Tangthupha Piaksawnna

Sorry, no Audio!

Note

KHANGSAWN TE KIANG A TANGTHUPHA MEIVAAK  PIAKSAWNNA

(Sam 78:1-8)

By- Upa Thianzakham

12:¹ Huaiziakin, huchitel a thupi, theihpihtu meipi umsuaka om ihih man un; hon noksak peuhmah leh ei a belh khelhnate koihmangin, ima ua kitaitehna ding om ah kuhkaltak in itai ding uhi. ² I ginna siampa leh hihbukimpa, Jesu lam en gige ni. A man tuh ama a kipahna om jiakin, zum lehzah donlou in Kross a sihna tanpha ana thuak a, Pathian Laltutphah taklam ah atuta hi.

Huaiziakin, huchitel a thupi, theihpihtu meipi umsuaka om ihih man un. Kuate hi ding ahi ua, hiai meipi hon umsuak bang a  theihpihtu hon umsuakte?

1. Angel hon chingtu leh enkai gige te
2. Misiangthou ana pai masate (Heb.11)
3. Mipi ei hon mu gige leh enkai gige te
4. Khangthak ei hon nungthuaptu di te ahi thei.

Tu sun hun in, Tuailai khangthak, hon nungthuap dite, Amaute hon en khe gige tute, ithugin, tangthupha meisel ipiaksawn di ngak tute dan in leng akoih theih ding in igingta hi. Bung 11 na ah ima ua ana paisa, ginna a miminthangte tanchin bangzah hiam tak a gen khit in, tua itangsim ahon gen hi. Huaiziakin, tuni’n eilak ah hiai gospel tangthupha meisel piaksawnna dinga,  chouna ala in, hon noksak peuhmah leh ei a belh khelhnate koihmang in, kuhkaltaka a, pan la ding in  iki chial ut uhi.

Relay race/Taiban kimawlna ichi mai di. Hiai kimawlna ah ama kai/ tai masa pen in atwp atun chiang a BATON/ Thil kipiak sawn pen aban a tai tu ding kianga apiak sawn di ahi. Hiai BATON kipiak sawnna dingin Timing/hun hi apoimoh mahmah te lak a khat ahi achi uhi. A ban a taitu ading in huai BATON ana ngak a, kintak a atai sawn pih theihna ding in. HIAI baton/ THIL KIPIAK SAWN pen uh lei a akiak sak ngeingei ua leh,  huan, a taina ding /lampi zuih ding pua a atai khak uleh, aban a tai ding pen DISQUALIFIED  hi uh ahi.

Hiai kimawlna relay race bangin, tuni’n ei Kristiante leng, i BATON tuh Gospel  ahi. Khangsawn te kiang a mitlou kia hilou in, lei a kesak hetlou a piaksawn ding nang le kei mohpuak ahi ichi hi.

Sam a isimna uah, Asaph in tuh hichin achi a, Pathin in Israel mipi te kiang ah,  Israel ten khangthak hongom dite kiang ah, Pathian thilhihtheihna leh anasep thupite leh, thillamdang ahihte ahilh sawn ding uh, huchia, khang hongom di ten atheih ua, atate uh ah ahilhhsawn ua, a ginna uh Pathian a koih ua, athupiakte azuih theihzawk na ding un achi hi.

Pathian thu itate uh ihilh ding bang ua ihilh zoh louh chiang un, Pathian thu itate lak a seel/iim toh kibang ihihlam imangilh kha nak uhi. Huai om dan tuh, tui siang limchi omna thei na pi a iim toh kibang isuak uhi.

1 Tim 5:8  Paul in Timothy kiang ah, “Kuapeuh in ama tanaute, amah inkuante khol houh, alimsak kei leh, ginna tuh a zuau san a, ginglou mi sangin ase zaw’ achi hi.

Ei ten leng hinkhua a poimoh/value isak penpen khangsawnte kiang a piak sawn di ahi.  Unaute, Paul mah bangin Kris Jesu a Pathianin, a hon sapna, ahon matna, hihtaangtun tum in, tangthupha gospel, piaksawnna nasep, semdia hon got pen ah,  kipahman muh tumin  phakchiamna lam delh ni.

Sawltak Paul in, kei hotdam ka hih khit nak leh chi in, ahotdamna kipahna atutphiah pih  maimah kei a, tangthupha genna nasep na ah, kipahman muh tum in,  phakchiamna lam ka delh hi achi. Aman, hiai nasep tuh kidouna toh bang teh in, Timothy kiang ah, 2 Tim 4: 7  Douna hoih ka douta a, kitaitehna ka tai tawnsuakta a, ginna tuh ka len kip paisuakta hi ana chi hi.

Achangin aman hiai nasep tuh, sepaih pang toh bang atehkak in, hiai tangthupha gensawnna na nna Timothy in a neglect/napnul tak/ aminpu lel a ahih khak ding lau in hichin achi 2 Tim 2: 4-5. Amah latupa akipahsak theihna dingin, sepaih kuamah galdou lai in, sepaih hiloute khosaknate ah  akisubuai ngeikei hi. Huan, kimawlmi kuapeuh kidemnate ah pang mahleh, dan bang a ahih kei leh kipahman amu kei hi achi hi.

June last week vel apat news ah, India te kimawl minthangte, dan in aphallouh, hihlouh ding kichi, damdawi ahihziak ua band a a om thu uh isimkhak uh kalamen hi. Napnul tak leh ginaloutak a isep leh, kipahman mulou thei ihi.

Tuni chiangin, Bible thillui/khangthu lui sutna lel bang a ngai hileh kilawm tate leh, Bible tulai toh ki relevant nawn lou sa khang thak hun a om ihi chih ihaih hetlouh ding uh deihhuai isa. Khang dang teng sang a tulai khang a dia poimoh zaw ahihlam iphawk uh deihhuai isa.

Denchia Soddom leh Gommora kichi khawng nupa min khawng peuh hon sak maimah khak di ule lauhhuai lahlou kasa. Kum bang zah hiam paitasa a EBCC Delhi Vision 2020 ichi hiam genkhawm dia Joint fellowship ineih na uah, heutu khan khat in, tuaban kum 10/15 chiang in Biakin kai di iki mu lai di uam achi a. Biakinn kikhop zaw tawp khol kei kha lele, ibiakna na kikhopte uh, social function khawng ahong bat maimah khak ding le lauh huai lahlou isa. I Pathian thutak dilute a, ei utdan lel leh tulai dan toh kituak dia  biakna khawng ineih khak di le pilvan huai mahmah mai thei.

Paul in 2 Timothy 4:4 ah, “Thutak apan abilte uh ahei mang ding ua, tangthu phuahtawm lam naih in apial ding uh” chi a ana genkhawl hun hi dek ta adiam honchi sak mahmah. I tate uh, zukham, sakham leh damdawi kham a kipei lou sunte te leng, Internet, Mobile phone, Face book, chihte khawng in naktak in hon sualsak hita lou hiam? Thagum leh khawul pawt dia taksa soizoi a kimawl sang a, computer khawng a online game chih peuh buaipih  thei leh, Bible khovel a laibu minthangte lak a khat bang lel a mu theite khang a om hita ihi.

Zan leh tuni leh tangtawn a kikhek ngeilou Pathian in, Thukhunlui hun ah hiai, Pathianthu, a kipiaksawn ding dan uh hichin ahilh hi.

Diu 6:6-7 ah Jehova Pathian in, ami Israel tate kiang ah, Toupa, Toupa keleu tuh I Pathian uh ahi. Toupa na Pathian tuh na lungtang tengteng in, na hanta tengteng in na iit ding ahi. “Hiai thupiak tuni a konpiakte mangilh ngei kei un, Huaite na ta te uh sinsak un. Inn a na om laiun, na vakkhiak lai un, na khawllai uleh na nasep lai un gen tuantuan un” achih bang in, Toupa Jesu, lal leh Hondampa dia nei a, zuihtak sa a zui tengteng in, I Pathian thu khangsawn te kiang a azuih theih ding ua ipiak sawn ding imohpuak /challenge ineih uh hilou hiam chi ihi.

I LST simna te ua pat in hiai, tangthupha kipiaksawnna ah line (lampi)/Agency poimoh masa pen tuh nu+pa te ahi chih ahaih i om kei di. I hihtheih dandan a ihilh ban un, Pathian kiang a thumna ah ipang thei hi. Himahleh, nu+pa chiat chiat leng itheihna akibang kei hial hi.

Pathian thu itate uh kiang a piaksawnna kong ah, Nu khituui leh Pa thumsakna substitute/khengkhe ding om kei mahleh, ei minam ten ichiin dan tangpi un, hiai te khengkhe dingin, Pator bang, chialpitute bang leh, SS heutute iset bawl sek uh hin amuh theih hi.  Huchih dungzui in, Saptuam in leng hiai lam I uang bawl ua, naaktak a pan la in, Naupang nipi skul inei hi.

Mi khat CV ka muh khak khat ah, a motto in, Even the best can be improve achi a, a best bang dia improve ngai lai di ade aw ka chi sim a, hilele agen nop pen tuh kuamah perfect om kei a, improve na di om leh thasial lou ahihdan gennuam adiam ka chi mawk a adik diam ah. Tua mah bang in tangthupha itate ipiaksawnna kong uah, nu + pa te ban a pawlpi in ineih uh agency (SS) te bang thumna toh idelh zui gige uh poimoh mahmah. Tuchiangin, I SS heutute un parent – teacher meeting chih bang hon pan khia ua, hiai bang idea hon puaksuah na tung uah kipahhuai sa in, Pathian min kaphat hi. Nu+pa toh heutute pang huan a, athu vuak hilou a, thumna mahmah toh idelh zui uh poimoh petmah, hiai chiin dan imitdel sialkhau let ua, ipan khawm kei ua, kua hiam te vuak iset uleh, I gospel baton kipiak na kong uah, khang kibansam ahong hih khak di lauhhuai kasa mahmah.

Hichin ka naih tuah mawk mawk a, Khovel ah thil theih bukim chih haksa pi hikha ding ahi dia, i suan mahmah Pastor te bangin le Refresher course chih bang a hon pan ua, huai ban in, Organization tuamtuam ah bang I et leh, asiam pen leh heutu a ineih te tata bang training na ding leh khawmpi te a zin khe tampente ahimawk ua, huchi ahihleh,  eilawi bangle, ki hihhalthakna,  Refresher course ngai sam lou ding hiam hon chi sak mahmah. Ahihkeileh, amaute ava kuankhiak theih louh lai un le, hong refresh sak di, hiailam expert deuh te bang i sap zel uh bang le hoih din ka hisap mawkmawk hi. Nu le paten bang ngaih dan inei diam ah.

Mi khat in, Pa Ngullam toh akihouna uh ahon gen ka zak khak khat ka lung hon khoih mahmah a om a, huai kon gensawn zual di. Heutupa Chinlang la phuah, Gelmawng e gel mawng chih la kha, nam dangten le hoih sa un chin, amau pau a let di achih chiang ua, ahi bang chet a let kha theilou un huai kha huai kha eilawi lak a khenkhat in, tuam biik kichih bawl a kisak theih pih mawk, huchi di hilou in, nam dangten leh khovel a pau tuamtuam te bang in le hoihsa in letthei uhenla, khovel teng dengsuak leh ikipah pih zawk di hi om taka chi a, awm kasa mahmah. La phuaksiam di leh, mi laphuah sa te bang music leh solfa bang bawlsak thei di itate uh lak a hong om leh bang kipahhuai law ding dan hiin, huai ding in, I SS uah subject khat bangin koih in, solfa leh music lam kisinsakna period bang omleh chih ka mimal duhthusam ka hon gentel mawkmawk di.

Khai, huchihtel le ngai khol kei veh, iphut khak dandan a I om touh nilnial ding hiveh, Gamteng awlmoh, ahihlou pumlum le ihisam ua, ihihtheih dandan in ihih thou ve ua le na chi sim uhia?.

Ka khawlui lam uah Pa khat a om a, aman sanggam pianpih aneia,  nau don khawng in apang sak sek hi. Khatvei anau don in ek a ne a, min, nanau don in ek ne eive, va en in achih chiang un, kei ta lah hilou a, achihsan maimah. Hiai ka khawpa uh mah banga, ken zaw ta neu azil ding ka nei nawn kei na chi hia or, ken kei tate ka hilh naak leh midang tate va awlmohpih vak athaman kei chi maimah ihi hia?

Ka khawpa uh mah bang in, amah kia kingaihtuah, aman nop asak nak leh anung a atate leh, a mipite te bang chi ding uhiam chih patauhna nei hetlou kumpi khat a om a, amah tuh Juda Kumpi Hezekia ahi. Ama tanchin vuak inle, bung kal 4 mawngmawng aluah hi. Lam tampi ah hoih mahmah, ama ma leh nung a amah bang a Pathian limsak kumpi om kei chih khawng ahi. …….2 Kumpipate 20:12….19 ana en lechin. Hiai thugen apan in Hezekia in ama damsung bel muanna leh bitna  om ding ahi chih amu thei a, huchi in aman,  “Hiai Toupa akipan  a non thukhah puak ahoih ve chi in a dawng hi. Amah kia ki awlmawh a, anung a khangsawnte, ama tu leh tate, akhawmipi te a dia patauhna nei hetlou kumpi thugen in ahon dahsak mahmah.  Amah dandan a ei hun sung kia di hisap nupi, papi, saptuam leh khawtang heutu leh makai ihih khak di lauhuai isa.

Khangthak dingte Pathian thutak, gospel mei vaak kichian tak a ipiak sawn na  aminpu lel, hihlouh hial sang in, akilawmsak na din hihni chi toh kibang a napnultak a ihih khak leh, a zaang di kua dang hilou in, eite mah ihi dia, khangsawn ten hon mohsa law kha ding uh chih lauhuai ka sa mahmah.

Tangthu khat kasim khak khat ka hon gensawn di. Kum 1896 ahi a, pa khat Mojave Desert ah ahong lamhaih kha hi. Dangtak in ahong siphial hi. Ahong dak kimvel leh agal gamla lou ah tuithawl ip lui khat leh tui pump tuiek mahmah ahon gal muh hi. Atui pump pen keu velvul kia hilou in atui ek zaw mah hi. Huchin, huai tuithawl ip a hon et leh, tui tuh hi, hileleng lui lawta in nam se mahmah ana om hi. Atuithawl ip bang nin zaw zen ahihman in, ahon phiatsiang leh, hichia kigelh ahon mu hi. Hiai thawl a tui te, tui pump ah thun gai vek inla, huan tui pump pump in, na dawn zoh chiangin tua bang mah in nangle nuse nawn in, nang bangbang a dangtak leh lamhaih te a ding in, chih kigelh ahon mu hi. Atui pump pen lui lua leh tui ekse gawp ahihman in gintak haksa asa a, atui thawl a tuui names sim lele ka dawn kei leh si ding hi ing a, bang chih di ka de aw chin ahong kingaihtuah hi, bangtan hiam nungin, kisuang lah kawmpi in,  a ut leh achih dan un ka hih ding chin huai tui uih tuh pump lui sung a thun in ahon pump ta hi. Bangtan hiam apump nung inle tui ahong pawt zawk ta kei hi. Lungkia a paisan dia lai ahon nung et leh tui tak nilh nilh ahon mu a, hong leh kik a hon pump nawn leh tui siangtak ahong pawt hi. Aduh zah tawk a dawn khit in huai tui ip ah ahon thun nawn a, hichin huai lai kigelh ava behlap a, gingta in, ataktak ahi chin agelh hi.

Hiai tangthu in zillai hoih mahmah ahon piak theih tuh, ei kia kikhual ding hilou in, mohpuakna poimohtak nei ihi chih ahon sinsak thei hi. I nunga mi tampi hong pai lai ding a om uh. Hiai san mun ahong tun chiang ua, bang hiam biak bek isulnung/inasep amuh theih ding uh, zuihtham, azuih ding uh inutsiat uh poimoh mahmah hi.

Nupi, khat tha it tak a na asep lai in, apam pindan apat in thakhat in thil kitam ging ngaihtak ahon za hi. Huai pindan apat in, ata naupang, kum 5 vel ding khat ahong kikou khia a, Nu, huai pakbawm hoih pen, khang sawn sawn a kipiak sawn ding na chih pen kha, akia a, akitam ta ve ahon chi kia hi. Khangsawn sawn a kipiak sawn ding achihpen uh, huai khang in asutam ta uhi. Tangthupha gospel, khangsawn sawn a kipiak sawn dia I Pathian in ahon deih pen, nang khang in na su bei kha diam? Ei khang a abei le zaw ahoih hetkei ding.

Pathian in ahon piak hi dinga ka gintak, hiai thu, puaknat leh vei mahmah a kaneih, Phulun pawtna ding leikha in akei vang chih bang pian in ka hon gen khia a, Aban poimoh isak dan bangchiat ua isep zui theihna dingun Pathian in athu itan bangchiat uh hon vualzawl chiat ta hen.