midang toh kipolhna chihte peuhmah khelhna ahi uh. Huaijiakin, homosexuality, lesbianism, bisexuality leh Gay marriage kichite Bible in a dikin pom thei lou hi. Fornication leh adultery te leng milim biakna ahi. Hichibang khelhna te Pathian taihsanna ahi (Rom. 1:18-31). Mihingte eimah utna lam chiat a khema om a khelhna a pukte ihi uhi (Jak.1:14-15), khialsa a piang ihihman in (Sam 51:5).
Himahleh, mikhial pen a dingin leng Pathian ngaihdamna kiching hi. Pathian in khelhna a huat mahmah laiin a khialtu mihingte hon it petmah in a tapa tang neih sun hon pia hi. Huai gingtate'n hotdamna ngah jel uhi. Amen.
Khema na omlouhna ding un pilvang un....
