Articles

(1st Position) KHRIST IN A THUZOH NGAIHTUAHNA

 “Lunga gel pansante leh thilsang chiteng Pathian theihna dal dinga sangtaka bawlte i phuk zel; ngaihtuahna chiteng Khrist thumanna sikha a pi in” (II Kor. 10:5) Mihing te ngaihtuahna kikhek mengmeng thei hi. Leitung khovel paidan a kikhek touhzel dungzui in, mihing lungsim khoihkhathei ding thil/thu tamkhop hong piang khezel hi. Tua te’n mihing lungsim aselam leh ahoihlam a kangtuah sakzel in, asia-apha theihna tanpha buaisak zou hial hi. Laisiangthou toh kituak hinkhua zat sangin, khovel paidan toh kituak hinkhua zatna ding ah hon khoihkha mahmah hi. Hiai lungsim kaiheithei te apat a panlakna dingin, BYF heutu te’n tukum thupi dingin ‘Khrist in A thuzoh ngaihtuahna (II Kor. 10:5) hon gelkhia uhi. Khrist thuzoh ngaihtuahna neihtheihna dingin mahni kithununzoh poimoh hi. Tulai khovel paidan, nek-le-dawn, kicheina, paukam zat leh thilchin tuamtuam te apat pilvangzou mahmah a, i omdan Khrist deihna toh kituakna hiam chih chet kul hi. Tua Khrist in hon thunuzoh ngaihtuahna neihna ding leh hiai khovel omdan hoihlou te douna dingin, “ngaihtuahna chiteng Khrist thumanna sikha a pi in”(II Kor. 10:5b), chihtakna toh Jesu nungzuihna a kalsuan poimoh hi. Ei mihing te, ‘khelhna sikha apat Khrist sikha dia tatkhiat’ (Rom. 8:1-2; Gal. 5:1) ihih bangin, i makaitu, Toupa Jesu ading a hing dingte ihi. ‘Khrist in A thuzoh ngaihtuahna’ ichih chiangin, ‘ngaihtuahna te Khrist thumanna sikha a pi’, Toupa Jesu Khrist thununna nuai a omdia kipekhia hiam, Amah zattheih dinga mahni hinkhua lankhia chihna ahi. Hiai leitung mite paidan te enton hizawlou a, Toupa Jesu Khrist ading a tuam om, lungsim ngaihtuahna kemsiang chihna leng hitheih hi. Khrist thuzoh a om chiangin, mahni hinkhua ah Toupa Jesu a lu pen in kikoihthei dinga, hinkhua manpha kizang theita ding hi. Khrist in A thuzoh ngaihtuahna neih theihna dingin: Hotdamna kichetna - Mihing khat a piangkhia a, Toupa Jesu Khrist ‘kha leh hondampa’ a pomlou in Amah tate suak theilou ding hi. Tua mah bangin, Amah thuzoh hinkhua zattheih hilou zel ding hi. Tua ahih manin, Khrist in I ngaihtuahna hon thuzoh theihna dingin, i khalam hinkhua bawldik a hotdamna kichian ineih masak kul hi. Bible sim a thumna - Laisiangthou pen ei gingtu te’n i sim tamkhop leh i khalam leng hatna kingah ding hi. Tua mah bangin, thumna tuh i nakna ahi; Pathian thoh iki houna ahihman in, ineih tam ding ahi. Laisiangthou sim a thumna toh hinkhua zatzelna pen Khrist adia kipiakna leh i ngaihtuahna te Amah ading a apkhiak theihna kalbi ahi. Kiniamkhiak a Toupa khebul a kun - I Toupa Jesu kianga kiniamkhiak a, mahni hinkhua Amah ading a latkhiak poimoh hi. Huchi hileh, Khrist in i lungsim gelte hon khoihkha thei ding hi. Tua ahihman in, kiniamkhiak a i hinna, Amah i Toupa Jesu zatding a kipiak khiakna, ei gingtu te’n i hihding ahi.
Mihing lungsim kaiheithei/thuzohthei te: Gindan diklou - Tulai khovel a ngaihtuahna tuamtuam, gindan tuamtuam, adik-adiklou chih kithang mahmah hi. Tua te’n mihing ngaihtuahna hon subuaizou mahmah a, i gindan leng hon sukha mahmah hi. Hiai te’n i Toupa Jesu toh i kal kizopna hon buaisak thei hi. Telsuina toh kisai - Khovel khanghat mahmah ahihna ah, muhkhiakthak, Laisiangthou thu toh kikalh tamkhop omta hi. Leitung kisiamdan toh kisai, vanlam a Pathian thilsiamte suidan ah, khovel gindan leh muhdan te’n i Khristian na hon sukha in, Khrist a ginna sa’ng in leitung mite ginna hong lianzaw khathei hi. Lawmpolh hoihlou - Mihing iki thuahpih lawm-le-vual te’n i salam hinkhua chauh hilou in, khalam hinkhua tanpha hon khoih lingzou hi. Tua te’n, Jesu Khrist lungput lamsang in, leitung a nopsakna dan a kilang te’ hinkhua ah honpi nuam mahmah hi. Khrist in A thuzoh ngaihtuahna neih chiangin:
Lungnopna leh nopsakna bukim zawdeuh kinei ding - I lungsim ngaihtuahna pen Jesu Khrist in hon thuzoh chiangin, kipahna bukim leh kuamah in hon piak theihlouh lungnopna kinei ding in.
Awlsam zawdeuh a haksa thuak theihna - Khrist in i ngaihtuahna hon thuzoh chiangin, haksa hinkhua te, Amah tungtawn in tawldamna toh kithuakthei ding hi. Jesu Khrist ading a kikep siangthouna - I ngaihtuahna te Khrist thuzoh hong hih chiangin, hindan diklou, thangtatna tuamtuam te apat kiven zohna kinei ding a, hinkhua manpha kizangthei ding hi.
Lungput leh lunggel dik - Khrist thuzoh ngaihtuahna ah lungsim sia leh nin chih omlou hi, Amah tungtawn a hinkhua hoih leh siangthou zat ding hita ahihman in. Atuam om hinkhua kizangthei ding - Mihing te hinkhua ah Khrsit in nna honsep a, ngaihsutna te hong thuzoh chiangin, mi teng hih ut leh om ute te apat kiven theihna kineithei ding hi. Tua in, leitung khovel mite apat tuam omtheihna, Toupa Jesu ading a gin omna toh hinkhua zattheihna lungtang leh omdan hontun ding hi. Tua ahihman in, leitung hinkhua ah haksa leh buaina tuamtuam kituak theizel hi. Tua lou in khemna lam chiteng ah kituakthei zel lai hi. Hiai buaina leh khemna te apan a lungnuam zawdeuh a vualzohna ngah theihna dingin, Toupa Jesu Khrist ah hinna latkhiak kul hi. Daniel leh Joseph hinkhua kigen, Bible a imuh mahbang un, Tungnung pen Pathian a gin omna, a kingakna hang un, lamzangna leh Amah vualzawlna toh hinkhua zangthei uh hi. Tua te enton in ei gingtu te’n leitung hinkhua zat phamoh hi.
Tua Khrist in A thuzoh ngaihtuahna neithei dinga hotdamna kichiang nei a, thumna toh Bible sim gige a, khalam hinkhua khansemna dinga Toupa Jesu a iki piaklut a, i hinna Amah kianga latkhiak poimoh hi. Tua hileh, hikhua dik leh hoih, Pathian pomtak hinkhua kizangthei zelzel ding hi. ( Tuailai Day 2015 zat hun a thugelh kidemna a Khatna (1st) la Mr P. Chinliankhup’ Thugelh )

Church Address

Church Address & Pastor Qtr.:
Plot No 16, Pocket 6
Dwarka Sector 1A
New Delhi - 110 045

Contact Info

Pastor N Tuang Lang - +91-9811343689
Pastor H. Biakson - +91-9711864037
Email: pastor@ebccdelhi.org

Service Time

Personal Counseling: 9:30am - 10:30am
First Service: 11:00am - 1:00pm
Second Service: 2:00pm Onwards

Subscribe eNews

To subscribe eNews click below button

Subscribe Now

Copyright © 2016 Evangelical Baptist Convention Church Delhi. All rights reserved.