{s5_mp3}http://ebccdelhi.org/sermon/christmas2014.MP3{/s5_mp3}
Khrismas Chibai!
I ngaklah mahmah Khrismas 2014 zang thei di'n Toupa'n hamphatna hon pia a ikipak mahmah hi.
Kisakkholhna lungsim leh nasep ah paitou jel in lamzang takin eimah mohpuakna leh poimohna bangbang ah ikizang uh a, huai te Toupa'n hon vualzawl sak in hiai tan i tungta uhi. Khrismas Committee bang, decoration pawl bang, leh a tuamtuam te, leh Media team bang tungah kipahna lian mahmah hi.
Chikmah a i hih ngei nailouh Media team panlakna in basement ah live telecast i koih a, tu'n le mipi dim phitphet in tuta uhi. Huai banah online a et theih dingin live streaming i khah thei ua, manpha mahmah di'n i ngaihsun hi. Hiai te le Toupa vang ahi.
Delhi a Inkuan toh omkhawm thei lou, mun tuam a sepna leh siamsinna ziaka va omkhia, bangzah hiam te melmuh in om ua i kipak mahmah hi. Huai bangah, mun tuam a om tuni a hiai mun a Khrismas hong zangkha thei bangzah hiam melmuh in om ua, amaute ikipahpih in i vaidawn uhi.
Khrismas Ni chu kipahna Ni ahi a, kuapeuhmah i kipah chiat kon lamen hi. Huchihlaiin, kipahna subuai thei thil nih kon taklang ding- i) lauhna (fear) in kipahna mangsak thei mawk hi. maban ding lauhna, tulel a thil tuahte lauhna, hun paisa a thiltungte apan lauhna na neih leh na kipahna bukim lou ding hi. ii) kisaktheihna (pride) in leng kipahna mangsak thei hi. Kisathei taka omna in lungsim tawng a kipahna i neih ding hon dal hi. Tuni'n lungsim tawng a na kipahna hon lakmangsak a omleh Toupa kiang tun le chin, aman tua kipahna bukim hon pe nawn ding hi.
Tunin, Khrismas kum bangzah hiam chiat izat khitna uah, Khrismas in bang hon puak hiam chih kidong in huai naungek hongpiang' hihna (character/quality) te gen le'ng chin kong kisa hi.
Isai 9:6-
Ei dingin naupang a hongpianga, tapa piakin in omta; vaihawmna a liangjangah a tuang dinga; a min Lamdang, Lemthei, Pathian Hat, Khantawn Pa, Lemna Lal lah a chi sin ngal ua.
Naupang/ naungek hongpiang' hihna bangbang ahia? Mosi naungek ahihlai a a nun lui/dil a akoih Pharo kumpipa tanu in a muh in deihthoh takin la hi. Himahleh, hiai nu'n a naungek lak kua hihiam chih theilou hi. Khrismas kum hiai zah i zat nungin naungek Jesu hihna theih khelh khak theih ahi.
i) Lamdang Lemthei- Wonderful Counselor. Lamdang (wonderful) ahihna tuh Pathian leh mihing hihna nih a kop ziak ahi. Mihing ahihna ah nang leh kei' theih bangin leh tuah bangin thilte ana tuak a i haksatna leh kipahnate hon theihpih hi. Huchi bangin, Pathian ahihna ah eite Pathian hihna mu leh theichian dingin Pathian' hihna koppihna ah hon pilut thei hi. Hiai hihna nih kikop chu a lamdang mahmah ahi. Hiai hihna nih nei ahihziakin Couselor- thuhilhpa, sinsakpa, lamlahpa muanhuai ahi. Tunin kingaihtuah leng eimah hinkhua ah, inkuan ah, khotnag ah, hiai Jesu i counselor ahi taktak hia? Amah pina, hilhna leh sinsakna bangin hinkhua ikizang hiam chih ki vel tuak mahmah ding hi. Samiri numei toh Jesu'n counseling a neih khit un numei in counselor ahihna muchian hi. Nang na muchian ta hia? nang adi'n counselor ahi hia?
ii) Pathian Hat- Mighty God. galdou a zou jel pa genna ahi. A vangletna leh thahatna genkhiakna ahi. Pitu dingin, makaitu dingin a muanhuai mahmah hi. Pathian hatpen ahih ziakin. Amah khut hat thilhihthei ah na kikemsakta hiam?
iii) Tangtawn Pa- Everlasting Father. Pa in tate it taka a kep a a makaih bangin hiai Pathian hat in chiklai peuh in hon kem in hon makaih tawntung ding hi. Amah tangtawn Pa ahi.
iv) Lemna Kumpipa tapa- Prince of Peace. amah ah Pathian leh mihingte'n kilem i nei hi. Hiai kilemna mah zangin mihing te' kalah leng kilem a om thei phet hi.
Hiaite tengteng ziakin a tungah Vaihawmna (government) piak in omta hi- the authority to rule. Namte (nations) tunga vaihawm ding ahih dan Kilakna 19:25 ah muhtheih hi. Aman dik achihte dik hi dinga diklou achihte diklou hi ding hi.
Amah counseling na nuai ah kitulut a, hinkhua thak zang nuamte adin Khrismas tuh manpha mahmah ding hi. Tua bang hi thei chait dingin Toupa'n Khrismas zangte tengteng hon vualzawl chiat hen.
------------------
December 25, 2104
