{s5_mp3}http://ebccdelhi.org/sermon/khristziakasawina.MP3{/s5_mp3}
KHRIST ZIAKA SAWINA
(Pathian Pahtak Inkuan)
Mat. 5:10-12-
10Diktatna jiak a sawina thuakte a hampha uh, van gam a maua ahi ngal a. 11Min keima jiaka hontai ua, a hon sawi ua, juaua gilou chitenga a honhek hun chiangun, na hampha uh. 12Kipak unla, nakpitakin nuam un; van ah na kipahman uh a thupi ngala: tuamah bangin na ma ua jawlnei omte leng a nasawi nak uhi.
Persecution: sawina, thuakna, engbawlna= religious persecution= ginna (sahkhua) ziaka sawina, thuakna, engbawlna
Khovel mun tuamtuam ah (India telin) sahkhua ziaka thuakna om den hi. Mite'n a ginna uh ziakin sawina leh engbawlna ana tuak sek uhi, khenkhat te'n sihna tanpha tuak uhi.
v.10 ah diktatna ziaka sawina tuah ding ahihdan kigen hi. Bangchibang diktatna hiam? Mat. 5:20 ah na diktatna un Pharisaite diktatna a khup kei leh...kichi hi. v.10 a diktatna kigen tuh pharisaite diktatna khup diktatna ahi. Pharisaite "diktatna" tuh dan zuih kimna, a hi ding bang a thil hihna ahi. Himahleh, v.10 a diktatna kigen tuh dan zuihkimna lel hilou in, thil ahi ding banga hihna lel hilou in "Jesu toh kizopna diktatna" ahi. Akibat louhna tuh khat pen dan zuihkimna diktatna ahi a, a khat pen Jesu toh kizopna diktatna ahi. Nekgukna tellou diktatna leh Jesu toh kizopna diktatna ahi.
v.10 diktatna ziakin hamphatna tampi i nei hi. Khelhna sal apan suahtakna, tangtawn hinna, lametna hing neihna i ngah hi. Huchihlaiin, hatsakna leh thuakna leng hon chiam hi. Aziak tuh Lk. 16:14 ah mi'n heutu nih nna a sem kop theilou ding, chi hi. Hiai v.10 diktatna tuh bangmah dang toh neihkhom theihlouh diktatna ahi. Huaijiakin, sawina, engbawlna, thuakna toh kizui pahpah hi.
Huchibang thuakna hongtun hun chiangin leng a thupina tuh- na hampha uh chih ahi. Thuakna lakah leng hamphatna om veve hi. Huai hamphatna tuh Van ah kipahman thupi in hon ngak chih ahi.
Gintute'n hiai khovel a thuakna, sawina, engbawlna lakah leng Jesu Khrist ah kipahna leh lungkimna i nei uhi. Huai tuh i hamphatna thupi mahmah uh ahi.
Huaijiakin, na sep le bawl khempeuh Jesu toh kizopna pansan a na kizatna ahihleh manpha vek dinga huai te'n tangtawn daih ding uhi. Pathian toh kizopna pansan ahihkei leh Pharisaite' diktatna banglel hi ding uhi.
Toupa'n A' thu zate hon vualzawl chiat hen.
-------------
08.02.2015
