Report: Missions Conference 2015
April 16 – 19, 2015 sung Gospel Centenary Hall, New Lamka ah “Missions Conference 2015” zat in om hi. “Pa’n ken hon sawl bang in, ken leng nou kon sawl hi” (Johan 20:21b) chih thupi in kizang hi. Hiai khawmpi ah ei EBCC Delhi akipan in mi 3 va kitel thei a, Central EBCC Delhi akipan in mi 2 toh gawm in, Delhi akipan mi 5 va kihel thei hi.
Kikhopna 13-vei om a – Bible Study & Devotion 3 vei om a; EBC Mission Field 3 (Nepal, Karbi Anglong & Manipur) te akipan in Field Special Programme 3 vei mah om in; mipi Biakna Kikhop 7 vei om hi.
Bible Study & Devotion Rev. V Khamvum, DS Singngat in makaih a, zing dak 6 apat 7 kikal nuamtak leh lungluthuai tak zat in om zel hi. Mission Field Special Program ah Missionary te kiangah Pahtakna Lai (Certificate) piak ahih ban ah, Report ngaihkhiakna om zel hi. Hiai hun mah in, Mission Field a Saptuam te akipan in limchiin lahna, cultural show leh lapawl sakna om zel a, paikhawmte mit leh bil atai sak mahmah banah lung khoih thei mahmah hi. Toupa’n thil thupitak hon muhsak zel in kipahhuai kisa mahmah hi.
Mipi Biakna kikhopna 7-vei om lak ah, Rev. L Kham Kho Lun, Director (Missions) in thugenna hun 4 tang in; Rev. T Paukhanmang, FS Karbi Anglong, Rev. N Thawndoulian, FS Nepal leh Rev. L Khaikhansong, FS Manipur te’n 1-vei chiat tang uhi. Field piching a puan hi naichetlou Dhemaji Mission Field leh Arunachal Mission Field te apan in report ngaihkhiakna a om banah Special items lahna 3-vei om hi. Khawmpilian sung in Phatna Lapawl 33-vei sak khiak in om hi. Kikhopna teng ah Biakna leh Phatna EBC Central Choir te piina toh neih zel in om a, nuam thei mahmah hi. Lasak nuam in, tumging chituamtuam te’n kilawmsak tuan mahmah hi.
Missions Khawmpilian zang diing in Manipur Mission Field apat in mi 150 kuan ua; Karbi Anglong apat mi 65; Nepal apat mi 45; Dhemaji apat 22 leh Arunachal (Tangsa) apat mi 7; agawm in EBC Mission field 5 te apan mi 289 in Mission Khawmpilian uap uhi.
Tangthupha puangzak dia Pathian in ahon sawl ahihdan thugentute’n nounel tak in gen chiat uhi. Jehovah Pathian pen Missionary Pathian ahihdan, Adam leh Evi te khelhna a ahongpuk ua kipan in Pathian in khamangthang zonna nasep panta, chi uhi. Huaiziak in, Missionary masapen leng Jehovah Pathian ahihdan chiangtak in gen uhi. Mangthangte zong a hondam diing in Pathian in atapa tang neihsun khovel ah hon sawl hi. Amah, Jesu Kris, in Kros ah tatna’ nna hon sem hi. Huchiin, Jesu Kris in Amah sepna maban sem diing in ei gingtute hon sawl a, “Pa’n kei hon sawl bang in, ken leng nou kon sawl hi” chi in, hiai nasepna pen nialvuallouh ahihdan gen uhi.
Thugentu leh report petute’n mission nasepna a kizattheihna diing lam chituamtuam gen leng nei ua – Thumna ah, Thilpiak ah, Missionary a kipiakna ah chihte gen in, mite lungtang leh ngaihtuahna zou thei mahmah uhi. Missionary nasepna leh Mission Field nasepdan report akipan in Field a gingthak leh saptuam dinthak a omte’n taksap/poimoh hau mahmah uh ahihdan theih theih in om hi. Hiai te ziakin Pathian in mi tamtak te lungtang ah thugen in, pantheihna lam tuamtuam a pang a, huhna sum-le-pai leh thumna a nak zawsem a pang dia kihanchiam/kilaankhia tamtak om hi.
Bible Study & Devotion Rev. V Khamvum, DS in alakna ah – khelhna hong kipan dan, huai akipan Pathian in mangthangte hotdamna dia anasep dan te – Thukhunlui hun a Lucifer pukna, Angel pukte leh mihing khelhna a pukte nouneltak in suina leh sinsakna pia hi. Adam leh Evi te’n neklouh diing singgah anek ua Pathian toh akizopna uh akitat in, Pathian in “Adam, koi a om na hia” chi in khamangthang zonna nasep hiai akipan in Pathian in ana panta, chi hi. Thukhunthak hun ah Pathian sawlna bang in I Toupa Jesu hong kihihneu in, mihing banga bawl a om in, khamangthang zonna leh tangthupha puanzakna panta hi. Khovel a A’ sawlna’ nasep azoh a, kros a sihna, han leh misi khua detden vuallouh a a thohnawn nung a, nungzuite amau kia a tuam om ua, kongkhakte a kikhak khumlai ua Jesu thugen, “Pa’n kei hon sawl bang in, ken’n leng nou kon sawl hi” achih in eite kiang a nasep diing hong guan, nialvuallouh ahihdan chiang huntawk in gen hi.
Missionary te thopna diing toh kisai ah thugenpi Rev. L Kham Kho Lun, Director (Missions) in agenna ah, Laisiangthou thu kisinna leh training tuamtuam piakna te kia huntawk nawnlou in, Health care lam toh kisai – Nursing – chihte leng training piak tuak mahmah ahihdan gen hi. Khelhna hilou siahsiah ahihnak leh mission field a omte (agam mite) tawndan leh ngeina te kepbit sak a, tua toh kizawi a Pathian biakna neihpih banah Missionary te mahmah in amaute Pau mahmah leng sin a, siam ngeingei diingin missionary te hanthawn hi.
Rev. S Vung Minthang, General Secretary in exhortation leh missionary (mission workers) te re-commissioning hun azatna ah, Mars Mission sanga Pathian mission thupi zaw ahi, chi hi. Missionary nasepna i damna di uh ahi, chih agen kawm in, Pa-Tapa leh Khasiangthou Project 1 (khat) – Khamangthangte zonna ahi, chi hi. Hiai nasepna ngai poimoh a, septheih lam chiat a Mission nasepna phungvuh diing gingtu paikhawm teng chialna leh ngetna bawl hi.
Pathian in Missions puahzakna EBC lakah hontun hen aw, Amen!
