Latest News

PATHIAN POMTAK HI DINGA KISINNA

Pathian pomtak hidinga kisinna
By- L. Ngulminthang
Kisinna ichih bang ahia? Mihingte idamsung khosakna uah nitengin kisakhawl leh kisin gige angai hi. Naupangte siamsin dingin school ah isawl ua, ei a piching zawdeuhte isepna leh bawlte ua,semsiam leh lohchin ut in ihih theih tawp uh suahin kisinin ipang jel uhi. Huaiziakin, kisinna leh kisakkhawlna ichihtuh ihinkhua ua dinga thil poimoh leh alou theilou ahi. Ahih hangin, khenkhatte thil khatpeuh hih leh sep ding tup aneihte a dinga kisa khawl leh kisinlou in ngaih thah taka hinkhua zang lawi bang tuh I om veve uhi. Mi kisinthei leh sinsakna poimoh ngaih mite tuh milohching leh hindkhua a navak deuhte ahi naknak uhi. Huan, kisinna peuhmahin tup aneih ding ahi. Huan, hiai tup-le-ngim ineih pen lohchinna ding leh ingah theih na dinga panlakna tuh kisinna dik ahi.
2. Pathian pomtaak/zaatheih bang chi’n ihong hi thei dia? Hiai dotna pen ‘Pathian pomtaak hidia kisinna’ chih sangmah inleng apoimoh zaw hi. Aziakbel ei mihing akhialsa leh Pathian deihdana chingzoulou sate ihi uhi (Bible chang miteng teng in thil ahihkhial … Pathian thupina atang zou kei. Roman 3:23). Huaiziakin, ei mimal felna, hoihna chitna nei ikisakte suangin bangchi bangin kisinin, lengmasel leh pasikhawmte natan in sawm-a-khat pia in, kidiktatsak mah lehang Pathian pomtak ihithei ngei kei ding uhi. (Chitna ka neikei chih nathei Toupa/Nanga dingin ka muanhuai kei hi/Etna chitenga ka et chiangin zong/Chitna ka neilou Nanga dingin). Ahihleh, bangchi’n Pathian adia pomtak ihong hithei dia? Amah toh kituahna, A khasiangthou theihsakna (Abba Pa chi’n kha mahmah in eimah kha toh Pathian tate ihi chih hontheisak Roman 8:14-16), huaibel, hotdamna itan kei leh mimal felna, diktatna leh hoihna ichihte leng Pathian mai ah, puansia/tangtel bang lel ihi uh chih kumpi David in Sam laibu ah ana gen hi. Jawlnei Isai in Pathian toh kituahna aneih in amah thulimlouhna leh kihhuai ahihdan kiphawk hi (Isai 6:5). Huchi mah bangin, Job in Pathian amuh in amah thulimlouhna leh suan ding neilou ahihdan akiphawk hi(Job...). Huchimahbangin, Saul (Paul) in Kris toh kituahna aneihin, banga hia ka hih ding chi’n a donga, huan ahih ding kichiantakin hilh in a om hi. Mahni felna, pilna leh diktatna suanga, kuhkal leh phatuam ngaitaka, sahkhua min a midangte sawisa ngap hial a a omlai in Pathian zattak ana ching tuan kei hi. Huaiziakin, Pathian pomtak hihna dingin, ei pen achingzoulou, a bukimlou leh thulimlou ihihlam iki phawk poimoh masa zaw hi. Dik leh hihhoih kisa a midangte hihna leh hihdan khawng buaipih lua ihihleh Pathian pomtak kiching nailou ding hi. Huaiziakin, Pathian toh kituahna/hotdam kitheihtelna chiantak neia, adeihdan itheih chiangin, Amah pomtak hidia kisinthei pan ding hihang.
3. Tuabanga, Pathian pomtak hinkhua (siamthak hinkhua) ineih chiangin, adeihlam leh pahtaklam zong dingin ikisinthei pan ding hi. Tua bang kisinna bangbang hiding hiam, chih saulou in igen ding.
(A) Ginna ah(faith): Ginna lou in Pathian pahtaklam hihvual ahikei(Heb 11:6). Huaiziakiin, ginna tungtawn maha Pathian pomtak hidia kisin ding ahi. I niteng hinkhua a buaina leh khemna ituah tampente ginlahna ziak ana hi naknak hi. Pathian thuchiamte ahibanga muan ngamna tuh ginna ahi. Billy Graham kiang ah Pastor khat in ‘Jona ngapi’n avalh chih pen jaw gintak huai nasa zou hia, chia a dot leh, Billy Graham in, Bible in agen ahihnak leh Jona in ngapi avalh chi leh leng ken zaw ka gingta di chih san hi. Gamdaia Israel tate Pathianin, sa(meat)a vak ding thu agenlaii, Mosi in a mi tamdan leh asa beidingzah angaihtuah chiangin haksa sa in muangzoulou hi. Tua bang hunlai in Pathianin,” Toupa khut a tomta ahia? Na tuga kathu banga atun leh tunlouh namu mai ding” Mosi kaingah chihsan hi (Numbers 11:23). Pathian pomtak hinkhua zang ding in ginna ah i omna hiam chih ei leh ei kien chian jel ni hang (2 Cor 13:5). Tulai ilaka kineksiatna (corruption), diktatlouhna leh kikhemna (fraud), leh thanghuaina chitenga (immoralities) iki bual khaknaknate uh, Pathian thuchiam muan zohlouhna ziak ahi. Peter kiangah Jesu’n ‘hongpai in’ achihlai in , Jesu kia ena apai sungteng tuipi tungah paithei hi. Himahleh, akim akiang tui kihawt a et chaingin, tum ding in ki sa hi. Jesu Jesu’n asawkpaha amah alena, akiangah, nagn gintawmpa, bangdia ginglah nahia (Mat 14:2931) achi hi. Pathiana ginna nga in khovel siatna leh hoihlouhna a pan iki hem khe ding uh. Huchi’n amah a dingin pomtak leh deih huai ichingthei ding uhi.

(B) I tup-le-ngimte Pathian pomtaak hidingin kisinni hang. Pathianin tuichim in mihingtate ka gawt nawn kei ding, achihnung inleng, mihing tate’n, tuichim apan kihumbit na ding geelna in Babel in sang analam sawm uhi (Gen 11:3-9). Huaibang thiltup pen Pathian muanzohlouhna ahihbanah, amau min om det ding adeihna uh leh akithupisak/mintansak utna uh ahihmanin( gen 11:4), Pathianin atup-le-ngim uh atang tungsak kei hi. Huainak sangin, buaina leh kikhenjakna tunte ahi zaw hi. Ei khristiante’n itup-le-ngimte Pathian pomtaak hithei dingin kisa khawl ni hang. Ki saktheihna, midangte douna leh elna, ahihkei leh mahni angmasial lua hinkhua leh tup nei ihihleh Pathian pomtak ching lou ding hihang. Huaiziakin, Pathian deihlam leh lungtunna bang hihiam, chih ihin khua ah zonpenin nei lehang, apomtaak hinkhua izang thei ding hi. Tuabang dingin kisa khawl nihang.

Plot No 16, Pocket 6, Dwarka Sector 1A, New Delhi - 110 045
Phone: +91-9862741044 / 87309 91331 | Email: pastor@ebccdelhi.org