Articles

SUAHTAKNA LAMDANG

- Upa Khamgoupau

Hiai Pathian mina thuakna apan suahtakna lamdang  kamit a kamuh hikei mahleh athuaktu ngei kama kipan a kazak ahih manin lungkhoih huai kasa a, keikia leng hilouin azakha michih lungsim honkhoih ahihmanin tamlou kahon gelhkhia hi.

Delhi a ei Zomite biakkhawmna masapen “Zomi Christian Fellowship” (ZCF) a makaite mi 9 (kua) Pastor J.Mangte makaihin  Mission Board member  6 (Pastor dang khat, Rev LT Lianzaw leh numei 2 telin) Rajasthan a Churu District a Sadarsahar khopi a a Missionary support te nupa omna veh ding in  January 30,2016 (Kiginni) jingkal baihtakin Gari nihin kipankhia uhi. Ani mah sunnung 2pm in amun tungin a missionarypa uh inn a fresh up in house visit pan ngal uhi.
 
Damlou 2 veha thumsakna neikhin hongpawtkhiak uleh Hindu kutmuttte pasal bangzahhiam hong kipunkhawm in thudotna tuamtuam ua, huntomchik sungin hongtam hiaihiai ua, hichi’n abanin honkhoihta uhi. Lohngaihna theilou in mi 400/500 bang phata uh ahih manin chihnadi dan theiou in sialpi vuahthuak mai uhi. Agen theih omsun uh tuh a piching zodeuhte kianga Police honsap sak un chihleh thumna neih himai hi A pasal tengin a numeite uh khut kilen a umtuah in daal ua, amau anungla uapan aut bangbang un kikhoihsak uhi.

Dakkal 2 val vengveng sukkaih toukaih a utbang banga akoih nungun Police te hongtung khongin Police Station ah tonpih ua, thudotna nei uhi. Huchih sungin innlam bangchichi hiamin hon houpihthei ua, i mimuan khenkhatte panlakna hangin January 31,2016 (2 am) velin) Police station apan  a giahna mun uah khakhia thei uhi. Hiaihun tanin leng Police station kongah mi aza a simte ‘Jai Sri Ram’ chiin kikouden uh chi uhi.

A alak ua telkha numei khatin agen khak mak mahmah khat tuh  “hiai team a naupang deuhpen kahih ziak ahidiam khenkhat in hongna enlah uh ahiding a, atuamin honkaikhia ua banghiam honlohsawm uh anahi ahi chih phawkin, Pathian kiangah kathum a, hiai migiloute bawlsiat din honpekhe ken” chiin kathumleh innsung a kaiihlut honsawm dek chiangun a upalam deuh leh numei kuahiam in  hongtuakkha in,  numei  nahichih uh bangloh sawm nahi uhiam chiin amau leh amau bang hong kina thethup uh, huchih sungin Police hongpaiman in lamdang takin ka suakta”  chi hi.

Hichibang a mipi soisak leh huhtudi omlouhna muna hin himhim kilamenlou a aomlai un Pathian in lamdang takin suaktasak a, atung ua angohna uh Case leng evidence omlouh ziakin bangmah case bawltheilou in ajing sunin honkhahkhia ua, nitak dak 8 pm a Delhi bittak a hongtung uhi. ZCF makaihna n amaute Vaidawnna mipin kinei a, report mimal chiatin pia uhi.

Hiai a thiltuah ua kipan alamdang mahmah Pathian nasep hingei dia gintak agente uh tuh:-

  1. Mihing hizah lawmlawm in dakkal nih val utdandan a khoih uh himahleh hospital a puaklut ngai hiala liamna tuak omlouin suakta uhi
  2. Mi hizahta in akhoih hangun hiamhei sing leh suang kuamah in zanglou in a khut leh khe kia uh zang ua, huaiziak maha suakta hidan uh ahi. Amau agenna uah ei tribalte khong hileng singkhuah suangtum kipan dia hun  tomchik sungin  mi tawmchik inle kithat pahdi ihi uh chi uhi (sinlai lakdi inei hia?)
  3. Numei bawlsiat sawma hunlemchang zonga panla a’ tangvalte uh bangzah hiam  lohsamin heh mahmah uh chi hi.
  4. Mission trip a hohten tua damlou avehlai un thilpiak khenkhat leng pia ua, Video a hoihtak  anala omdan uh  ahi. Huaipen Police station a conversion bawl uh ahi chi a angohna uh evidence dia lah asawm uleh anaki save khalou (ki delete vek) a bangmah proof theilou uhi.

Hiai khua pen agendan un mihing singgiat vel tenna khopi neu khat ahi a Hindu Temple 400 val omna, kulmut mahmahte omna mun, Christian 0% ahihziakin kuamah lutngamlouhna ahi. Nidangin Rajasthan a Bible zila vaom eimi khat hiai khua a outreach a avapai in sihna vatuakkha ahi chi uhi. Setan kulhpi khat ahih ziakin tangthupha lutdi zadah mahmah ahih manin daltheih tawpin dal ahi achi uhi. Thumna ah khutlum thuaktu unaute thumpih in hiai gam Setan lalgam apan Pathian lalgam asuahna din thum chiat ni.

Church Address

Church Address & Pastor Qtr.:
Plot No 16, Pocket 6
Dwarka Sector 1A
New Delhi - 110 045

Contact Info

Pastor N Tuang Lang - +91-9811343689
Pastor H. Biakson - +91-9711864037
Email: pastor@ebccdelhi.org

Service Time

Personal Counseling: 9:30am - 10:30am
First Service: 11:00am - 1:00pm
Second Service: 2:00pm Onwards

Subscribe eNews

To subscribe eNews click below button

Subscribe Now

Copyright © 2016 Evangelical Baptist Convention Church Delhi. All rights reserved.