Pathian Pomtaak Hi Dinga Kisinna
By Upa Khamgoupau (Sorry! No Audio)
Laisiangthou tangteel:-"Nasemtu, zumna ding neilou,thutak thu diktaka zang,Pathian pomtak hidinga nangmah kipe dingin theihtawp suahin kizilin" (2 Timothy 2:15,)
INTRODUCTION:-I Laisiangthou simna ah Pathian pomtak hidingin chih leh kizilin chih toh kisaiin version dang i etleh "Pathian saan nasemtu hidingin" chi in kilet a, huan kizilin chih toh kisaiin leng Laisiangthou thutak sinding chih genna ahih kawmin eimah mah huchibang hithei dinga kipe ding chih genna hiin kithei hi. Pathian pomtak nasemtu hihtheihna dingin eimahmah kipiakna (Commitment) poimoh ahihna genut hiin kimu hi.Huan Pathian nasemtu khat hi a amah adia ginalou,amah suzahlaktu leL khawng hihtheih anahi mawk hi. Huan khenkhat in Pathian gam nasepna toh kisaiin mankei veeng aw khong chimawkmawk bang kiom hi. Huchibangte tuh ana neitu Pathian zumpih hithei ahih manin pilvanhuai mahmah hi.Huan khenkhat lah Pathian adia kizatna ding lemtang piaka om chianga "Zumhuai/keizaw ka huchi khachi chih bang tamthei hi. Huchibangte leng amah (Pathian) zumpih hizaw maithei ihih manin huchibang iomleh ki ngaihtuah thak dingin iki ngeen hi. Pathian nasep pen zumhuai hiam amah zumpih ding hilou a kipahna toh sep ding hizaw hi.
Kolosate 1:10 ietleh "Nasep hoih chitenga gaha,Pathian theihna a hongkhanga, amah kipah lamtaka Toupa adia kilawm hima nahin theihna dingun, kipahna toh kithuah thuakhatna leh kuhkalna neidingin ahatna bangzela hihhatin hongom un" achi hi. Toupa kipahlam ihih theihna dinga eimah lama effort piakding om tuh kuhkalna leh thuakhatna neih ding ahi. huchileh nasep hoih chitenga gahsuah a Pathian theihna a khangthei ding ihi.
Pathian pomtak hihtheihna lampite:-
1. Jesu Khris kipiakna ziakin:- Eite Eden khelhna ziaka Pathian melma, Pathian toh kikhensa ihih manin amah (Pathian) pomtak kihi vuallou hi. Pathian mitmuh a puanse kihhuai bangle ihi. Himahleh, Pathianin amah batpih a asiam mihingte lainatna neiden ahihmanin Mosi tungtawnin Dan anapia hi. Himahleh Dan a kuamah siamtangzou omlou ahihmanin Pathianin atapa Jesu Khris eite tanding in honsawl a, Isai 5 a imuh bangin eite thuaksik aman hongthuakin i khelhna man Khros ah anapeta hi.Jesu Khris thuakna ziakin Pathianin amah (Jesu Khris) pansanin atate hidingin honpom hi.Hebrute 9:11-14,26 a imuh bangin aman munsiangthoupen ah khelhna hihmangna dinga setdet dingin amahmahanakipia hi.I Toupa Jesu Khris hongthuaknate i manghilh louha i phawk tawntung poimoh mahmah hi.
2.Eite khelhna kisiikna tungtawn a kikhekna/lungsim khekna:- Jesu Khris eite a dingin hongkipe mahleh eiten amah Hondampa a sanga lungsim khekna ineih keileh phatuamlou ding hi. Romete 12:2b ah "Na lungsim uh athaka omin honglamdang zota un" achi hi. Huan Nasepte 2:38 ah Peter in "Na khelhnate uh ngaihdamna dingin lungsim khek unla, Jesu Khris minin Baptisma tangun" achi hi.Pathian honpomna itan nawn theihna tuh khelhna kisiik a Jesu hondampa a pomna tungtawna lungsim khekna ahi. 2 Kor.4:17 ah "Kuapeuh Khris a aomleh thilksiamthak ahi,thilluite amangta, ngaiun ahong thakta" achi hi.
3. Pathian pomtak hidingin Siangthouna poimoh:- Pathian, siangthou ahihmanin aniin bangmah toh omkhawm theilou hi. Eite aman honpom theihna dingin i siangthou poimoh hi. Hiai toh kisaiin Laisiangthou in bangchi hiam chih ien ding:-
(a) Siangthouna louin kuaman Pathian amutheikei (Heb.12:14)
(b) Noute na siangthou ding uh ahi, kei ka siangthou ngala (1 Pet.1:15-16)
(c) Pathianin sianglou dingin honsam keia, siangthou dingin a honsam ahizaw ngala.... (1 Thes.4:7)
(d) Jesun tangtunga a thugenna ah "Lungsima siangthoute a hampha uhi, Pathian muding ahingal ua" achi. Pathian muhtheihna lampi omsun chu lungsima siangthouna ahi. Tua pen Jesu Khris neihna pansana kingahthei phet ahi.
THUKHITNA: Unaute, tuni'n eimah ah hoihna suandi bangmah ineikei, hoih ikisaknate le Pathian adia a chingzou omlou ahihmanin Pathian pomtak kihitheilou himhim hi. Jesu Khris pansana Pathianin hompom ahihmanin amah (Jesu Khris) kiangah kitulut ni.Lungsima kikhekna neiin, siangthouna delh ni. Huchileh Pathian pomtak hithei ding hihang, tua dingin iki chial hi.
